ޣައްޒާގެ އައްސޭރީގައި ވަގުތީ ބަނދަރެއް ހަދަން ބޭނުންވާ ސާމާނު ހިފައިގެން ކަމަށް ބުނެ އެމެރިކާގެ އަސްކަރީ މަނަވަރެއް މެދުއިރުމައްޗާ ދިމާއަށް ދަތުރުކުރަމުންދާކަމަށް އެމެރިކާއިން ބުނެފިއެވެ.

ސަޕޯޓް ޝިޕް، ޖެނެރަލް ފްރެންކް އެސް ބެސަން، ވާޖިނިއާ ސްޓޭޓްގެ އަސްކަރީ މަރުކަޒަކުން ހޮނިހިރު ދުވަހު ވަނީ ފުރައިފަ އެވެ.

އެއީ ކަނޑުމަގުން ޣައްޒާއަށް އެހީ ފޯރުކޮށްދިނުމަށް އެހީތެރިވުމަށް އެމެރިކާއިން ފްލޯޓިން ހާބަރު އަޅާނެ ކަމަށް ރައީސް ޖޯ ބައިޑަން ވިދާޅުވެފައިވަނިކޮށެވެ.

އ.ދ. އިން ބުނެފައިވަނީ ޣައްޒާ ބަނޑަށް ޖެހުން ވަނީ "ދާދި ގާތުގައި" ކަމަށާއި ކުޑަކުދިން ބަނޑަށްޖެހި މަރުވަމުންދާ ކަމަށެވެ.

ބިމާއި ވައިގެ މަގުން އެހީ ފޯރުކޮށްދިނުމަކީ އުނދަގޫ އަދި ނުރައްކާތެރި ކަމެއްކަން ވަނީ ސާބިތުވެފައެވެ.

އެމެރިކާގެ ބޯޓު ފުރައިގެން ދިޔައީ ބައިޑަން އިއުލާން ކުރެއްވިތާ "36 ގަޑިއިރު ވެސް ނުވަނީސް" ކަމަށް އެމެރިކާގެ ސެންޓްރަލް ކޮމާންޑުން އެކްސްގައި ލިޔެފައިވެ އެވެ.

އެއީ "އިންސާނީ މުހިއްމު ތަކެތި ފޯރުކޮށްދިނުމަށް ވަގުތީ ބަނދަރެއް ގާއިމް ކުރުމަށް ގެންދެވޭ ފުރަތަމަ ޝިޕްމަންޓް" ކަމަށް ބަޔާނުގައި ބުނެފައިވެއެވެ.

ޕެންޓަގަން އިން ބުނެފައި ވަނީ 1،000 ސިފައިންގެ އެހީގައި ބަނދަރު އަޅަން 60 ދުވަހުގެ މުއްދަތެއް ނަގާފާނެ ކަމަށާ އޭގެ ތެރެއިން އެއްވެސް ސިފައިންގެ މީހެއް އެއްގަމަށް ނުވަންނާނެ ކަމަށެވެ.

ޗެރިޓީތަކުން ބުނެފައިވަނީ ޣައްޒާގައި ތަހައްމަލު ކުރަމުންދާ މީހުންނަށް އެހާ ގިނައިރު މަޑުނުކުރެވޭނެ ކަމަށެވެ.

މީގެ އިތުރުން ހުކުރު ދުވަހުގެ ހެނދުނު ސައިޕްރަސްގެ ބަނދަރަކުން ފުރަން ކްލިއަރެންސް އަށް ގާތްގަނޑަކަށް 200 ޓަނުގެ ކާބޯތަކެތި އުފުލާ އެހީގެ ބޯޓެއް މަޑުކޮށްގެން އޮތެވެ.

ޔޫރަޕިއަން ޔޫނިއަނުން ކަނޑުމަގުގެ އާ ރޫޓެއް ހުޅުވުމާއެކު އުންމީދު ކުރެވެނީ އޯޕަން އާމްސް ބޯޓު ހޯމަ ދުވަހުގެ ކުރިން ފުރާނެ ކަމަށެވެ.

މި ބޯޓަކީ ހަމަ އެ ނަމުގައި ހަރަކާތްތެރިވާ ސްޕެއިންގެ ޗެރިޓީއެއް ކަމަށްވާ އޯޕަން އާމްސް އަށް ނިސްބަތްވާ ބޯޓެކެވެ. އެ ބޯޓުގައި ހުރި ކާބޯތަކެތި ފޯރުކޮށްދީފައި ވަނީ އެމެރިކާގެ ޗެރިޓީ ވޯލްޑް ސެންޓްރަލް ކިޗަން އިންނެވެ.

އެމެރިކާގެ ބަނދަރު ހެދުމުގެ ކުރިން ކަނޑުގެ މަގުން ފޯރުކޮށްދޭ އެއްވެސް އެހީއެއް ރައްކާތެރިކަމާއެކު އެއްގަމަށް އަރާނެ ގޮތެއް ސާފެއް ނުވެ އެވެ. ޣައްޒާގައި ޙަރަކާތްތެރި ބަނދަރެއް ނެތުމުން، ބޮޑެތި ބޯޓުތަކަށް ބަނދަރު ކުރެވޭނެ ގޮތެއް ނެތެވެ.

އެހެންނަމަވެސް އޯޕަން އާމްސްގެ ބާނީ އޮސްކާ ކެމްޕްސް އެސޯސިއޭޓެޑް ޕްރެސްއަށް ވިދާޅުވީ މި ބޯޓުގެ މަންޒިލް ޕޮއިންޓްގައި - މިއީ އަދިވެސް ސިއްރެއް - ވޯލްޑް ސެންޓްރަލް ކިޗަންގެ ޓީމަކުން އެ އެހީ ބޭލުމަށް ބަނދަރެއް ހަދަމުން އަންނަ ކަމަށެވެ.

ކަނޑުގެ އިސްނެގުމަށް އިސްރާއީލުން މަރުހަބާ ކިޔާފައިވާއިރު، އެހީ ފޯރުކޮށްދޭނީ ސައިޕްރަސްގައި "އިސްރާއީލުގެ މިންގަނޑުތަކާ އެއްގޮތަށް" ސަލާމަތީ ޗެކްތައް ކުރިއަށް ގެންދިއުމަށް ފަހު ކަމަށް ބުނެފައިވެ އެވެ.