ހައްދުފަހަނައެޅި އިސްރާއީލުގެ އަސްކަރިއްޔާއިން ބުނީ "ޓެރަރިސްޓް ހަރަކާތްތައް ހުއްޓުވުމަށް" ހިންގި އޮޕަރޭޝަނެއްގައި ޣައްޒާ ސިޓީގެ އަލް ޝިފާ ހޮސްޕިޓަލުގެ ކޮންޓްރޯލް ހޯދާފައިވާ ކަމަށް ހާމަކޮށްފިއެވެ.

އެގޮތުން 80 މީހުން ހައްޔަރުކޮށް އިތުރު ބަޔަކު މަރުވެފައިވާ ކަމަށާއި އޭގެ ތެރޭގައި ހަމާސްގެ އެތެރޭގެ ސަލާމަތީ ހިދުމަތުގެ އިސް ކޮމާންޑަރެއް ހިމެނޭ ކަމަށް ބުނެފައިވެ އެވެ.

މަންޒަރު ދުށް މީހުން ސިފަކޮށްފައިވާ ގޮތުގައި އެ ސަރަހައްދުގެ ވަށައިގެން ބޮޑެތި ހަމަލާ ބަދަލުކުރުންތައް ހިނގާފައިވާއިރު، އެ ހޮސްޕިޓަލުގައި އެތައް ހާސް ގެދޮރު ގެއްލިފައިވާ މީހުން ހިޔާވަހިކަން ހޯދަމުންދެ އެވެ.

ޣައްޒާގެ ހެލްތު މިނިސްޓްރީން ބުނެފައިވަނީ އިސްރާއީލުން ހިންގަނީ ހަނގުރާމައިގެ ޖަރީމާއެއް ކަމަށެވެ.

ދޮގު ހަދާ އޮޅުވާލުމުގެ ތާރީޚެއް އޮތް އިސްރާއީލުގެ އަސްކަރިއްޔާއިން ބުނެފައިވަނީ މެޑިކަލް ސްޓާފުން ނުވަތަ ބަލިމީހުން ފުރައިގެން ދިއުމުގެ އެއްވެސް ހުރަހެއް ނެތް ކަމަށާއި، ހޮސްޕިޓަލުގެ މުހިންމު މަސައްކަތްތައް ކުރިއަށް ގެންދެވޭނެ ކަމަށެވެ.

އެކަމަކު ހޮސްޕިޓަލުގެ ތެރޭގައި ތިބި ބައެއް މެޑިކަލް ސްޓާފުން ބީބީސީއަށް ބުނީ ކަރަންޓް ކަނޑާލާފައިވާ ކަމަށާއި އެމީހުންނަށް އިސްރާއީލުގެ އަސްކަރިއްޔާއިން ހަރަކާތްތެރި ނުވުމަށް އަންގާފައިވާ ކަމަށާއި ބަލިމީހުންނަށް ރަނގަޅަށް ފަރުވާ ދިނުން މަނާކޮށްފައިވާ ކަމަށެވެ.

"އަޅުގަނޑުމެން މިތިބީ ޑިޕާޓްމަންޓުގެ ތެރޭގައި ތާށިވެފައި،" ސާޖިކަލް ރެޒިޑެންޓެއް ކަމަށްވާ އުމުރުން 31 އަހަރުގެ ޑރ އަމަރު ޖެޑްބެ ވިދާޅުވި އެވެ.

"އަޅުގަނޑުމެންގެ އިމާރާތުގެ ފުރަތަމަ ފަންގިފިލާގައި އާޓިލަރީ ޝެލްއެއް ޖެހި، އެތައް ބަޔަކު ޒަހަމްވި. އެކަކު މަރުވި - އަޅުގަނޑުމެންނަށް އޭނާ ސަލާމަތް ނުކުރެވުނު. އަޅުގަނޑުމެން މަސައްކަތް ކުރަނީ ހަމައެކަނި ފަސްޓް އެއިޑް އާއި އެކު، ކަރަންޓާއި ފެން ނެތުމުން އޮޕަރޭޓް ނުކުރެވޭ."

ޑރ ޖެޑްބެ ވިދާޅުވީ އެއް އިމާރާތެއްގައި ހުންނަ އިންޓެންސިވް ކެއާ ޔުނިޓުގައި ލައިފް ސަޕޯޓްގައި ތިބި ދެ ބަލިމީހަކު މަރުވެފައި ވަނީ ރޭޑްގެ ކުރިން ކަރަންޓް ކަނޑާލުމުން ކަމަށެވެ. "ހުރިހާ މެޝިނަރީއެއް ނިއްވާލާފައި،" އޭނާ އިތުރަށް ވިދާޅުވި އެވެ.

"މައި އިމާރާތުގައި ތިބި ސްޓާފުން ބުނަނީ އެތަނުގައި ޒަހަމްވި އެތައް ބަޔަކު ސާޖަރީ ކުރަން ޖެހޭ ކަމަށާއި އެކަމަކު އަޅުގަނޑުމެންނަށް އެމީހުންނާ ހަމައަށް ނުދެވޭ ކަމަށާއި އެމީހުންނަށް ބަލިމީހުން އަޅުގަނޑުމެންނާ ހަމައަށް ނުގެނެވޭނެ ކަމަށް."

އަމިއްލަ ސަލާމަތަށްޓަކައި ވަގުތުން ފުރައި، ދެކުނުގެ ރަފާ ސިޓީ ކައިރީގައި އޮންނަ އަލް މަވާސީގައި ހުންނަ "އިންސާނީ ސަރަހައްދަށް" ދެކުނަށް ދިއުމަށް އިސްރާއީލު އަސްކަރިއްޔާއިން ވަނީ ވަށައިގެންވާ ސަރަހައްދުގައި ދިރިއުޅޭ އާންމުންނަށް އަންގާފައެވެ.

ހަމާސްއާ ދެކޮޅަށް ކުރާ ފަސްމަސް ދުވަސްވީ ހަނގުރާމައިގައި އިސްރާއީލުގެ ސިފައިން ކުރިން ޣައްޒާގެ ސިއްހީ މަރުކަޒުތަކަށް - އަލް ޝިފާ ހިމެނޭ ގޮތަށް - ދިން ހަމަލާތަކަށް ވަރަށް ބޮޑަށް ފާޑުކިޔުން އަމާޒުވެފައިވެ އެވެ.

ޣައްޒާގައި 31،700 އަށް ވުރެ ގިނަ މީހުން ޝަހީދުވެފައިވާއިރު، އޭގެ ތެރޭގައި ފާއިތުވި 24 ގަޑިއިރުގެ ތެރޭގައި 81 މީހުން ޝަހީދުވެފައިވާ ކަމަށް ހެލްތު މިނިސްޓްރީން ބުނެ އެވެ.