މިދިޔަ އަހަރުގެ ޑިސެމްބަރު މަހު ރާއްޖެއަށް ކުރި ވިއްސާރަގައި ނުވަ ރަށަކުން ގެއްލުން ލިބިގެން ރިޕޯޓްކޮށްފައިވާއިރު، އެ ރަށްތަކުގެ 103 ގެއެއްގެ އެސެސްމެންޓް ހަދާފައިވާ ކަމަށް ނޭޝަނަލް ޑިޒާސްޓަރ މެނޭޖެމެންޓް ސެންޓަރ (އެންޑީއެމްއޭ)އިން ހާމަކޮށްފިއެވެ.

އެންޑީއެމްއޭ އިން ހިއްސާ ކޮށްފައިވާ މައުލޫމާތަށް ބަލާއިރު، ކ. ހިންމަފުށި ތިން ގެއަކާއި، ސ. ފޭދޫ 62 ގެއަކާއި، ކ. ގުރައިދޫން 25 ގެއަކާއި، ސ. މަރަދޫން ދެ ގެއަކާއި، ފުވައްމުލައް ސިޓީން ހަތަރު ގެއަކާއި، ސ. މަރަދޫން ދެ ގެއަކާއި، ޅ. ހިންނަވަރާއި، ލ. މާމެންދޫ އަދި ލ. ގަމުން ގެއަކާއި ބ. ގޮައިދޫން ހަތަރު ގެއަކަށް ގެއްލުން ވެގެން ރިޕޯޓްކޮށް، އެސެސްމެންޓް ހަދާފައި ވެއެވެ.

އެންޑީއެމްއޭ އިން ބުނީ ކާރިސާތަކުގައި އިންސާނީ އެހީދިނުމަށް އަމަލު ކުރާ މިންގަނޑުގެ ތެރެއިން އެހީތެރިކަން ފޯރުކޮށްދެވުނީ ޖުމްލަ 90 ގެއަކަށް ކަމަށެވެ.

އެއީ ޒަރޫރީ ހިފާގެންގުޅޭ ތަކެއްޗަށް ގެއްލުން ލިބުނު 90 ގެއަކާއި، އިމާރާތަށް އެކި ވަރުގެ ގެއްލުން ލިބުނު ދެ ގެއެއް ކަަމަށް އެންޑީއެމްއޭ އިން ވަނީ ބުނެފައެވެ.

މިގޮތުން ޒަރޫރީ ހިފާތަކެއްޗަށާއި، ސްޓްރަކްޗަރަލް ގެއްލުންތަކަށް 1.6 މިލިއަން ރުފިޔާ ގެއްލުން ލިބިފައި ވެއެވެ.

އަދި އެސެސްމެންޓް ހެދުމުން ގެތަކަށް ކާރިސާތަކުގައި އިންސާނީ އެހީދިނުމަށް އަމަލު ކުރާ މިންގަނޑުގެ ތެރެއިން 474،349ރ ފޯރުކޮށްދީފައިވާ ކަަމަށް އެންޑީއެމްއޭ އިން މައުލޫމާތުދީފައިވެއެވެ.

މިހާރު ރާއްޖެއަށް ކުރަމުން އަންނަ ވިއްސާރައިގައި ވަރަށް ގިނަ ރަށްރަށަށް ގެއްލުންވަމުންދާ ކަމަށްވެސް އެންޑީއެމްއޭ އިން ވަނީ ބުނެފައެވެ.