ރަޝިޔާގެ ވެރިރަށް މޮސްކޯގައި ބަޑިއާއި އަލިފާން ރޯކުރާ އާލާތްތަކުން ހަތިޔާރު އެޅި މީހުން ހުކުރު ދުވަހުގެ ރޭ ވަނީ ކްރޮކަސް ސިޓީ ކޮމްޕްލެކްސް - މަޝްހޫރު މިއުޒިކް ހޯލަކާއި ޝޮޕިން ސެންޓަރެއް ވެސް ހުންނަ ތަނުގައި ބަޑިޖަހާ އެތައް ބަޔަކު މަރާލާފައެވެ.

ހަމަލާ ދިނީ ކޮންސެޓް ޝޯއަކަށް މީހުން ވަންނަމުން ދިޔަ ވަގުތުގައެވެ. އެ ޝޯއަށް 6،500 އެއްހާ ޓިކެޓް ވިއްކާފައިވާ ކަމަށް ރިޕޯޓްތައް ބުނެ އެވެ.

ކެމޮފްލޭޖް ހެދުން ލައިގެން އޮޓޮމެޓިކް ހަތިޔާރު ހިފައިގެން ތިބި މީހުން ބަޑިޖަހަން ފެށި ވަގުތު މަންޒަރު ދުށް މީހުން ވީޑިއޯ ނަގާފައިވެ އެވެ. އެ ފޫޓޭޖުން ފެންނަ ގޮތުގައި ކޮންސެޓްތަކަށް ދާ މީހުން ހަޅޭއްލަވައިގަނެ ކުޝަން ޖަހާފައިވާ ގޮނޑިތަކުގެ ފަހަތުގައި ރައްކާތެރިކަން ހޯދުމަށް ފިލާ ތިބިތަން ފެނެއެވެ.

އެ ހަމަލާއިން ސަލާމަތްވި ނަން ހާމަނުކުރާ ފިރިހެން ބުނީ ބަޑިޖެހި މީހުން ކޮންސެޓް ހޯލަށް ވަދެ "އެންމެން ގަޔަށް ބަޑިޖަހަން ފެށި" ކަމަށެވެ.

“އަހަރެން އިނީ މަތީ ބުރީގެ ހޯލުގައި ބެލްކަނީތައް ހުރި ތަނުގައި. އަހަރެމެންނަށް އިވުނީ ބަޑިޖެހި އަޑު. ފުރަތަމަ އަޅުގަނޑުމެންނަކަށް ނުވިސްނުނީ ވީ ގޮތެއް،” ރޮއިޓާސް އިން ޝާއިއުކުރި އޮސްޓޯރޮޒްނޯ ނޮވޮސްޓީއަށް ދިން އިންޓަވިއުއެއްގައި އޭނާ ބުންޏެވެ. އޭނާ އިތުރަށް ބުނީ ހަމަލާދިން މީހުން މޮލޮޓޯވް ކޮކްޓެއިލް އެއް އުކައި "ހުރިހާ އެއްޗެއްގައި އަލިފާން ރޯކޮށްލާފައިވާ" ކަމަށެވެ.

ފަހުން ދައުލަތުގެ މީޑިއާތަކަށް މައުލޫމާތު ދެމުން ބޭންޑްގެ މެނޭޖަރު ބުނީ ޕާފޯމަރުންނަށް އެއްވެސް ގެއްލުމެއް ނުލިބޭ ކަމަށެވެ.

ރަޝިޔާގެ އިންވެސްޓިގޭޓިވް ކޮމިޓީން ހޮނިހިރު ދުވަހު ނެރުނު އެންމެ ފަހުގެ އަޕްޑޭޓުން ދައްކާ ގޮތުގައި އެ ބޮޑު ކޮމްޕްލެކްސްގައި މަދުވެގެން 133 މީހުން މަރުވެފައިވާކަން އެނގިފައިވެ އެވެ. ކަމާބެހޭ ފަރާތްތަކުން ބުނާ ގޮތުގައި އެ އަދަދު އިތުރުވަމުން ދިއުމަކީ އެކަށީގެންވާ ކަމެކެވެ.

މީގެ އިތުރުން، މި ހާދިސާގައި 100 އަށް ވުރެ ގިނަ މީހުންނަށް އަނިޔާވެފައި ވާއިރު – އޭގެ ތެރެއިން ގިނަ މީހުންގެ ހާލު ސީރިއަސް ކަމަށެވެ.

މަރުވި ކޮންމެ މީހެއްގެ ގާތްތިމާގެ މީހުންނަށް ތިން މިލިއަން ރޫބަލް (32،500 ޑޮލަރު) ލިބޭއިރު، އަނިޔާވެ ހޮސްޕިޓަލުގައި ތިބި މީހުންނަށް އެއް މިލިއަން ރޫބަލް (10،840 ޑޮލަރު) ލިބޭނެ އެވެ.

އައިއެސްއާ ގުޅުން ހުރި އަމާގު ނޫސް އެޖެންސީން ޓެލެގްރާމްގައި ހުކުރު ދުވަހު ޝާއިއުކުރި ކުރު ބަޔާނެއްގައި މި ހަމަލާގެ ޒިންމާ އައިއެސްއިން ނަގާފައިވެ އެވެ.