އިންޑޮނޭޝިއާގެ ސިވިލް އޭވިއޭޝަން ޑިރެކްޓަރު ޖެނެރަލް އެމް ކްރިސްޓީ އެންޑާ މުރްނީއާ ހަވާލާދީ ނޫސް އެޖެންސީ އަންތާރާ އިން ބުނީ ދާދި ފަހުން ކުރި ފްލައިޓެއްގައި ބާޓިކް އެއާގެ ދެ ޕައިލެޓުންނަށް ނިދި ޖެހުނު ހާދިސާ އިންޑޮނޭޝިއާގެ ޓްރާންސްޕޯޓް މިނިސްޓްރީން ތަހުގީގު ފަށާނެ ކަމަށެވެ.

ނޭޝަނަލް ޓްރާންސްޕޯޓޭޝަން ސޭފްޓީ ކޮމިޓީ (ކޭއެންކޭޓީ) އިން ހޮނިހިރު ދުވަހު އާންމުކުރި އިބްތިދާއީ ރިޕޯޓެއްގައިވާ ގޮތުން ޖެނުއަރީ 25 ވަނަ ދުވަހު އިރުދެކުނު ސުލާވޭސީ ޕްރޮވިންސްގެ ކެންޑަރީ އިން ވެރިރަށް ޖަކާޓާއަށް ދަތުރުކުރި ފްލައިޓެއްގައި ޕައިލެޓާއި ކޯ ޕައިލެޓް ވެސް އެއްފަހަރާ 28 މިނެޓް ވަންދެން ނިދާފައިވެ އެވެ. އެހެން ކަމުން އެ މަތިންދާބޯޓު އުދުހެމުން ދިޔައީ ކަނޑައެޅިފައިވާ ވައިގެ މަގަކުން ނޫނެވެ.

ބޯޓުގައި ތިބި އެއްވެސް މީހަކަށް، އޭގެ ތެރޭގައި 153 ފަސިންޖަރުންނާއި ހަތަރު ފްލައިޓް އެޓެންޑެންޓުން ހިމެނޭ ގޮތަށް އަނިޔާއެއް ނުވާ ކަމަށާއި، މަތިންދާބޯޓަށް އެއްވެސް ގެއްލުމެއް ލިބިފައި ނުވާ ކަމަށް ކޭއެންކޭޓީގެ ޕްރިލިމިނަރީ ރިޕޯޓުގައިވެ އެވެ.

ބީޓީކޭ6723 ނަމަކަށް ކިޔާ މި ފްލައިޓަކީ ދެ ގަޑިއިރާއި 35 މިނެޓަށް ދެމިގެން ދިޔަ ފްލައިޓެއް ކަމަށާއި، ކާމިޔާބުކަމާއެކު ޖަކާޓާއަށް ޖައްސާފައިވާ ކަމަށް ރިޕޯޓުގައިވެ އެވެ.

އެ ރިޕޯޓުގައިވާ ގޮތުން ސެކަންޑް އިން ކޮމާންޑް ޕައިލެޓް ވަނީ އޭނާގެ ކޯ ޕައިލެޓަށް "ރަނގަޅަށް ނިދި" ނުލިބޭ ކަމަށް ކުރިން އަންގާފަ އެވެ.

އެ ހާދިސާގެ ކުރިން ފްލައިޓުގައި ސެކަންޑް އިން ކޮމާންޑަށް ނިދާލެވުނީ "ގާތްގަނޑަކަށް 30 މިނެޓް" އަށެވެ. ކެންޑަރީ އިން ފުރައި ކްރޫޒިން އުސްމިނަށް ދިޔަ ފަހުން ކޮމާންޑް ޕައިލެޓް އަރާމު ކުރުމުގެ ހުއްދައަށް އެދުމުން ސެކަންޑް އިން ކޮމާންޑް ވަނީ އެ މަތިންދާބޯޓާ ހަވާލުވެފަ އެވެ. ދަތުރަށް ގާތްގަނޑަކަށް 90 މިނެޓް ފަހުން ސެކަންޑް އިން ކޮމާންޑް ބޭއިޚްތިޔާރުގަައި ނިދި ޖެހުނު ކަމަށްވެސް ރިޕޯޓުގައި ވެއެވެ.

ކޯ ޕައިލެޓުން އެންމެ ފަހުން ރެކޯޑްކުރި ޓްރާންސްމިޝަން އަށް ފަހު ބާރަ މިނެޓް ފަހުން ޖަކާޓާ އޭރިއާ ކޮންޓްރޯލް ސެންޓަރު (އޭސީސީ) އިން މަތިންދާބޯޓާ ހަމައަށް ވާސިލްވާން މަސައްކަތް ކުރި ނަމަވެސް ޕައިލެޓުންގެ ފަރާތުން ޖަވާބެއް ނުލިބުނު ކަމަށް ވެސް އެ ކުންފުނިން ބުނެ އެވެ. އެންމެ ފަހުން ރެކޯޑްކުރި ޓްރާންސްމިޝަން އަށް ގާތްގަނޑަކަށް 28 މިނެޓް ފަހުން ޕައިލެޓް އިން ކޮމާންޑަށް ހޭލެވުނު އިރު ބޯޓު އޮތީ ރަނގަޅު ފްލައިޓް މަގުގައި ނޫންކަން އެނގުނެވެ. އެ ހިސާބުން އޭނާ ވަނީ ސެކަންޑް އިން ކޮމާންޑް ހޭލައްވައި އޭސީސީއާ މުވާސަލާތު ކޮށްފައިވާ ކަމަށް ވެސް އޭސީސީން ބުނެ އެވެ.

އިބްތިދާއީ ރިޕޯޓުގައި ތަފްސީލުކޮށްފައިވާ ގޮތުގައި ޕައިލެޓް އިން ކޮމާންޑް އޭސީސީއަށް ބުނީ ފްލައިޓުގައި "ރޭޑިއޯ ކޮމިއުނިކޭޝަން މައްސަލައެއް" ދިމާވެފައިވާ ކަމަށާއި އެ މައްސަލަ ހައްލުވެފައިވާ ކަމަށެވެ.

އެ ރިޕޯޓުގައި ޕައިލެޓުންގެ ނަން ހާމަކޮށްފައި ނުވި ނަމަވެސް ޕައިލެޓް އިން ކޮމާންޑަކީ އުމުރުން 32 އަހަރުގެ އިންޑޮނޭޝިއާ ފިރިހެނެއް ކަމަށާއި ދެވަނަ އިން ކޮމާންޑް އަކީ އުމުރުން 28 އަހަރުގެ އިންޑޮނޭޝިއާ ފިރިހެނެއް ކަމަށް ބުނެފައިވެ އެވެ. ސެކަންޑް އިން ކޮމާންޑުގެ އެއް މަހުގެ ޓްވިންސް ކުދިން ތިބި ކަމަށާއި "އަނބިމީހާއަށް ތުއްތު ކުދިން ބަލަހައްޓަން އެހީތެރިވުމަށް އެތައް ފަހަރަކު ހޭލަން ޖެހުނު" ކަމަށް ރިޕޯޓުގައިވެ އެވެ.

ބީޓީކޭ6723 ގެ ފްލައިޓް ކްރޫތައް ވެސް ސްޓޭންޑަޑް އޮޕަރޭޓިން ޕްރޮސީޖާއާ އެއްގޮތަށް ވަނީ ތަހުގީގު ނިމެންދެން ގްރައުންޑް ކޮށްފައެވެ.