ޕާކިސްތާނުގެ ބޮޑުވަޒީރު ޝެހްބާޒް ޝަރީފާއި އެޤައުމުގެ ސިފައިންގެ ވެރިޔާ ޖެނެރަލް އާސިމް މުނީރު ބަންގްލަދޭޝްއަށް ތިން ދުވަހުގެ ރަސްމީ ދަތުރުފުޅެއް ކުރެއްވުމަށް ނިންމަވައިފިއެވެ. މި ދަތުރުފުޅު ކުރިއަށްދާނީ ބަންގްލަދޭޝްގެ ބޮޑުވަޒީރު ތާރިކް ރަހުމާން ޗައިނާއަށް ކުރައްވާ ދަތުރުފުޅަށްފަހުގައެވެ.
މި މުހިންމު ދަތުރުފުޅުގެ ތެރެއިން ޕާކިސްތާނާއި ބަންގްލަދޭޝްއާ ދެމެދު އެކި ދާއިރާތަކުން ގުޅުން ބަދަހިކުރުމުގެ ގޮތުން ބައެއް މުހިންމު އެއްބަސްވުންތަކުގައި ސޮއިކުރުމަށް ވަނީ ހަމަޖެހިފައެވެ. މީގެ އިތުރުން ދެ ޤައުމުގެ ދެމެދުގައިވާ ޚާރިޖީ އަދި އިޤްތިޞާދީ ގުޅުންތައް އައު ހަރުފަތަކަށް ގެންދިއުމަށް މި ދަތުރުފުޅުގައި މަޝްވަރާ ކުރެވޭނެއެވެ.
މި ދަތުރުފުޅުގައި އެންމެ ބޮޑު އިސްކަމެއް ދެވޭނެ އެއް ކަމަކީ ދެ ޤައުމުގެ ދެމެދުގައި ދިފާއީ ގޮތުން އޮންނަ ގުޅުން ވަރުގަދަކުރުމެވެ. އެގޮތުން، ދިފާއީ ދާއިރާއިން ބޮޑު އެއްބާރުލުމެއް ގާއިމުކުރުމުގެ އެއްބަސްވުމެއްގައި ސޮއިކުރުމަށް ވަނީ ހަމަޖެހިފައެވެ.
މި އެއްބަސްވުމުގެ ދަށުން ޕާކިސްތާން ސިފައިންގެ އެހީތެރިކަމާއެކު ބަންގްލަދޭޝް އޯޑަންސް ފެކްޓްރީ (ބީއޯއެފް) ޒަމާނީ ފެންވަރަށް ތަރައްޤީކުރުމަށް ވަނީ ނިންމާފައެވެ. މީގެ ތެރޭގައި ޑްރޯން އާއި މިސައިލް ހިމެނޭ ގޮތަށް، ފަންނީ ގޮތުން ކުރިއަރާފައިވާ އަސްކަރީ ހާޑްވެއާ އުފެއްދުމުގެ މަސައްކަތް ހިމެނެއެވެ.
މި ދަތުރުފުޅަކީ ސަރަޙައްދީ ސަލާމަތާއި ރައްކާތެރިކަން ދެމެހެއްޓުމަށާއި، ދެ ޤައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހިކުރުމަށް އެޅޭ މުހިންމު ފިޔަވަޅެއްގެ ގޮތުގައި މަސްރަޙު ދިރާސާކުރާ ފަރާތްތަކުން ދެކެއެވެ.
