ބޮސްނިއާ އެންޑް ހަރްޒެގޮވިނާގައި ވަކިވެގަތުމަށް މަސައްކަތްކުރާ ހައްދުފަހަނައެޅި ސާބް ސިފައިންނަށް އިސްރާއީލުން އަސްކަރީ ގޮތުން އެހީތެރިކަން ފޯރުކޮށްދެމުންދާ ކަމުގެ ރިޕޯޓްތަކެއް ފެންމަތިވެ، ބައިނަލްއަގުވާމީ މައިދާނުގައި ކަންބޮޑުވުންތަކެއް އުފެދިއްޖެއެވެ.
ސޯޝަލް މީޑިއާގައި ދައުރުވަމުންދާ މި ރިޕޯޓްތަކުގައިވާ ގޮތުން، އިސްރާއީލާއި ބޮސްނިއާގެ ސާބްގެ ކަމާބެހޭ ފަރާތްތަކާ ދެމެދު އަސްކަރީ އެއްބާރުލުން އަންނަނީ އިތުރުވަމުންނެވެ. ފާޑުކިޔާ ފަރާތްތަކުން އިންޒާރުދޭ ގޮތުގައި، އިސްރާއީލުގެ މިފަދަ އެހީތެރިކަމުގެ ސަބަބުން ބޮސްނިއާގެ މަސްލަހަތު ގެއްލި، ބަލްކަން ސަރަހައްދުގައި ފިތުނަވެރިކަން އިތުރުވެގެންދާނެއެވެ.
މި ތުހުމަތުތަކުގައި ބުނެފައިވަނީ، އިސްރާއީލުގެ އަސްކަރީ އެހީތެރިކަން ސާބްގެ ވަކިވެގަންނަން މަސައްކަތްކުރާ ފައުޖުތަކަށް ލިބެމުންދާ ކަމަށެވެ. މިއީ ބޮސްނިއާގައި ދިރިއުޅޭ މުސްލިމުންގެ ސަލާމަތާއި ރައްކާތެރިކަމަށް އޮތް ބޮޑު ނުރައްކަލެއްގެ ގޮތުގައި އެކްޓިވިސްޓުންނާއި ސިޔާސީ ތަހުލީލުކާރުން ސިފަކުރެއެވެ. ބޮސްނިއާ އެންޑް ހަރްޒެގޮވިނާގައި ގާތްގަނޑަކަށް ދެ މިލިއަން މުސްލިމުން ދިރިއުޅޭއިރު، ސާބުންގެ އަޣުލަބިއްޔަތު އޮންނަ "ރިޕަބްލިކާ ސްރްޕްސްކާ" ގައި އެކަނިވެސް 175,000 މުސްލިމުން ދިރިއުޅެއެވެ.
މި މައްސަލަ ފެންމަތިވެފައިވަނީ، ރިޕަބްލިކާ ސްރްޕްސްކާގެ ލީޑަރުން ބޮސްނިއާގެ މައި ސަރުކާރުން ވަކިވެ، ޚުދުމުޚުތާރު ވެރިކަމެއް ގާއިމުކުރުމަށް ބާރުއަޅަމުންދާ ދަނޑިވަޅެއްގައެވެ.
އިސްރާއީލުގެ މި އަމަލަށް ފާޑުކިޔާ ފަރާތްތަކުން ބުނަނީ، މިފަދަ އަސްކަރީ އެއްބާރުލުމުގެ ސަބަބުން 1992-1995 އަށް ހިނގި ބޮސްނިއާ ހަނގުރާމައިގައި ފެނިގެންދިޔަ ނަސްލީ ގަތުލުއާންމުތަކާއި ބައިބައިވުންތައް އަލުން އިއާދަވެދާނެ ކަމުގެ ބިރު އެބައޮތް ކަމަށެވެ. އަދި ވަކިވެގަތުމަށް މަސައްކަތްކުރާ ފަރާތްތަކަށް އިސްރާއީލުން ދޭ އެހީތެރިކަމަކީ ސަރަހައްދީ ސުލްހައަށް އޮތް ހުރަހެއް ކަމަށްވެސް އެފަރާތްތަކުން ބުނެއެވެ.
މި ތުހުމަތުތަކާ ގުޅޭގޮތުން އިސްރާއީލުގެ ސަރުކާރުން މިހާތަނަށް ރަސްމީ އެއްޗެއް ބުނެފައިނުވާއިރު، މި މައްސަލައަކީ މިހާރުވެސް ސިޔާސީ ގޮތުން ބޮޑު ބަހުސަކަށް ވެފައިވާ މައްސަލައެކެވެ. އިސްރާއީލުގެ މިފަދަ ނުރައްކާތެރި ފިޔަވަޅުތަކުގެ ސަބަބުން ބޮސްނިއާގެ މުސްލިމުންގެ މުސްތަގުބަލާ މެދު ވަނީ ސުވާލު އުފެދިފައެވެ.
