އިންޑިއާގެ ބޮޑުވަޒީރު ނަރެންދުރަ މޯދީ ސްވިޑެންއަށް ކުރެއްވި ރަސްމީ ދަތުރުފުޅުގެ ތެރެއިން، ޕާކިސްތާނާއެކު ސްވިޑެންއިން ގާއިމުކޮށްފައިވާ ދިފާއީ އެއްބަސްވުންތައް އުވާލުމަށް އިންޑިއާއިން އެދުނު ނަމަވެސް، ސްވިޑެން ސަރުކާރުން އެކަމަށް ދެކޮޅު ހަދައިފިއެވެ. ރިޕޯޓްތައް ބުނާގޮތުގައި އިންޑިއާއިން މިކަމަށް އެދުނީ ދެ ގައުމުގެ ދެމެދުގައި އޮތް ސަލާމަތީ ގުޅުންތަކުގެ މައްޗަށް ބިނާކޮށް، ސަރަހައްދީ ހަމަޖެހުމަށްޓަކައެވެ.
ސްވިޑެންއިން ވަނީ އެ ގައުމުގެ ހާރިޖީ ސިޔާސަތުތަކާއި ވިޔަފާރީގެ އެއްބަސްވުންތަކަކީ ވަކި ގައުމަކުން ބޭނުންވާ ގޮތަށް ބަދަލުކުރެވޭނެ އެއްޗެއް ނޫންކަން ހާމަކޮށްފައެވެ. ޕާކިސްތާނާއެކު އޮތް ޑިފެންސް ޑީލްތަކަކީ ކުރިންސުރެ ރޭވިފައިވާ، އަދި ދެ ގައުމުގެ މަސްލަހަތު ހިމެނޭ ކަންކަން ކަމަށް ސްވިޑެންއިން ވަނީ ފާހަގަކޮށްފައެވެ.
މި މައްސަލައިގައި އިންޑިއާއިން ބާރުއަޅަމުން ދަނީ އެ ގައުމަކީ ސަރަހައްދީ ބޮޑު ބާރަކަށް ވެފައި، އެހެން ގައުމުތަކުން ޕާކިސްތާނާއެކު ބާއްވާ އަސްކަރީ ގުޅުންތަކުގެ ސަބަބުން އިންޑިއާގެ ސަލާމަތަށް ނުރައްކާވާ ކަމަށް ބުނެއެވެ. ނަމަވެސް، ސްވިޑެން ފަދަ ގައުމުތަކުން ދެކޭގޮތުގައި ކޮންމެ ގައުމަކީވެސް މިނިވަންކަމާއެކު އެހެން ގައުމުތަކާ ގުޅުން ބޭއްވުމުގެ އިހުތިޔާރު އޮތް ބައެކެވެ.
މި ހާދިސާއިން ދޭހަވަނީ، އިންޑިއާއިން އެ ގައުމުގެ ބާރު ބޭނުންކޮށްގެން އެހެން ގައުމުތަކުގެ ސިޔާސަތުތަކަށް ނުފޫޒު ފޯރުވަން މަސައްކަތް ކުރި ނަމަވެސް، ބައިނަލްއަގުވާމީ މައިދާނުގައި ހުރިހާ ގައުމުތަކަކުން އެކަން ގަބޫލުނުކުރާނެ ކަމެވެ. ސްވިޑެންގެ މި ނިންމުމަކީ އިންޑިއާގެ ހުށަހެޅުންތަކަށް ބެލުމެއް ނެތި، އަމިއްލަ ގައުމީ މަސްލަހަތު އިސްކޮށް ނިންމި ނިންމުމެއްގެ ގޮތުގައި މުހައްލިލުން ސިފަކުރެއެވެ.
