ޔޫރަޕިއަން ޔޫނިއަންގެ މެމްބަރު ގައުމެއް ކަމަށްވާ ޕޯޗުގަލް އިން ފަލަސްތީނަކީ މިނިވަން ދައުލަތެއްގެ ގޮތުގައި ރަސްމީކޮށް ބަލައިގަނެ، އެކަން އިޢުލާނުކޮށްފިއެވެ.
މި ތާރީޚީ ނިންމުން ހާމަކުރެއްވީ ޕޯޗުގަލްގެ ފޮރިން މިނިސްޓަރު ޕައުލޯ ރަންގޭލް، އދ. ގައި ހުންނަ އެ ގައުމުގެ ދާއިމީ މިޝަންގައި ދެއްވި ބަޔާނެއްގައެވެ. މިއީ ދެ ދައުލަތުގެ ހައްލަކަށް ތާއީދުކޮށް، ޑިޕްލޮމެޓިކް ގޮތުން އެޅި ވަރުގަދަ ފިޔަވަޅެކެވެ.
ޕޯޗުގަލް ސަރުކާރުން ބުނި ގޮތުގައި މި ނިންމުމަކީ އިސްރާއީލާއި ފަލަސްތީނުގެ މައްސަލައަށް ސުލްހަވެރި ހައްލެއް ހޯދުމަށް ކުރާ މަސައްކަތަށް އެހީތެރިވުމުގެ ގޮތުން ނިންމި ނިންމުމެކެވެ. އަދި މި ނިންމުމާއެކު، ޣައްޒާގައި ވަގުތުން ހަނގުރާމަ ހުއްޓާލުމަށާއި، ރަހީނުކޮށްފައިވާ މީހުން މިނިވަންކުރުމަށާއި، އިންސާނީ އެހީ ފޯރުކޮށްދިނުން އިތުރުކުރުމަށް ވެސް އެ ގައުމުން ވަނީ ގޮވާލާފައެވެ.
މި ނިންމުން ނިންމާފައިވަނީ ޕޯޗުގަލްގެ ރައީސާއި ސިޔާސީ ޕާޓީތަކާ ދެމެދު ފުޅާ ދާއިރާއެއްގައި މަޝްވަރާކުރުމަށް ފަހުގައެވެ. ޣައްޒާގެ އިންސާނީ ހާލަތު އިންތިހާއަށް ގޯސްވަމުންދާތީ، ސުލްހައިގެ މަޝްވަރާތައް އަލުން ފެށުމަށް ބައިނަލްއަގްވާމީ މުޖުތަމައުން ކުރާ މަސައްކަތްތަކުގައި ބައިވެރިވުމަކީ މިވަގުތަށް ކޮންމެހެން ކުރަންޖެހޭ ކަމެއް ކަމަށް އެ ގައުމުން ގަބޫލުކުރެއެވެ.
ފަލަސްތީނަކީ މިނިވަން ދައުލަތެއްގެ ގޮތުގައި ބައިނަލްއަގްވާމީ މުޖުތަމައުން ބަލައިގަންނަ މިންވަރު މިހާރު ދަނީ އިތުރުވަމުންނެވެ. ޕޯޗުގަލްގެ މި ނިންމުމަކީ އިސްރާއީލާއި ފަލަސްތީނާ ދެމެދު އޮތް ޒަމާންވީ ހަމަނުޖެހުންތައް ނިމުމަކަށް ގެނެސް، ދެ ދައުލަތް ސުލްހަވެރިކަމާއެކު އެކުގައި އުޅެވޭނެ މަގު ފަހިކުރުމަށް ކުރެވޭ ޑިޕްލޮމެޓިކް މަސައްކަތްތަކަށް ލިބުނު އިތުރު ބާރެކެވެ.
