ވެރިކަން ދެމެހެއްޓުމުގެ ބޭނުމުގައި ގައުމު އިސްތިގުލާލު ނުރައްކަލަށް ހުށަހެޅުމުގެ ފުރުސަތު އެބައޮތް ކަމަށް ގައުމީ މޭޔަރަލް ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޒަރިޔަންދު ވިދާޅުވީ، ސަރުކާރުން ސިޔާސީ ބާރުވެރިކަން ހޯދުމަށް ދައުލަތުން ހިންގަމުންދާ ޖަރީމާތަކުގެ ފުރިހަމަ ޒިންމާ ސަރުކާރުން ނަގަން ޖެހޭނެ ކަމަށާ ދައުލަތުގެ މާލީކަންކަމުގައި ތަކުރާރުކޮށް އިހުމާލުވެ، ބޭރުފައިސާގެ އަގު އިންތިހާއަށް އުފުލި، ބޭނުންކުރެވޭ ރިޒާރވްގައި މަދު ޑޮލަރު ކޮޅެއް ބަހައްޓައިގެން އުޅުމުގެ ޒިންމާ ނަގަންޖެހޭނީ ސަރުކާރުން ކަމަށެވެ.
މި ވަގުތު ދުނިޔޭގައި ފަށާފައިވާ ހަނގުރާމަ އިތުރު 4 ހަފްތާއަށް ދެމިގެން ގޮސްފިނަމަ ނަތީޖާ ނުކުމެދާނެ ކަމަށް ލަފާކުރެވޭ ގޮތްވެސް ޒަރިޔަންދު ހިއްސާކުރައްވާފައިވެއެވެ. އެގޮތުން ތެޔޮ ފީފާ އެއްގެ އަގު މިވަގުތު 79 ޑޮލަރ ހުރި ނަމަވެސް ހަނގުރާމަ ދެމިގެން ގޮސްފިނަމަ 130 ޑޮލަރަށްވުރެ މައްޗަށް އުފުލި، ކައްކާގޭސް ލިބުން ދަތިވެ، ފަތުރުވެރިން އައުން މަދުވެ، އަސާސީ މުދަލުގެ އިމްޕޯޓަށް ބޭނުންވާ މިންވަރަށް ބޭރު ފައިސާ ނެތިދާނޭ ކަމުގެ ކަންބޮޑުވުން އޮތް ކަމަށް ޒަރިޔަންދު ފާހަގަކުރައްވާފައެވެ.
މީގެ އިތުރުން އެ ކަންބޮޑުވުން އެހެން އޮއްވާ އެޕްރިލް 2026 ގައި ދަރަނި އަދާކުރަން ދައްކަންޖެހޭ 630 މިލިޔަން ޑޮލަރު އޮތްއިރު، ކާބޯތަކެއްޗާއި ތެލާއި ބޭސް އިމްޕޯޓު ކުރާނީތޯ ނުވަތަ ދަރަނި ދައްކާނީތޯ ވިސްނަންޖެހޭ ހާލަތަށް ދާންޖެހިދާނެ ކަމަށްވެސް ޒަރިޔަންދު ވަނީ ވިދާޅުވެފައެވެ. އަދި މި ހަނގުރާމަ ދިގުލައި ދިއުމުން ދުނިޔޭގެ އެހެނިހެން ޤައުމުތަކަށް ދިމާވާ އިޤްތިޞާދީ އުނދަގުލާއި، ރާއްޖޭގެ މޫޑީޒް ރޭޓިންގ އޮތް ގޮތުން ދަރަނި ދޭފަރާތްތަކުން އިތުރު ދަރަނި ދިނުމަށް ފަސްޖެހި އިންޓަރެސްޓްރޭޓް މަތިކުރާއިރު، މި ރާއްޖޭގެ ތާރީޚުގައިވެސް ނުދާ ފަދަ ދަށު ދަރަޖައަކަށް އޯގަސްޓް 2026ގެ ކުރިން ރާއްޖޭގެ މާލީ ހާލަތު ވެއްޓި، ވެރިކަން ދެމެހެއްޓުމުގެ ނިޔަތުގައި ބޭރުގެ އިސްތިޢުމާރީ ނުފޫޒުތަކަށް ދީލާލަން ޖެހި، ރާއްޖޭގެ އިސްތިޤުލާލު ނުރައްކަލުގެ ތެރެއަށް ވެއްޓުމުގެ ފުރުސަތު އޮތްކަމަށް ޤަބޫލުކުރެވޭ ކަމަށް ވެސް ޒަރިޔަންދު ވަނީ ވިދާޅުވެފައެވެ.
ޒަރިޔަންދު މިފަދައިން ވިދާޅުވެފައިވާއިރު ރާއްޖެއަކީ އިމްޕޯޓަށް ވަރަށް ބޮޑަށް ބަރޯސާވެފައި އޮތް ގައުމަކަށްވާއިރު މެދު އިރުމަތީގެ ހަނގުރާމައާ ގުޅިގެން ރާއްޖެއަށް މާލީ ގޮތުންނާ އަދި ތަކެތީގެ ގޮތުންވެސް ގޮން ޖެހުންތައް ކުރިމަތިވެދާނެ ކަމުގެ ބިރު އޮތް ކަމަށް މުހައްލިލުން ބުނަމުން ދެއެވެ.
