ތެލުގެ އަގު މައްޗަށް ދަނީ ވެރިންގެ ސިކުނޑީގައި ތެތްކަން ނެތީމުން ކަމަށް ގައުމީ ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.
ޒަރިޔަންދު މިފަދައިން ވިދާޅުވެފައިވަނީ ކެމްޕެއިން ހަރަކާތެއްގައި ވާހަކަ ދައްކަވަމުންނެވެ.
ޒަރިޔަންދު ވިދާޅުވީ ތެޔޮ ގެންނަން ޖެހޭ ތަންވެސް ވެރިންނަށް ނޭނގޭ ކަމަށާ ދިވެހި ދައުލަތުން އަހަރެއްގެ މައްޗަށް 500 މިލިއަން ޑޮލަރު އިމްޕޯޓަށް ޚަރަދުކުރާއިރު، މި މަހު އެކަނިވެސް އިތުރަށް 6 މިލިއަން ޑޮލަރު އިމްޕޯޓަށް ޚަރަދު ކުރަން ޖެހޭ ކަމަށެވެ. އެހެންކަމުން ތެލުގެ އަގާ އެކު އެހެނިހެން ތަކެތީގެ އަގުވެސް އާންމު ދިރިއުޅުމުގައި މަތިވާނެ ކަމަށާ ކުރިއަށް އޮތް ދުވަސްތަކުގައި 120 ޑޮލަރަށް ފީފާއެއް ޖެހި ދިވެހިންނަށް ތެޔޮ ލިބުން ދަތިވާނެ ކަމަށެވެ.
މިހުރިހާކަމެއް ދިމާވަނީ ދުނިޔޭގައި ކުރަމުންދާ ހަނގުރާމައެއްގެ ސަބަބުން ކަމަށާ، އެއީ ދިވެހިންގެ ވެރިންގެ ސިކުނޑީގައި ތެތްކަން ނެތް ކަމަށެވެ.
ޒަރިޔަންދު ވިދާޅުވީ، ވެރިންނާ މާލީ ކަންކަން ރާވާ ފަރާތްތަކުން ވެސް ތެޔޮ ގެންނަންވީ ތަނާ ގެންނަން ޖެހޭ ފަރާތާ، ގެންނަން ހަދަން ޖެހޭ ގޮތްވެސް ނޭނގޭ ކަމަށާ ރާއްޖޭގެ ރިޒާވުގައި ބަހައްޓަން ޖެހޭ އަދަދުވެސް ވެރިންނަށް ނޭނގޭ ކަމަށްވެސް އޭނާ ވިދާޅުވިއެވެ.
ޒަރިޔަންދު ވިދާޅުވީ ސަރުކާރު ދަނީ ރައްޔިތުން ގޮވައިގެން އަޑިއަށް ކަމަށެވެ.
