އިންޑިއާގެ އާންމު އިންތިހާބު އޭޕްރީލް މަހާއި މެއި މަހުގެ ތެރޭގައި ހަތް މަރުހަލާއަކަށް ބަހާލައިގެން ބާއްވާނެ ކަމަށް އިލެކްޝަންސް ކޮމިޝަނުން ބުނެފި އެވެ.

ނޫސްވެރިންގެ ބައްދަލުވުމުގައި ޗީފް އިލެކްޝަންސް ކޮމިޝަނަރު ރާޖީވް ކުމާރު ވިދާޅުވީ ނަތީޖާ އިއުލާން ކުރާނީ ޖޫން މަހުގެ 4 ވަނަ ދުވަހު ކަމަށެވެ.

ގާތްގަނޑަކަށް 968 މިލިއަން މީހުންގެ ވޯޓުލުމުގެ ހައްގު ލިބިފައިވާ އިންޑިއާގެ އިންތިހާބު ވެގެންދާނީ ދުނިޔެއަށް ފެންނަ އެންމެ ބޮޑު އިންތިހާބަށެވެ.

ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އާއި އެ ޕާޓީގެ އެކުވެރިންނަށް އިންތިޚާބުގައި ކާމިޔާބީ ލިބޭނެ ކަމަށް އޮޕިނިއަން ޕޯލްތަކުން ވަނީ ލަފާކޮށްފަ އެވެ.

މި އިންތިޚާބުގައި ބީޖޭޕީއާ ދެކޮޅަށް ނުކުތުމަށް ކޮންގްރެސް ހިމެނޭ ގޮތަށް ވިއްސަށް ވުރެ ގިނަ އިދިކޮޅު ޕާޓީތަކުން ވަނީ ކޯލިޝަން ބްލޮކެއް - އިންޑިއަން ނޭޝަނަލް ޑިވެލޮޕްމަންޓަލް އިންކްލޫސިވް އެލަޔަންސް ނުވަތަ އިންޑިއާގެ ނަމުގައި - އުފައްދާފަ އެވެ.

އިންޑިއާގެ ގާނޫނު ހަދާ ތިރި ގޭގައި އިންތިހާބީ 543 ގޮނޑި ހުރިއިރު ކޮންމެ ޕާޓީއަކަށް ނުވަތަ ކޯލިޝަނަކަށް ސަރުކާރެއް އެކުލަވާލުމަށް މަދުވެގެން 272 މެމްބަރުން ބޭނުންވެ އެވެ.

މޯދީ އިސްކޮށް ހުންނަވައިގެން ބީޖޭޕީން ވަނީ 2019 ވަނަ އަހަރުގެ އިންތިޚާބުގައި 543 ގޮނޑީގެ ތެރެއިން 303 ގޮނޑި ކާމިޔާބުކޮށްފައެވެ. މިއަހަރު އެ ޕާޓީގެ އަމާޒަކީ މަދުވެގެން 370 ގޮނޑި ކާމިޔާބު ކުރުން ކަމަށް އެ ޕާޓީން ބުނެ އެވެ.

ބައެއް ސްޓޭޓްތަކުގައި ވޯޓުލުން ބާއްވާނީ އެތައް މަރުހަލާތަކަކަށް ބަހާލައިގެންނެވެ.

ވޯޓުލުން، 19 އޭޕްރީލް އިން ފެށިގެން 1 ޖޫން އަށް ނިމޭނެ ކަމަށް ކުމާރު ވިދާޅުވި އެވެ.

"އަޅުގަނޑުމެން ޑިމޮކްރަސީ ގައުމުގެ ކޮންމެ ކަންމައްޗަކަށް ގެންދާނަން،" އޭނާ ވިދާޅުވި އެވެ.

"އަޅުގަނޑުމެން... ދުނިޔޭގެ ޑިމޮކްރަސީގެ ބިއްލޫރިގަނޑެއްގެ ގޮތުގައި ދެމިތިބޭ ގޮތަށް ގައުމީ އިންތިޚާބެއް ކުރިއަށް ގެންދިއުމަކީ އަޅުގަނޑުމެންގެ ވައުދެކެވެ."

ގާތްގަނޑަކަށް 968 މިލިއަން މީހުންނަށް - 2019 ވަނަ އަހަރުގެ އިންތިހާބަށް ވުރެ 150 މިލިއަން އިތުރު - ވޯޓުލުމުގެ ހައްގު ލިބިގެންވެ އެވެ.

"އިންތިހާބީ ލިސްޓުގައި 26 މިލިއަނަށް ވުރެ ގިނަ އާ ވޯޓަރުން ހިމެނިފައިވާއިރު، އޭގެ ތެރެއިން ގާތްގަނޑަކަށް 14 މިލިއަނަކީ އަންހެނުން، އެއީ އަލަށް ނަންނޯޓްކުރި ފިރިހެނުންނަށް ވުރެ %15 އަށް ވުރެ މަތީ އަދަދެއް،" އިލެކްޝަންސް ކޮމިޝަނުން ބުންޏެވެ.

އިލެކްޓްރޯނިކް ވޯޓިން މެޝިންތައް ބޭނުންކުރާއިރު، އޭގެ ތެރޭގައި ނަން އޮފް ދަ އަބަވް (ނޯޓާ) ބަޓަން ހިމެނޭނެ އެވެ.