އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް އިގްތިސާދީ އަދި އަސްކަރީ ގޮތުން ހަރުކަށި ފިޔަވަޅުތަކެއް އަޅުއްވާނެކަން އިއުލާން ކުރައްވައިފިއެވެ.
ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ 'ޓްރޫތް ސޯޝަލް' ގައި ކުރެއްވި ޕޯސްޓެއްގައި ވިދާޅުވީ، އީރާނުގެ ހަރަކާތްތައް ހުއްޓުވުމަށްޓަކައި އެ ގައުމާ ދެކޮޅަށް ވަރުގަދަ ބްލޮކޭޑެއް ނުވަތަ ދަތުރުފަތުރާއި ވިޔަފާރި ހުރަސްކުރުމުގެ ފިޔަވަޅުތަކެއް އަޅުއްވާނެ ކަމަށެވެ. މީގެ އިތުރުން، ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހުރްމުޒް ކަނޑުއޮޅިން ދަތުރުކުރާ އީރާނަށް ނިސްބަތްނުވާ ހުރިހާ އުޅަނދުފަހަރަކުން 20 އިންސައްތައިގެ "ޓޯލް" ފީއެއް ނެގުމަށް ގަސްދުކުރައްވާ ކަމަށްވެސް ޓްރަމްޕް ހާމަކުރެއްވިއެވެ.
މި ނިންމެވުންތައް އިޢުލާން ކުރައްވާފައިވަނީ އީރާނުން ސަރަޙައްދީ ހަމަޖެހުމަށް ހުރަސްއަޅަމުންދާ ކަމަށް ބުނެ، އެ ގައުމުގެ އިގްތިސާދީ ވަސީލަތްތައް މަދުކޮށް، ނިއުކްލިއަރ މަޝްރޫއުތަކަށް ކުރާ ހޭދަ ހުއްޓުވުމުގެ މަގްސަދުގައެވެ. ޓްރަމްޕް ވިދާޅުވި ގޮތުގައި މި ފީ ނަގައިގެން ލިބޭ އާމްދަނީ ބޭނުންކުރާނީ އެ ސަރަޙައްދުގެ ރައްކާތެރިކަން ބެލެހެއްޓުމަށެވެ.
މި އިއުލާނާ ގުޅިގެން ބައިނަލްއަގުވާމީ މާކެޓުގައި ތެލުގެ އަގަށް ބަދަލުތަކެއް އައިސްދާނެ ކަމުގެ ބިރު ވަނީ އުފެދިފައެވެ. އަދި މިއީ ބައިނަލްއަގުވާމީ ކަނޑުގެ ގާނޫނުތަކާ ޚިލާފު ކަމެއް ކަމަށް ބުނެ ބައެއް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ. އީރާނުން އަދި މިކަމަށް ރަސްމީކޮށް ރައްދުދީފައެއް ނުވެއެވެ.
