މިހާރު ކުރަމުންދާ ވިއްސާރައިގައި މާލެ ފެންބޮޑުވުމާއެކު ސިފައިން ފެން ހިއްކުމުގެ މަސައްކަތް ފަށައިފިއެވެ.

ރާއްޖެއަށް މިހާރު ކުރަމުންދާ ވިއްސާރައަކީ ރާއްޖޭގެ އިރުމަތީގައި އުފެދިފައިވާ ކޮޅިގަނޑު ރާއްޖެ ހުރަސްކޮށް އަރަބިކަނޑަށް ޖެހެމުންދާތީ ކުރަމުންދާ ވިއްސާރައެކެވެ. އެހެންކަމުން ރާއްޖޭގެ އެކިހިސާބަށް ވިއްސާރަކޮށް، ވައިގަދަވެ، ކަނޑުތައް ގަދަވާނެކަމަށް ލަފާކުރެވޭ ކަމަށް މޫސުމާ ބެހޭ ގައުމީ އިދާރާ (މެޓް) އިން ވަނީ ހާމަކޮށްފައެވެ.

ޗެނަލް 13 އަށް މައުލޫމާތު ދެމުން އެމްއެންޑީއެފުން ބުނީ މާލެއަށް ބޯކޮށް ވާރޭ ވެހެމުންދާތީ، ފެން ހިންދުމުގެ މަސައްކަތް އެމްއެންޑީއެފްގެ ފަޔަރ އެންޑް ރެސްކިއު ސާވިސް އިން ފަށާފައިވާ ކަމަށެވެ.

މީގެ ދެތިން ދުވަސް ކުރިންވެސް މާލޭގެ ފެންބޮޑުވެގެން ސިފައިން ވަނީ ފެން ހިންދުމުގެ މަސައްކަތަށް ނުކުމެފައެވެ.

މެޓް އޮފީހުން ރާއްޖޭގެ މޫސުން ގޯސްވެދާނެ ކަމަށް ބަލާފަ ބައެއް ހިސާބުތަަކަށް ވަނީ ރީނދޫ ސަމާލު އަދި ބައެއް ހިސާބުތަކަށް ހުދު ސަމާލު ނެރެފައެވެ.

ރާއްޖޭގެ މޫސުން ކުރިއަށް ލަފާކޮށް މެޓް އޮފީހުން ބުނީ، އެކި ހިސާބަށް ވިއްސާރަކުރާނެ އަދި ބައެއް ރަށްތަކަށް ބޯކާށް ވާރޭވެހި ގުގުރުން އެކަށީގެންވާ ކަމަށެވެ.

އަދި ރާއްޖޭގެ ކަނޑުތައް އާންމު ގޮތެއްގައި ގަދަވާނެ ކަމަށް ލަފާކޮށްފައިވާއިރު،ހުރިހާ ފަރާތްތަކުން، ހާއްސަކޮށް ކަނޑުދަތުރު ކުރަށްވާފަރާތްތަކުން މޫސުމަށް ސަމާލުވުމަށް ވެސް މެޓް އިން ވަނީ އިލްތިމާސްކޮށްފައެވެ.

އަދި ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރާނެކަމަށްވެސް މެޓުން ވަނީ ލަފާކޮށްފައެވެ.