ރަޝިޔާގެ ރައީސް ވްލަޑިމިއާ ޕޫޓިން ވެރިކަމުގެ ފަސް ވަނަ ދައުރެއް ހޯމަ ދުވަހު ކަށަވަރުކޮށް ރިޔާސީ އިންތިޚާބު ކާމިޔާބު ކުރައްވައިފިއެވެ.

ޕޫޓިން އަށް ލިބިވަޑައިގަތީ %87 ވޯޓު ކަމަށް ރަޝިޔާގެ އިލެކްޝަން ކޮމިޝަނުން ބުނެއެވެ. އޭނާ ހޯމަ ދުވަހުގެ ވަގުތެއްގައި ލިބުނު ކާމިޔާބީ ފާހަގަ ކުރައްވައި ވިދާޅުވީ އެއީ ރަޝިޔާގެ ރައްޔިތުން އޭނާއަށް "އިތުބާރު" ކުރާ ކަމުގެ ހެއްކެއް ކަމަށެވެ.

"ހަމަ ޔަގީނުންވެސް ކުރިއަށް އޮތީ ވަރަށް ގިނަ މަސައްކަތްތަކެއް. އެކަމަކު އަހަރެން ބޭނުންވަނީ އެންމެންނަށް ސާފުކޮށްދޭން: އަހަރެމެން ބިރުގަންނަވާލަން، އަހަރެމެންގެ އިހުތިޔާރާއި އަމިއްލަ ޟަމީރު ފިއްތާލަން އެއްވެސް މީހަކަށް ކާމިޔާބު ނުވި. މާޒީގައި އެމީހުން ނާކާމިޔާބުވި." އަދި ކުރިއަށް އޮތްތަނުގައި ވެސް ނާކާމިޔާބުވާނެ،" އިންތިހާބު ނިމުމުން ޕޫޓިން ވިދާޅުވި އެވެ.

ޕޫޓިންގެ ވެރިކަމުގައި ޔޫކްރޭނަށް އަރައިގަތުމުގެ ތެރޭގައި އިދިކޮޅު އަޑުތައް ފިއްތާލުމުގައި ގިނަ ކާމިޔާބީތަކެއް ހޯދާފައިވެ އެވެ. ޕޫޓިންއާ އެންމެ ވާދަކުރެވޭ އިދިކޮޅު ފަރާތެއްގެ ގޮތުގައި ގިނަ ބަޔަކު ދެކޭ އެކްޓިވިސްޓް އެލެކްސީ ނަވަލްނީ މިދިޔަ މަހު ވަނީ ރަޝިޔާގެ ޖަލެއްގައި މަރުވެފަ އެވެ.

އުމުރުން 71 އަހަރުގެ ޕޫޓިންގެ ވެރިކަމަށް 25 އަހަރު ވަމުން އަންނައިރު، މިހާރު އޭނާ ވަނީ އިތުރު 6 އަހަރުގެ ދައުރެއް ކަށަވަރުކޮށްފައެވެ.

ރަޝިޔާގެ އިލެކްޝަންސް ކޮމިޝަނުން ރިޕޯޓްކޮށްފައިވާ ގޮތުގައި ޕޫޓިން އަށް 76 މިލިއަނަށް ވުރެ ގިނަ ވޯޓު ލިބިވަޑައިގެންނެވުމާއެކު ވަނީ އާ ރެކޯޑެއް ގާއިމްކޮށްފި އެވެ.