ހައްދުފަހަނައެޅި އިސްރާއީލުގެ އަސްކަރިއްޔާއިން ހޯމަ ދުވަހު ވަނީ ޣައްޒާ ސިޓީގެ އައް ޝިފާ ހޮސްޕިޓަލުގައި ހިޔާވަހިކަން ހޯދާފައިވާ ފަލަސްތީނުގެ ރައްޔިތުން އެތަނުން ނިކުތުމަށް އަންގާފައެވެ.

"ކަލޭމެންގެ ސަލާމަތަށްޓަކައި ވަގުތުން ހުޅަނގަށް އޮންނަ ސަރަހައްދު ދޫކޮށްލުމަށްފަހު ... އަލް މަވާސީގެ އިންސާނީ ސަރަހައްދަށް ދާންވީ،" އިސްރާއީލް ޑިފެންސް ފޯސަސް (އައިޑީއެފް) ގެ ތަރުޖަމާނަކު ހޯމަ ދުވަހު އެކްސްގައި އަރަބި ބަހުން ލިޔެފައިވެއެވެ.

މި އެންގުން އަމާޒުކޮށްފައިވަނީ ޣައްޒާ ސިޓީގެ ރިމާލް އަވަށާއި އައް ޝިފާ ހޮސްޕިޓަލުގެ ތެރޭގައި ތިބި އެންމެންނަށެވެ. އިސްރާއީލުން ވަނީ އެ މެސެޖު ހިމެނޭ ފްލައިއާތައް އެ ސަރަހައްދުގެ މައްޗަށް ވައްޓާލާފައެވެ.

"ޝިފާ ހޮސްޕިޓަލް ސަރަހައްދުގައި" "ސީދާ އޮޕަރޭޝަނެއް" ހިންގަމުން އަންނަ ކަމަށް އިސްރާއީލުގެ ޑިފެންސް ފޯސަސް (އައިޑީއެފް) އިން ހޯމަ ދުވަހުގެ ހެނދުނު ޓެލެގްރާމް ޕޯސްޓެއްގައި ބުނެފައިވެއެވެ.

އައިޑީއެފް އިން ބުނީ ޖާސޫސީ މައުލޫމާތުތަކުން ދައްކާ ގޮތުގައި ހަމާސްގެ އިސް މެމްބަރުން ދަނީ ވަރަށް ބޮޑަށް ހަލާކުވެފައިވާ ހޮސްޕިޓަލް "ޓެރަރިސްޓް ހަރަކާތްތައް ހިންގުމާއި ޕްރޮމޯޓް ކުރުމަށް" ބޭނުން ކުރަމުން ކަމަށެވެ.

އައިޑީއެފް އިން އިތުރަށް ބުނީ އޮޕަރޭޝަން ފެށުމުގެ ކުރިން "ފަރުވާތެރިކަމާއެކު އޮޕަރޭޓް ކުރުމުގެ މުހިންމުކަމުގެ އިތުރުން ބަލިމީހުންނާއި އާންމުންނާއި މެޑިކަލް ސްޓާފުންނާއި މެޑިކަލް އިކުއިޕްމަންޓްތަކަށް ގެއްލުން ނުދިނުމަށް އަޅަންޖެހޭ ފިޔަވަޅުތައް" އަޅަން ސިފައިންނަށް އަންގާފައިވާ ކަމަށެވެ.

އައިޑީއެފްގެ ތަރުޖަމާނު ޑެނިއަލް ހަގާރީ ނެރުނު ކުރު ބަޔާނެއްގައި ބުނީ އެ އޮޕަރޭޝަން ހިންގީ "ވަގުތުން ފިޔަވަޅު އަޅަން ޖެހޭ ކޮންކްރީޓް އިންޓެލިޖެންސެއްގެ ސަބަބުން" ކަމަށެވެ.

"އަޅުގަނޑުމެންނަށް އެނގޭ ހަމާސްގެ އިސް ޓެރަރިސްޓުން ޝިފާ ހޮސްޕިޓަލްގެ ތެރޭގައި އަލުން ގުރޫޕްވެ، އިސްރާއީލަށް ހަމަލާތައް ދިނުމަށް އަމުރު ކުރުމަށް އެ ހޮސްޕިޓަލް ބޭނުން ކުރަމުންދާކަން،" ހަގާރީ އިތުރަށް ބުންޏެވެ.

އިސްރާއީލުގެ އަސްކަރިއްޔާއިން ބުނީ "ބައިނަލްއަގްވާމީ ގާނޫނުތަކާ އެއްގޮތަށް އަދި ހޮސްޕިޓަލްތަކާއި ސިވިލް އިންފްރާސްޓްރަކްޗާއިން ނިޒާމީ އަދި ސިނިކަލް ގޮތެއްގައި ހިންގާ ހަމާސްގެ ޓެރަރިސްޓް ޖަމިއްޔާއާ ދެކޮޅަށް އަމަލު ކުރަމުން ގެންދާނެ" ކަމަށެވެ.

އިސްރާއީލުން މީގެ ކުރިންވެސް ވަނީ ޝިފާ ހޮސްޕިޓަލް އަޑީގެ ބިންގަރާހުގައި ހަމާސްގެ ކޮމާންޑް ސެންޓަރެއް ހުރި ކަމަށް ބުނެ އެ ހޮސްޕިޓަލަށް ހަމަލާދީފައެވެ. ނަމަވެސް ހައްދުފަހަނައެޅި އިސްރާއީލަށް އެކަމުގެ އެއްވެސް ހެއްކެއް ނުދެއްކުނެވެ.