ރަޝިޔާގެ ރިޔާސީ އިންތިހާބުގައި ވޯޓުލުމުގެ އެންމެ ފަހު ދުވަހު ވޯޓުލާ މަރުކަޒުތަކުގައި ހިމޭން މުޒާހަރާތައް ކޮށްފިއެވެ.

ރަޝިޔާގެ ބައެއް ވޯޓު ފޮށިތަކުގެ ލައިންތައް ކުއްލިއަކަށް ބޮޑުވީ އަވަހާރަވެފައިވާ ރަޝިޔާގެ ނުފޫޒުގަދަ އިދިކޮޅު ލީޑަރު އެލެކްސީ ނަވަލްނީގެ ސަޕޯޓަރުން އާދީއްތަ ދުވަހުގެ މެންދުރު 12 ޖަހާ އިރު ވޯޓުލާ މަރުކަޒުތަކަށް ޖަމާވުމަށް ގޮވާލުމުންނެވެ.

މޮސްކޯގެ ވޯޓުލާ މަރުކަޒުގައި ތިބި ސީއެންއެންގެ ޓީމަކުން ބުނީ މެންދުރު 12 ޖަހައި ފަސް މިނެޓާއި ދިހަ މިނެޓުގެ ތެރޭގައި ލައިން ހަލުވިކަމާއެކު އިތުރުވެފައިވާ ކަމަށާއި، ލަފާކުރެވޭ ގޮތުގައި 150 މީހުން އައިސްފައިވާ ކަމަށެވެ.

ސީއެންއެންގެ ޓީމުން ބުނީ ފުލުހުން ބެޗްތަކަކަށް ބަހާލައިގެން ގޭޓްތަކުން މީހުން ވައްދާ ކަމަށާ، އިމާރާތުގެ ތެރޭގައި މެޓަލް ޑިޓެކްޓަރުތަކާއި ކޮތަޅުތައް ޗެކް ކުރަމުންދާ ކަމަށެވެ.

ސީއެންއެންގެ ޓީމުން އިންޓަވިއު ކުރި އަންހެނަކު ބުނީ، "މިއީ އަހަރެންގެ ހަޔާތުގައި އިންތިހާބުގައި ކިޔުއެއް ފެނުނު ފުރަތަމަ ފަހަރު" ކަމަށެވެ. އެގަޑީގައި އައީ ކީއްވެތޯ ސުވާލު ކުރުމުން ޖަވާބު ދިނީ: "އެނގޭނެ ކީއްވެކަން. އަހަރެންނަށް ހީވަނީ މި ކިއުގައި ތިބި އެންމެންނަށްވެސް އެނގޭނެހެން."

ރޮއިޓާސް އާއި އޭއެފްޕީގެ ނޫސް އެޖެންސީތަކުން ވެސް މުޒާހަރާތައް ހިނގަމުންދާ ކަމަށް ރިޕޯޓްކޮށްފައިވެ އެވެ.

ނަވަލްނީގެ ސަޕޯޓަރުން ސޯޝަލް މީޑިއާ ޗެނަލްތަކުން ވަނީ މޮސްކޯގެ ނެކްރަސޮވްކާ ފަދަ އަވަށްތަކާއި ޓްސަރވްކާޔާ ސްޓްރީޓް އަދި ސެއިންޓް ޕީޓާސްބާގްގެ ލޮކޭޝަންތައް ހިމެނޭ ގޮތަށް ބައެއް ތަންތަނުގައި ލައިންތަކުގެ ވީޑިއޯ ކްލިޕްތައް ދައްކާފައެވެ. ނަވަލްނީ ޓީމުން ވަނީ ނޮވޮސިބިރްސްކް ސިޓީގެ ތަސްވީރެއް ވެސް ޕޯސްޓްކޮށް، ކެޕްޝަންގައި ލިޔެފައި ވަނީ "މިއަދަކީ #މެންދުރެވެ. މި މުޒާހަރާ މީގެ ކުރިން ވަނީ ސައިބީރިއާގެ ސިޓީތަކުގައި ވެސް ކުރިއަށް ގެންގޮސްފައެވެ. އަހަރެމެން މިތިބީ ކަލޭމެންނާ ބައްދަލުކުރަން ކެތްމަދުވެފައި."

ނަވަލްނީގެ ސަޕޯޓަރުން ވަނީ ހުކުރު ދުވަހު އޭނާގެ ގަބުރުގެ ވަށައިގެން އެއްވެ އިހުތިރާމް އަދާކޮށްފަ އެވެ. ވީޑިއޯއިން ފެންނަ ގޮތުގައި މޮސްކޯގެ ބޮރިސޮވްސްކީ ސަހަރާގައި ގަބުރުގެ ވަށައިގެން ދިހަވަރަކަށް މީހުން އެއްވެފައި ތިބިއިރު، ބައެއް މީހުން މާ އަޅާއިރު އަނެއް ބަޔަކު ހިމޭންކަމާއެކު ފޮޓޯ ނަގަ އެވެ.

ވޯޓުލާ މަރުކަޒުތަކުގައި މުޒާހަރާ ކުރުމަށް ނަވަލްނީގެ ސަޕޯޓަރުން ގޮވާލުމުން ގައުމުން ބޭރުގައި ތިބި ރަޝިޔާ މީހުން ވެސް ވަނީ ބާލިން އާއި ލަންޑަނުގައި ހުރި ރަޝިޔާގެ އެމްބަސީތަކުގެ ބޭރުގައި ދިގު ލައިންތަކެއް ހަދައިފަ އެވެ.

މީގެ އިތުރުން ނަވަލްނީގެ އަންހެނުން ޔޫލިއާ ނަވަލްނާޔާ އާދީއްތަ ދުވަހު ބާލިންގައި ޕޫޓިންއާ ދެކޮޅަށް އެއްވެ ތިބި ސަޕޯޓަރުންނާ ސަލާމް ކޮށް ފޮޓޯ ނަގާފައިވެ އެވެ.

މި މަހުގެ ކުރީކޮޅު ޔޫލިއާ ގޮވާލެއްވީ އެއްފަހަރާ މަރުކަޒުތަކަށް ހާޒިރުވެ، ޕޫޓިންއާ ދެކޮޅަށް ވޯޓު ދިނުމަށާއި، ވޯޓު ކަރުދާހުގައި "ނަވަލްނީ" ލިޔުމަށާއި، ވޯޓު ކަރުދާސް ބާތިލް ކުރުމަށް ނުވަތަ ހަމައެކަނި ހިމޭން މުޒާހަރާއެއްގައި ވޯޓުލާ ސަފު ދޫކޮށް ދިޔުމަށެވެ.

ޔޫޓިއުބްގައި ވާހަކަ ދައްކަވަމުން ނަވަލްނާޔާ ވިދާޅުވީ މުޒާހަރާތައް ކުރާނީ "ހަމައެކަނި ކޮންމެ ސިޓީއެއްގައި ނޫން ކަމަށާއި ކޮންމެ ސިޓީއެއްގެ ކޮންމެ ޑިސްޓްރިކްޓެއްގައި ވެސް އެތައް މިލިއަން ރަޝިޔާ މީހުންނަށް ބައިވެރިވެވޭނެ ކަމަށާއި އިތުރު ދިހަ މިލިއަން މީހުންނަށް އެކަން ފެންނާނެ" ކަމަށެވެ.