މި އަހަރުގެ ރޯދަ މަހުގެ ފުރަތަމަ ދެ ހަފްތާ، މާލެ ސަރަހައްދުގައި އެންމެ ގިނައީ ވައްކަމުގެ މައްސަލަތައް ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ރޯދަ މަސް ފެށުނު ދުވަހުން ފެށިގެން މިދިޔަ އާދިއްތަ ދުވަހުގެ ނިޔަލަށް ވައްކަމުގެ 101 މައްސަލަ ހުށަހަޅާފައިވެއެވެ. މާލެއިން ކުރި ވައްކަމުގެ 79 މައްސަލަ އާއި ހުޅުމާލެއިން ކުރި ވައްކަމުގެ 22 މައްސަލައެކެވެ. މާލެ ސަރަހައްދުން ވައްކަން ކޮށްފައި ހުރީ ރޭގަނޑުއެވެ. މިދިޔަ އަހަރުގެ ރޯދަ މަހުގެ ފުރަތަމަ ދެ ހަފުތާ އާ އަޅާބަލާއިރު ވަރަށް ބޮޑުތަނުން އިތުރުވުމެވެ.

މީގެ އިތުރުން، ފޭރުމުގެ 20 މައްސަލައެއް ހުށަހަޅާފައި ވާއިރު އެއީ މާލެ ސަރަހައްދުން ރިޕޯޓުކުރި 16 މައްސަލަ އާއި ހުޅުމާލެ ސަރަހައްދުގެ ހަތަރު މައްސަލައެވެ.

މި ރޯދަ މަހު ހިނގާފައިވާ އެކްސިޑެންޓްތަކުގެ އަދަދު ވަނީ ގިނަވެފައެވެ. އެކި މީހުންނަށް އެކި އަނިޔާތައް ލިބި، އުޅަނދުފަހަރަށް ވެސް ވަނީ ވަރަށް ބޮޑެތި ގެއްލުންތައް ވެފައެވެ.

އެ މުއްދަތުގައި ހިނގި އެކްސިޑެންޓްގެ 86 ކޭސް ރިޕޯޓު ކޮށްފައި ވާއިރު، އެއީ މާލޭގައި ހިނގި 48 އެކްސިޑެންޓާއި ހުޅުމާލޭގައި ހިނގި 38 އެކްސިޑެންޓެވެ. އެކްސިޑެންޓްތައް އެންމެ ގިނައިން ހިނގާފައި ހުރީ ހަވީރު ވަގުތުއެވެ. ބްރިޖް އަދި ހައިވޭ އެކްސިޑެންޓްގެ ނުވަ މައްސަލަ ވެސް ޕޮލިހަށް ރިޕޯޓުކޮށްފައިވެ އެވެ.