އިންޑިއާގެ ބޯޑަރު ސެކިއުރިޓީ ފޯސް (ބީއެސްއެފް) ގެ މައި މަރުކަޒު ގޮއްވާލުމުގެ ފަހަތުގައި ވަނީ ޕާކިސްތާނު ނޫން ކަމަށާއި، އެއީ އިންޑިއާ ސަރުކާރުން ސިޔާސީ ބޭނުމަކަށްޓަކައި ކުރި ކަމެއް ކަމަށް ޕަންޖާބުގެ ޗީފް މިނިސްޓަރު ތުހުމަތު ކުރައްވައިފިއެވެ.
ޗީފް މިނިސްޓަރު ވިދާޅުވި ގޮތުގައި މި ހަމަލާއަކީ ޕަންޖާބުގެ އިންތިހާބު ކާމިޔާބު ކުރުމަށްޓަކައި އިންޑިއާގެ މަރުކަޒީ ސަރުކާރުން ރާވައިގެން ހިންގި އަމަލެކެވެ. އޭނާ ފާހަގަކުރެއްވި ގޮތުގައި މިއީ އިންތިހާބުގެ ދުވަސްވަރު ރައްޔިތުންގެ މެދުގައި ބިރުވެރިކަން އުފައްދައި، ވަކި ސިޔާސީ މަގުސަދެއް ހާސިލްކުރުމަށް ހިންގާފައިވާ އަމަލެކެވެ.
"ބީއެސްއެފްގެ މައި މަރުކަޒު ގޮއްވާލުމަކީ ޕާކިސްތާނުން ކުރި ކަމެއް ނޫން، ނަމަވެސް އެއީ ޕަންޖާބުގެ އިންތިހާބު ކާމިޔާބު ކުރުމަށް އިންޑިއާ ސަރުކާރުން ކުރި ކަމެއް،" ޗީފް މިނިސްޓަރު ވިދާޅުވިއެވެ.
މި ބަޔާނާއެކު އިންޑިއާގެ ސިޔާސީ މަސްރަހުގައި ބޮޑެތި ބަހުސްތަކެއް ވަނީ އުފެދިފައެވެ. ހާއްސަކޮށް ގައުމީ ސަލާމަތާ ގުޅުންހުރި މުއައްސަސާއަކަށް ދެވުނު ހަމަލާއެއްގެ ޒިންމާ ސަރުކާރުގެ ބޮލުގައި އެޅުވުމުން، އިދިކޮޅު ފަރާތްތަކާއި ސަރުކާރާ ދެމެދު ވަނީ ނުތަނަވަސްކަން އިތުރުވެފައެވެ.
މި ހަމަލާއާ ގުޅިގެން މިހާތަނަށް އިންޑިއާގެ މަރުކަޒީ ސަރުކާރުން ރަސްމީކޮށް ވަކި އެއްޗެއް ބުނެފައެއް ނުވެއެވެ. ނަމަވެސް ޕަންޖާބުގެ އިންތިހާބާ ދިމާކޮށް މިފަދަ ބޮޑު ތުހުމަތެއް ކުރެވުމަކީ އިންތިހާބުގެ ނަތީޖާއަށް އަސަރުކޮށްފާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
