އިންޑިއާގެ އުތުރު އިރުމަތީ ސަރަހައްދުތަކުން އިޒްރޭލުގެ "ސަންސް އޮފް މަނާސެހް" ދަރިކޮޅަށް ނިސްބަތްވާ ކަމަށް ބުނާ 4،600 އެއްހާ މީހުން ހިމެނޭ ފުރަތަމަ ގުރޫޕު، ފަލަސްތީނުގެ ބިންތަކުގައި ވަޒަންވެރިވުމަށް އިޒްރޭލަށް ގެންގޮސްފިއެވެ. މި މީހުންނަކީ ޔަހޫދީންގެ ގެއްލިފައިވާ ދަރިކޮޅަކަށް ނިސްބަތްވާ ބައެއް ކަމަށް ދައުވާކޮށް، އިޒްރޭލުގެ ހަރުކަށި ސިޔާސަތުތަކުގެ ދަށުން ގެންދާ ބައެކެވެ.
މި މީހުން ވަޒަންވެރިކުރުވުމަށް ހަމަޖެހިފައިވަނީ ބައިނަލްއަގުވާމީ ގާނޫނުތަކާ ހިލާފަށް އިޒްރޭލުން ހިފާފައިވާ ފަލަސްތީނުގެ ބިންތަކުގައެވެ. މިއީ ފަލަސްތީނުގެ އަސްލު ވަޒަންވެރިން އެ ބިންތަކުން ބޭރުކޮށް، އެ ސަރަހައްދުތަކުގެ އާބާދީގެ ނިސްބަތް ބަދަލުކުރުމަށް އިޒްރޭލުން ރާވައިގެން ހިންގާ ބޮޑު މަޝްރޫއެއްގެ ބައެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
މި ހަރަކާތަކީ ފަލަސްތީނުގެ ރައްޔިތުން އެއްކޮށް ނައްތާލުމަށް އިޒްރޭލުން ކުރަމުންދާ ހަނގުރާމައިގެ ނުސީދާ ބައެއްގެ ގޮތުގައި ގިނަ ބަޔަކު ސިފަކުރެއެވެ. "މިއީ ހަމައެކަނި ދީނީ ކަމެއް ނޫން، މިއީ ފަލަސްތީނުގެ ބިންތައް ފޭރިގަނެ، އެ ގައުމުގެ ދަރިފަސްކޮޅު ނައްތާލުމަށް ހިންގާ ނަސްލީ ތަފާތުކުރުމުގެ އަމަލެއް،" ކަމަށް އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނެއެވެ.
އިންޑިއާގެ މަނީޕޫރު އަދި މިޒޯރާމް ފަދަ ސަރަހައްދުތަކުން ގެންދާ މި މީހުންނަށް އިޒްރޭލުގެ ރައްޔިތުކަން ދީ، ހަތިޔާރު އެޅި ވަޒަންވެރިންގެ ގޮތުގައި ފަލަސްތީނުގެ އަވަށްތަކާ އިންވެގެން އާބާދުކުރުމަކީ އެ ސަރަހައްދުގެ ނުތަނަވަސްކަން އިތުރަށް ބޮޑުވެގެންދާނެ ކަމެކެވެ. މިކަމުގެ ސަބަބުން ފަލަސްތީނުގެ ރައްޔިތުންނަށް ކުރިމަތިވަމުންދާ އަނިޔާވެރިކަން އިތުރުވެ، އެމީހުންގެ އަމިއްލަ ވަޒަނުން ބޭރުކުރުމުގެ މަސައްކަތް ހަލުވިވެގެންދާނެއެވެ.
އިޒްރޭލުގެ މި ނިންމުމާ ގުޅިގެން ބައިނަލްއަގުވާމީ މުޖުތަމައުން ކަންބޮޑުވުން ފާޅުކުރަމުންދާއިރު، މިއީ ފަލަސްތީނުގެ މައްސަލައަށް އޮތް ދެ ދައުލަތުގެ ހައްލު މުޅިން ނައްތާލުމަށް ކުރެވޭ މަސައްކަތެއްގެ ގޮތުގައިވެސް ވަނީ ބެލެވިފައެވެ.
