ރައްޔިތުންގެ މިއަދުގެ މަޖިލީހަކީ ތާކުން ތާކު ނުޖެހޭ މުކައްބަ މަޖިލީހެއްގެ ގޮތުގައި ޕީއެންއެފްގެ ރައީސް، ރައީސް އަބްދުﷲ ޔާމީން ސިފަކުރައްވައިފިއެވެ.
ރައީސް ޔާމީން މިފަދައިން ވިދާޅުވެފައިވަނީ، މާލޭގެ މޭޔަރުކަމަށް ވާދަކުރައްވާ ގައުމީ މޭޔަރަލް ކެންޑިޑޭޓު އިސްމާއިލް ޒަރިޔަންދުގެ ކެމްޕެއިން ހަރަކާތެއްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
ރައީސް ޔާމީން ވިދާޅުވީ، ސިޔާސީ މީހުން އެކި އެކި ވާހަކަ ދައްކާނެ ކަމަށާ އެގޮތުން ފައިސާ ފޮތީގެ ދެ ފުށުގައި އޮންނަ ވާހަކަ ތަފާތު ކަމަށެވެ. އެގޮތުން ސިޔާސީ މީހުން ބުނަމުންދާނީ ރައްޔިތުންނަށް ހުރިހާ ލުއި ފަސޭހައެއް ކޮށްދެނީ އެމީހުން ކަމަށެވެ. ނަމަވެސް ރައްޔިތުން ބުނަމުންދާނީ ހުރިހާ ތަކުލީފެއް ޖެހެމުންދަނީ ހަމަ އެ ސިޔާސީ މީހުންގެ ސަބަބުން ކަމަށް ވެސް ރައީސް ޔާމީން ވިދާޅުވިއެވެ.
އެމަނިކުފާނު ވިދާޅުވީ މިއަދު އޮތް ރައްޔިތުންގެ މަޖިލީހަކީ އެފަދަ މަޖިލީހެއް ކަަމަށާ ނަމުން ރައްޔިތުންނަށް ފައިދާކުރާ ނަމަވެސް ކަމުން ސަރުކާރުގެ ޖަރީމާތަކުގައި މަތި އަޅާ ފޮރުވަން އޮތް ތާކުން ތާކު ނުޖެހޭ މަޖިލީހެއްގެ ގޮތުގައި މިއަދުގެ ރައްޔިތުންގެ މަޖިލިސް ރައީސް ޔާމީން ވަނީ ސިފަކުރައްވާފައެވެ.
ރައީސް ޔާމީން ވިދާޅުވީ އެހެންކަމުން މާލޭގެ މޭޔަރު ކަމަށް ބޭނުންވަނީ ސިޔާސީ ފިކުރުން އެއްކިބާވެ ސިޔާސީ ލީޑަރަކަށް ބޯނުލަނބާނެ ކޮރަޕްޝަނުން އެއްކިބާވެ ހުރި މޭޔަރެއް ކަމަށާ އެމަނިކުފާނު ޒަރިޔަންދު ޚިޔާރު ކުރި އެ ސަބަބަށްޓަކައި ކަމަށެވެ.
