އޭނާ ގަބޫލުކުރާ ކަންކަމަށް ޒާތީ ނުވަތަ ސިޔާސީ ފައިދާއަކަށް ކޮމްޕްރޮމައިޒް ނުވާނެ ކަމަށް މާލެ ސިޓީގެ މޭޔަރު ކަމަށް ނުކުންނަވާ ގައުމީ ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.
ޒަރިޔަންދު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
މެދު އިރުމަތީގައި ބޮޑު ހަނގުރާމައެއް ފެށި އިސްލާމީ އުއްމަތުގެ ވަރުގަދަ ލީޑަރު ޝަހީދުވެގެން ގޮސް މުސްލިމުންތަކަކަށް އެތައް އަނިޔާއެއް ލިބެމުންދާ ދަނޑިވަޅެއްގައި ޒަރިޔަންދު ވަނީ މާނަފުން ބަސްތަކެއް އޭނާގެ ސޯޝަލް މީޑިޔާއަށް ދޫކުރައްވާފައެވެ.
ޒަރިޔަންދު ވަނީ އޭނާ ވާހަކަދައްކަނީ اللهގެ ބާރާއި ރަޙްމަތްފުޅަށް ފުންކޮށް އީމާންވާ މުސްލިމެއްގެ ގޮތުގައި ކަމަށް ވިދާޅުވެފައެވެ. އޭނާ ދެމިހުންނާނީ މުސްލިމުންނާއެކު ކޮޅަށް ކަމަށާ އެގޮތަށް ހުރުމަކީ، އޭނާއަށް ވިސްނޭ ގޮތުގައި، ސިޔާސީ ކަމެއް ނުވަތަ ފައިދާއެއް ނޫން ކަމަށްވެސް ވިދާޅުވެފައެވެ. އެއީ ޟަމީރާއި އީމާންތެރިކަމާ ގުޅޭ ކަމެއްގެ ގޮތުގައި ސިފަކުރައްވާ ޒަރިޔަންދު ވަނީ އޭނާގެ ވިސްނުންތައް ބައްޓަން ކުރެވެނީ އެއްވެސް ސަރުކާރެއްގެ ބާރާއި، މުއްސަނދިކަމާއި، ހެޔޮއެދުންތަކެއް ހޯދުމުން ނޫން ކަމަށާއި، އޭނާ އަސްލު ގަބޫލުކުރާ ކަންކަމަށް އޭނާގެ ޒާތީ ނުވަތަ ސިޔާސީ ފައިދާއަކަށް ކޮމްޕްރޮމައިޒް ނުވާނެ ކަމަށް ވެސް ވަނީ ވިދާޅުވެފައެވެ.
ޒަރިޔަންދު މިފަދައިން ވިދާޅުވެފައިވާއިރު މެދުއިރުމަތީގެ ހަނގުރާމައިގައި އިރާނަށް ދެމުންދާ ހަމަލާތައް ކުށްވެރިކޮށް ރާއްޖޭގެ ސަރުކާރުން ބަހެއް ނުބުނެ އޮތްއޮތުން ދިވެހި އެތައް ރައްޔިތުން ދަނީ ކުށްވެރިކުރަމުންނެވެ. ސުންނީނާ ޝީއިންގެ މެދުގައި ތަފާޓުކުރުން ބާއވްައިގެން ނުވާނެ ކަމަށްވެސް ދަނީ ބުނަމުންނެވެ.
