2019 ވަނަ އަހަރު ޑިމޮކްރަސީއަށް ތާއީދުކުރާ މުޒާހަރާތަކުގައި ހޮންކޮންގުގެ ގާނޫނު ހަދާ މަޖިލީހަށް ވަން ހާދިސާގައި ހިމެނޭ މީހުންގެ މައްޗަށް ކޯޓުން ހަތަރު އަހަރާ ހަތް އަހަރާ ދެމެދުގެ ޖަލު ހުކުމެއް އިއްވައިފި އެވެ.

އެ އަހަރުގެ ޖުލައި މަހުގެ އެއްވަނަ ދުވަހު ލެޖިސްލޭޓިވް ކައުންސިލްގެ އިމާރާތަށް ވަދެ، ޗެމްބަރުގައި ގްރެފިޓީ ޖަހައި، ސަރުކާރުގެ ނިޝާން ފުނޑުފުނޑުކޮށްލީ، ގިނަ ބަޔަކު ދެކޮޅުހަދަމުން ދިޔަ އެކްސްޓްރެޑިޝަން ބިލާ ދެކޮޅަށް ކުރަމުން ދިޔަ މުޒާހަރާއެއްގައެވެ.

ކުށަށް އިއުތިރާފުވެފައިވާ ސިޔާސީ އެކްޓިވިސްޓުން ކަމަށްވާ ވެންޓަސް ލައު އާއި އޮވެން ޗޯ އަށް 54 މަހާއި 20 ދުވަހުގެ މުއްދަތާއި 61 މަހާއި 15 ދުވަހުގެ މުއްދަތެއް އިއްވާފައިވެ އެވެ.

ޔުނިވާސިޓީ އޮފް ހޮންކޮންގްގެ ސްޓޫޑެންޓް ޔޫނިއަންގެ ކުރީގެ ރައީސް އަލްތީއާ ސުއެންއަށް ވެސް ވަނީ ހަތަރު އަހަރާއި ނުވަ މަސް ދުވަހުގެ ޖަލު ހުކުމެއް އިއްވާފަ އެވެ.

12 މީހުންނަށް ދައުވާ އުފުލި ނަމަވެސް ހަމަނުޖެހުން ހިންގުމުގެ ކުށް ސާބިތު ނުވާ ކުރީގެ ދެ ރިޕޯޓަރަކު ޖޫރިމަނާކޮށްފައި ވަނީ "ގާނޫނު ހަދާ މަޖިލީހުގެ ޗެމްބަރަށް ވަދެ ނުވަތަ މަޑުކޮށްގެން" ކަމަށެވެ.

މި ހާދިސާއަކީ ގާނޫނީ ވެރިކަމަށް ލިބުނު "ސީރިއަސް" ގެއްލުމެއްގެ ގޮތުގައި ލީ ސިފަކުރެއްވި އެވެ.

އެކްޓިވިސްޓުން ވަނީ ހުކުމް އިއްވުމުގެ ކުރިން އެމީހުންގެ އަމަލުތައް ދިފާއުކޮށްފަ އެވެ.

"މުޒާހަރާގެ ބައިވެރިން ކުރި ހަގީގީ ޖަރީމާއަކީ... ޑިމޮކްރަސީއާއި ވިސްނުމުގެ މިނިވަންކަމާއި އިޚްތިޔާރުގެ މިނިވަންކަން ހޯދުން،" ސުއެން ކޯޓުގައި ވިދާޅުވި އެވެ.

މީގެ އިތުރުން މަދަނީ ހައްގުތަކާ ބެހޭ ލީޑަރު މާޓިން ލުތަރ ކިންގް ޖޫނިއާއާ ހަވާލާދީ އެ ހަމަނުޖެހުންތަކަކީ "އަޑުއިވިފައި ނުވާ މީހުންގެ ބަސް" ކަމަށް ޗޯ ވިދާޅުވި އެވެ.