މާލެ ސިޓީގެ މޭޔަރުކަމުގެ ފުރަތަމަ ދުވަހު ހުޅުމާލެ، ކައުންސިލްގެ ބެލުމުގެ ދަށަށް ގެންނަން މަސައްކަތް ފަށާނަން ކަމަށް ކުރިއަށް އޮތް ލޯކަލް ކައުންސިލް އިންތިހާބުގައި މާލޭގެ މޭޔަރު ކަމަށް ވާދަކުރައްވާ ގައުމީ މިނިވަން ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.

ޒަރިޔަންދު މިފަދައިން ވިދާޅުވީ އޭނާގެ ކެމްޕެއިންގައި ހުޅުމާލޭގައި ޑޯޓުޑޯގެ ހަރަކާތް އަންގާރަ ދުވަހު ފައްޓަވަމުން ޗެނަލް13 އަށް ދެއްވި ބަސްދީގަތުމުގައެވެ.

ޒަރިޔަންދު ވިދާޅުވީ ގާނޫނަކުން ކަމެއް މަތިކޮށްފައިވާ ނަމަ އެކަމަކަށް މަގު ފަހިކުރަން މަސައްކަތް ކުރަން ޖެހޭނީ އެ ޒިންމާ މަތިވެފައިވާ މީހާ ކަމަށާ އެމީހަކު އެކަމެއް ގާނޫނީ އިމުގެ ތެރެއިން ކުރަން ވާނެ ކަމަށެވެ.

އެގޮތުން ހުޅުމާލެއަކީވެސް މާލެ ސިޓީގެ ތަނެއް ކަމަށާ އެހެންކަމުން ހުޅުމާލެ ގާނޫނީ ގޮތުން އޮންނާނީ މާލޭ ސިޓީ ކައުންސިލްގެ ބެލުމުގައި ދަށުގައި ކަމީ ޝައްކެއް އޮތްކަމެއް ނޫން ކަމަށް ވިދާޅުވެ ޒަރިޔަންދު ވިދާޅުވީ ސަރުކާރުން ހުޅުމާލެ ސިޓި ކައުންސިލާ ހަވާލުނުކުރަނީ ކަމަށް ބުނެ މިހާރުގެ މޭޔަރު ފުއްދާލެއްވިޔަސް އެއީ ޖަވާބުދާރީ ވާން ޖެހޭ ކަމެއް ކަމަށެވެ.

ޒަރިޔަންދު ވިދާޅުވީ ﷲގެ އިރާދަފުޅުން މާލޭގެ މޭޔަރު ކަމަށް އޭނާ ހޮވިއްޖެ ނަމަ އެންމެ ފުރަތަމަ ދުވަހުގެ މަސައްކަތުގެ ތެރޭގައި ހުޅުމާލެ، މާލެ ސިޓީ ކައުންސިލްގެ ދަށަށް ގެނައުމުގެ މަސައްކަތް ފަށާނެ ކަމަށެވެ.

ޒަރިޔަންދު އިތުރަށް ވިދާޅުވީ ހުޅުމާލެއަކީ ތަރައްގީ ކުރަން އެޗްޑީސީއާ ހަވާލުކުރި ފަރެއް ކަމަށާ އެތަނުގެ ރައްޔިތުންނަށް ބޭނުންހާ ގޮތެއް ނުހެދޭނެ ކަމަށެވެ.