މަތީ ތައުލީމު ހާސިލުކުރާ އާބާދީގައި ފިރިހެނުންނަށް ވުރެ އަންހެނުން ގިނަ ނަމަވެސް، މަތީ މަގާމުތަކުގައި އަންހެނުން މަދުކަން ތަފާސްހިސާބުތަކުން ދައްކައިފި އެވެ.
އަންހެނުންގެ ދުވަހާ ގުޅިގެން ސްޓެޓިސްޓިކްސް މޯލްޑިވްސްއިން އިއްޔެ ނެރުނު ތަފާސްހިސާބުތަކުން ދައްކާ ގޮތުގައި އުމުރުން 17 އަހަރުން ފެށިގެން 29 އަހަރާއި ހަމައަށް ބަލާނަމަ، މަތީ ތައުލީމު ހާސިލުކުރުމުގައި ގިނައީ އަންހެނުންކަން ފާހަގަކޮށްލެވެއެވެ.
ނަަމަވެސް މެނޭޖީރިއަލް ފެންވަރުގެ މަތީ މަގާމުތަކުގައި މަސައްކަތްކުރާ ދިވެހިންގެ ތެރެއިން އަންހެނުންނަށް ނިސްބަތްވަނީ އެންމެ 23 ޕަސެންޓެވެ.
ބާކީ 77 ޕަސެންޓަކީ ފިރިހެނުން އަދާކުރާ މަގާމުތަކެވެ. އަދި ފިރިހެނެއް ނަމަ މަސައްކަތް ލިބިފައިވުމުގެ ފުރުސަތު ވެސް 30.5 ޕަސެންޓު އިތުރުވާ ކަމަށް ތަފާސްހިސާބުތަކުން ދައްކަ އެވެ.
ރާއްޖޭގައި ދިރިއުޅޭ ދިވެހި އާބާދީގައި ގިނައީ ފިރިހެނުންނެވެ. އެގޮތުން ދިވެހި އާބާދީގެ ކޮންމެ 100 އަންހެނަކަށް 103 ފިރިހެނުން ތިބެ އެވެ.
