ޖީ7 އިން ނެރުނު ވަރުގަދަ ޖޮއިންޓް ބަޔާނެއްގައި ވަނީ އިރާނުން ރަޝިޔާއަށް ބެލިސްޓިކް މިސައިލް ފޮނުވައިފި ނަމަ "އީރާނާ ދެކޮޅަށް އާ އަދި މުހިންމު ފިޔަވަޅުތަކެއް" އަޅާނެ ކަމަށް ބުނެ އިންޒާރު ދީފަ އެވެ.
"ޔޫކްރޭންގެ އާންމު އާބާދީއާ ދެކޮޅަށް ހުއްޓުމެއްނެތި ދޭ ހަމަލާތަކުގައި ބޭނުންކުރާ ޔޫއޭވީ ރަޝިޔާއަށް ފޯރުކޮށްދިނުމަށް ފަހު އީރާނުން ބެލިސްޓިކް މިސައިލްތަކާއި އެއާ ގުޅުންހުރި ޓެކްނޮލޮޖީ ރަޝިޔާއަށް ބަދަލުކުރަން ވިސްނަމުންދާ ކަމަށް ރިޕޯޓްތައް ބުނާތީ އަޅުގަނޑުމެން އިންތިހާއަށް ކަންބޮޑުވޭ،" ޖީ7 ގެ ބަޔާނުގައިވެ އެވެ. “ރަޝިޔާއަށް ބެލިސްޓިކް މިސައިލް ނުވަތަ އެއާ ގުޅުންހުރި ޓެކްނޮލޮޖީ ފޯރުކޮށްދިނުމުގައި އީރާނުން ކުރިއަށް ދާނަމަ، އީރާނާ ދެކޮޅަށް އާ އަދި މުހިންމު ފިޔަވަޅުތައް އެޅުން ހިމެނޭ ގޮތަށް އަވަސް އަދި ކޯޑިނޭޓް ގޮތެއްގައި ފިޔަވަޅު އަޅަން އަޅުގަނޑުމެން މިތިބީ.”
އެމެރިކާއާއި އެމެރިކާގެ އެކުވެރި ގައުމުތަކުން "މި މައްސަލައިގައި އެއް އަޑަކުން ވާހަކަ ދައްކަމުން" އީރާނަށް "ފައިދާއަށްވުރެ ގެއްލުން ބޮޑުވާނެ"ކަން ސާފުކޮށްދޭ ކަމަށް އެމެރިކާ ސަރުކާރުގެ އޮފިޝަލަކު ވިދާޅުވި އެވެ.
ރައްދު ދިނުމުގެ ފިޔަވަޅެއް ގޮތުގައި މަޝްވަރާކޮށްފައިވާ އެއް ގޮތަކީ ދައުލަތުގެ އެއާލައިން އީރާން އެއާ އިން ޔޫރަޕަށް ކުރާ ދަތުރުތައް ހުއްޓާލުން ކަމަށް އޮފިޝަލް ވިދާޅުވި އެވެ.
ރަޝިޔާއަށް ދޭ މި އިތުރު އަސްކަރީ ސަޕޯޓާއެކު އީރާނުން ކުރިއަށް ދިއުމާ މެދު ކަންބޮޑުވުން އިތުރުވަމުން އަންނަނީ ހަނގުރާމައިގެ މައިދާނުގައި ރަޝިޔާގެ ބާރުގަދަވެ، ޔޫކްރޭނަށް ވަޒަން ރޭޝަން ކުރަން މަޖުބޫރުވެފައިވާ ދަނޑިވަޅެއްގަ އެވެ.
ރިޕަބްލިކަން ޕާޓީން އިތުރު ފައިސާ ދިނުމަށް ދެކޮޅު ހެދުމުން ޔޫކްރޭނަށް އެމެރިކާއިން 60 ބިލިއަން ޑޮލަރުގެ އެހީގެ ޕެކޭޖެއް ވަނީ ތަޅުމުގައި ހުއްޓިފައެވެ.
މި ހަފްތާގެ ކުރީކޮޅު ސީއައިއޭގެ ޑިރެކްޓަރު ބިލް ބާންސް ވިދާޅުވީ އެމެރިކާގެ އިތުރު އެހީތެރިކަމެއް ނުލިބިއްޖެނަމަ ޔޫކްރޭނަށް "2024 ވަނަ އަހަރު ބިމުގެ ބޮޑު ބައެއް ގެއްލުމަކީ އެކަށީގެންވާ ކަމެއް" ކަމަށެވެ.
