ޔޫކްރޭނުން ވަނީ ހިފާފައިވާ ކްރައިމިއާގައި ރަޝިޔާގެ ބޮޑެތި ލޭންޑިން ބޯޓުތަކުގެ ތެރެއިން ދެ ބޯޓަކަށް މާޗް 23 ވަނަ ދުވަހުގެ ރޭ ދަންވަރު ހަމަލާދީފައި ކަމަށް ޔޫކްރޭންގެ އަސްކަރިއްޔާއިން މާޗް 24 ވަނަ ދުވަހު ކަށަވަރުކޮށްދީފިއެވެ.

ހަމަލާގެ ސަބަބުން ރަޝިޔާގެ އަސްކަރީ މުވާސަލާތީ މަރުކަޒަކާއި ކަޅު ކަނޑުގެ ބައެއް ފްލީޓް އިންފްރާސްޓްރަކްޗަރަށް ވެސް ވަނީ އަސަރުކޮށްފަ އެވެ.

ސޯޝަލް މީޑިއާގައި ހިއްސާކުރި ފޫޓޭޖްތަކުން ފެންނަ ގޮތުގައި ބޮޑު ގޮވުމެއް ގޮވައި، އަލިފާން ބޯޅައަކާއި ކަޅު ދުންގަނޑެއް ވައިގެ ތެރެއިން ފެނިގެން ދިޔައިރު، ރަޝިޔާގެ ވައިގެ ދިފާއީ ނިޒާމުތަކުން މިތަކެތި ހުއްޓުވަން މަސައްކަތް ކޮށްފައި ވެއެވެ.

ރަޝިޔާގެ މުވާސަލާތީ ޓަވަރުތައް ހަލާކުކުރުމަށް ޔޫކްރޭނުން މަދުވެގެން ތިން ސްޓޯމް ޝެޑޯ ކްރޫޒް މިސައިލް ބޭނުންކޮށްފައިވެއެވެ.

ޔޫކްރޭނުން ހަމަލާދިން ބޯޓުތަކަކީ 98 ފަޅުވެރިންނާއެކު އޮތް ޔަމަލް އާއި 87 ފަޅުވެރިންނާއެކު އޮތް އަޒޯވް އެވެ. މި ބޯޓުތައް ނިސްބަތްވަނީ ރަޝިޔާގެ ކަޅު ކަނޑުގެ ފްލީޓްގެ 197 ވަނަ ލޭންޑިން ޝިޕްސް ބްރިގޭޑް އަށެވެ.

ހަމަލާތަކަށްފަހު ޔޫކްރޭންގެ ވައިގެ ސިފައިންގެ ކޮމާންޑަރު މައިކޮލާ އޮލެޝްޗުކް ވަނީ ޕައިލެޓުންނާއި ފަޅުވެރިން ކުރި "ކާމިޔާބު ހަނގުރާމަވެރި މަސައްކަތަށް" ޝުކުރު އަދާކޮށްފަ އެވެ.

މިހަމަލާގެ ރިޕޯޓެއް ރަޝިޔާގެ ކަމާބެހޭ ފަރާތްތަކުން ހާމަކޮށްފައެއް ނުވެއެވެ. އެކަމަކު ރަޝިޔާއިން އައްޔަންކުރި ސެވަސްޓޮޕޯލްގެ ވެރިޔާ މިޚައިލް ރަޒްވޮޒާޔޭވް ޓެލެގްރާމްގައި ލިޔުއްވާފައިވާ ގޮތުގައި ހަވީރު ސެވަސްޓޮޕޯލްއަށް ދިން ހަމަލާއަކީ "ފަހަކަށް އައިސް ދިން އެންމެ ބޮޑު ހަމަލާ" އެވެ.

އޭނާ ބުނީ ޔޫކްރޭންގެ 10 މިސައިލް ވައްޓާލާފައިވާ ކަމަށެވެ.