ސަރުކާރެއްގެ މިހާ ކުރި ކޮޅު ރިފަރަންޑަމް ވޯޓެއް ނަގަން އުޅުމަކީ ކަންބޮޑުވުންތަކެއް ހުރިކަމެއް ކަމަށް މާލޭގެ މޭޔަރު ކަމަށް ނުކުންނަވާ ގައުމީ ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.
ޒަރިޔަންދު މިފަދައިން ވިދާޅުވީ ޓޯކު ވިތު ޒަރިޔަންދުގެ ނަމުގައި ކުރިއަށް ގެންދާ ޕޮޑްކާސްޓުގައި ވާހަަކަ ދައްކަވަމުންނެވެ.
އެގޮތުން ޒަރިޔަންދު ވިދާޅުވި ގޮތުގައި، ރެފަރަންޑަމް ނަގަން އުޅުމުގައި ސަރުކާރުގެ ނިޔަތާ މެދު ސުވާލު އުފެދޭ ކަމަށެވެ. ދެ އަހަރާ ބައި ވެގެން ސަރުކާރަށް ދިޔައިރު ރައީސްކަމުގައި ހުންނަވާ ޑރ މުހައްމަދު މުއިއްޒު ވަނީ ގާނޫނުއަސާސީއަށް ގިނަ އިސްލާހުތަކެއް ގެންނަވާ ތިންބާރުވެސް އަތަށް ނަންގަވާފައި ކަމަށާ އެހެންކަމުން މިހާރު އަނެއްކާ ދެ އިންތިހާބު އެއްކޮށްލައިގެން ކުރަން އުޅޭ ކަމަކާ ގުޅޭ ގޮތުން ބޮޑެތި ސުވާލުތައް އުފެދޭ ކަމަށް ޒަރިޔަންދު ވިދާޅުވިއެވެ.
އެއީ ރައްޔިތުންވެސް ވިސްނަން ޖެހޭ ކަމެއްކަން ފާހަގަކުރައްވާ ޒަރިޔަންދު ވިދާޅުވީ، މިހާ އަވަހަށް ރިފަރަންޑަމް އައުމަކީ ކަންބޮޑުވުން އުފެދޭ ކަމެއް ކަމަށެވެ.
ޒަރިޔަންދު ވަނީ މިހާރުވެސް ގައުމުގައި އޮތް ޖަވާބުދާރީ ކުރުވުމުގެ ނިޒާމު ގޯސްކަން ފާހަގަކުރައްވާ، ދިވެހިރާއްޖޭގައި ރަނގަޅު ޖަވާބުދާރީ ކުރެވޭނެ ނިޒާމެއް އޮންނަ ނަމަ މިރާއްޖެ މިހާ ބޮޑު ދަރަނިވެރިކަމެއްގެ ތެރެއަކަށް ނުދާނެ ކަމަށް ވިދާޅުވެފައެވެ.
