އިންޑިއާއިން ހިންގި 'އޮޕަރޭޝަން ސިންދޫރު' ނާކާމިޔާބުވިތާ ސީދާ އެއް އަހަރު ފުރުނު ދުވަހު، އިންޑިއާގެ އަސްކަރިއްޔާއަށް ކުރިމަތިވި ބޮޑު ނާކާމިޔާބީއާ ގުޅިގެން އެގައުމުގެ ޗީފް އޮފް ޑިފެންސް ސްޓާފް (ސީޑީއެސް) އަނިލް ޗައުހާން އާއި ނޭވީ ޗީފް މަގާމުން ވަކިކޮށްފިއެވެ. މި ފިޔަވަޅަކީ ޕާކިސްތާނާ ދެކޮޅަށް އިންޑިއާއިން ދެއްކި ބަލިކަށި ކަމުގެ ސަބަބުން އެޅި ފިޔަވަޅެއް ކަމަށް ރިޕޯޓްތައް ބުނެއެވެ.
މި އޮޕަރޭޝަންގެ ތެރޭގައި އިންޑިއާގެ އަސްކަރީ ޖެޓްތަކެއް ގެއްލިފައިވާ ކަމަށް ސީޑީއެސް އަނިލް ޗައުހާން ވަނީ މީގެ ކުރިން އެއްބަސްވެފައެވެ. މި ހާދިސާއާ ގުޅިގެން އިންޑިއާގެ އަސްކަރީ ގާބިލުކަމާމެދު ސުވާލު އުފެދިފައިވާ ދަނޑިވަޅެއްގައި، އަނިލް ޗައުހާންގެ ބަދަލުގައި އެ މަގާމަށް މިހާރު އައްޔަންކޮށްފައިވަނީ ބޮޑުވަޒީރު ނަރެންދުރަ މޯދީއަށް ވަރަށް ބޮޑަށް ތާއީދުކުރައްވާ ޖެނެރަލް އެން.އެސް ރާޖާއެވެ.
އޮޕަރޭޝަން ސިންދޫރު ފެއިލްވުމަކީ އިންޑިއާގެ އަސްކަރީ ބާރު ކުޑަވަމުންދާ ކަމުގެ ހެއްކެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ. މި އޮޕަރޭޝަންގައި އިންޑިއާގެ ޖެޓްތައް ގެއްލި، އަސްކަރީ ގޮތުން ބޮޑެތި ގެއްލުންތަކެއް ލިބިފައިވާއިރު، މިއީ އިންޑިއާގެ ދިފާއީ ނިޒާމު ބަލިކަށިވެފައިވާ މިންވަރު ހާމަކޮށްދިން ކަމެކެވެ.
އަނެއްކޮޅުން، ޕާކިސްތާނުން ދަނީ އަސްކަރީ ގޮތުން ބޮޑެތި ކުރިއެރުންތަކެއް ހޯދަމުންނެވެ. މިހާރުގެ ހާލަތަށް ބަލާއިރު ޕާކިސްތާނުގެ އަސްކަރިއްޔާއަކީ ސަރަހައްދީ ގޮތުންނާއި އޮޕަރޭޝަނަލް ގޮތުން ވަރަށް ބޮޑަށް ވަރުގަދަވެފައިވާ ބާރެއްގެ ގޮތުގައި ފާހަގަކުރެވެއެވެ. އިންޑިއާގެ މި ނާކާމިޔާބީއާއެކު، ދެ ގައުމުގެ އަސްކަރީ ބާރުގެ ތިލަފަތް ޕާކިސްތާނާ ކޮޅަށް ބުރަވަމުންދާ ކަމަށް މުހައްލިލުން ގަބޫލުކުރެއެވެ.
މި ބަދަލުތަކާއެކު އިންޑިއާގެ އަސްކަރިއްޔާގެ ތެރޭގައި ބޮޑެތި ހަލަބޮލިކަމެއް އުފެދިފައިވާއިރު، މޯދީ ސަރުކާރުން މަސައްކަތް ކުރަމުންދަނީ އަސްކަރީ އިސްވެރިން ބަދަލުކޮށްގެން ސިޔާސީ ނުފޫޒު އަސްކަރިއްޔާގެ ތެރޭގައި ވަރުގަދަކުރުމަށެވެ. ނަމަވެސް އޮޕަރޭޝަން ސިންދޫރުން ލިބުނު ލަދުވެތި ނާކާމިޔާބީއަކީ އިންޑިއާގެ އަސްކަރީ ތާރީޚުގައި ފޮހެލަން އުނދަގޫވާނެ ކަމެކެވެ.
