އެމެރިކާގެ ސަރުކާރުގެ އިސް އޮފިޝަލަކު ސީއެންއެންއަށް ބުނިގޮތުގައި 2022 ވަނަ އަހަރު ރަޝިޔާއިން ނިއުކްލިއާ ހަމަލާއެއް ދިނުމަށް ހުރަސް އެޅުމުގެ ގޮތުން އެމެރިކާއިން އެހީއަށް އެދުނީ އެމެރިކާއާ އެންމެ ގާތް (އެލައިސް) ގައުމުތަކުން ނޫން ކަމަށެވެ.

"އަޅުގަނޑުމެން ކުރި އެއްކަމަކީ ހަމައެކަނި ސީދާ މެސެޖެއް ނޫން ނަމަވެސް ވަރަށް ބޮޑަށް އިލްތިމާސް ކުރުން، ޕްރެސް ކުރުން، އެހެން ގައުމުތަކަށް ހިތްވަރު ދިނުން، އެމީހުން ބުނާ ގޮތް ރަޝިޔާ ހަދާފާނެ" އެމީހުން ބުނެފައިވެ އެވެ.

އޮފިޝަލް ވިދާޅުވީ އެމީހުންގެ އެސެސްމަންޓަކީ އިންޑިއާ، ޗައިނާ އަދި އެހެނިހެން ގައުމުތަކުގެ އިންޕުޓުން ރަޝިޔާގެ ވިސްނުމަށް "ކޮންމެވެސް އަސަރެއް ކޮށްފާނެ" ކަމަށެވެ.

ޕޫޓިން ނިއުކްލިއާ ހަތިޔާރު ބޭނުން ކޮށްފާނެ ކަމުގެ ކަންބޮޑުވުންތައް 2022 ވަނަ އަހަރު ފެތުރިގެން ދިޔައީ ރަޝިޔާގެ ސިފައިންނަށް ސިލްސިލާ ބަލިތަކަކާ ކުރިމަތިލާން ޖެހުމާއި ޔޫކްރޭނުން ޔޫކްރޭންގެ ދެކުނުގެ އަގުހުރި ސިޓީއެއް ކަމަށްވާ ޚެރްސަންއާ ދެކޮޅަށް ކައުންޓަރ އޮފެންސިވް ފެށުމެވެ.

"ރަޝިޔާގެ ގިނަ އަދަދެއްގެ ބާރުތައް ފުނޑުފުނޑުކޮށްލި ނަމަ - އެމީހުންގެ ފުރާނަ އެގޮތަށް ފުނޑުފުނޑުވެގެން ދިޔަ ނަމަ - އެއީ ސީދާ ރަޝިޔާގެ ސަރަހައްދަށް ނުވަތަ ރަޝިޔާގެ ދައުލަތަށް ކުރިމަތިވެދާނެ ނުރައްކަލެއްގެ ވައްތަރެއް،" އިސް އޮފިޝަލުންގެ ތެރެއިން އެކަކު ބުންޏެވެ.

އަދި ބައިޑަންގެ ސަރުކާރު ބިރުގަތީ، ޔޫކްރޭން އަތުން އަތުލައިގަތް ޚެރްސަން އަކީ ޚުދު ރަޝިޔާގެ ބައެއްގެ ގޮތުގައި ޕޫޓިން ދެކޭތީ، އިތުރު ގެއްލުންތަކުން ސަލާމަތްވުމަށް ނިއުކްލިއާ ހަތިޔާރު ބޭނުން ކުރަން ޖެހިދާނެތީ އެވެ.

2022 ވަނަ އަހަރުގެ އޮކްޓޯބަރު މަހު ރަޝިޔާގެ ޕްރޮޕެގެންޑިސްޓުން ޔޫކްރޭނުން ޔުރޭނިއަމްއާ އާންމު ގޮވާތަކެތިން ހަދާފައިވާ "ޑާޓީ ބޮމެއް" ބޭނުން ކުރަން ރާވާފައިވާ ކަމަށް ބުނާ ވާހަކަތައް ދައުރުކުރަން ފެށި އެވެ.

އެކަމަކު ރަޝިޔާއިން އެ ވާހަކަތައް ދައްކަނީ "އެމީހުން މޮޔަ ކަމެއް ކުރުމަށް ބަހަނާއެއްގެ ގޮތުގައި ނުވަތަ އަމިއްލައަށް ކުރަން ބަލަމުންދާ ކަމެއްގެ ކަވަރެއްގެ ގޮތުގައި" ކަމަށް އެމެރިކާގެ އޮފިޝަލުން ބުންޏެވެ.

އިންސްޓިޓިއުޓް ފޯ ދަ ސްޓަޑީ އޮފް ވާރ ތިންކް ޓެންކުން އޭރު ބުނީ މި ފިޔަވަޅަކީ "ހުޅަނގުގެ އަސްކަރީ އެހީ ލަސްކުރުމަށް ނުވަތަ ސަސްޕެންޑް ކުރުމަށް މަސައްކަތް ކުރި ކަމެއް ކަމަށް ބެލެވޭ" ކަމަށެވެ.

އެހެންނަމަވެސް، އެއް އޮފިޝަލަކު ވިދާޅުވީ، "ރިސްކް ލެވެލް ކުރިން އޮތް ހިސާބަށް ވުރެ މައްޗަށް ދިޔަ" ކަމަށެވެ.

އަވަށްޓެރި ބެލަރޫސްއަށް ރަޝިޔާއިން ނިއުކްލިއާ ހަތިޔާރު ބަދަލުކުރި ޚަބަރާއި ގުޅިގެން ރަޝިޔާގެ ނިއުކްލިއާ ނުރައްކާ "ހަގީގީ" ގޮތުގައި ދެމިއޮތް ކަމަށް 2023 ވަނަ އަހަރުގެ ޖޫން މަހު ރައީސް ޖޯ ބައިޑަން ވިދާޅުވެފައިވެ އެވެ.

މިދިޔަ މަހު ޕޫޓިން މިހާތަނަށް ދެއްވި އެންމެ ސާފު ނިއުކްލިއާ އިންޒާރުތައް ދެއްވީ ފްރާންސްގެ ރައީސް އިމަނުއެލް މެކްރޮން ޔޫކްރޭނަށް އެހީތެރިވުމަށް ނޭޓޯއިން ސިފައިން ފޮނުވޭނެ ކަމަށް ލަފާ ދެއްވުމުންނެވެ.

"(ހުޅަނގުގެ ގައުމުތަކަށް) އެ ގައުމުތަކުގެ ސަރަހައްދުގައި އަމާޒުތަކަށް ހަމަލާދޭ ހަތިޔާރުތައް ވެސް އަޅުގަނޑުމެންގެ އަތުގައި ހުރިކަން ވިސްނަން ޖެހޭނެ،" ޕޫޓިން ވިދާޅުވި އެވެ.