ޣައްޒާގައި މިހާރުން މިހާރަށް ހަނގުރާމަ ހުއްޓާލުމަށް އދ. ގެ ސަލާމަތާ ބެހޭ ކައުންސިލުން ގޮވާލައިފިއެވެ. މި ގޮވާލުން ފާސްވީ އެމެރިކާއިން ވީޓޯ ނުކުރުމުންނެވެ.

އަދި ރަހީނުކޮށްފައިވާ ހުރިހާ މީހުން ވަގުތުން ޝަރުތުތަކާ ނުލައި ދޫކޮށްލުމަށް ވެސް ޑިމާންޑްކޮށްފައިވެ އެވެ.

މިއީ އޮކްޓޯބަރު މަހު ހަނގުރާމަ ފެށުނު ފަހުން ހަނގުރާމަ ހުއްޓާލުމަށް ކައުންސިލުން ގޮވާލި ފުރަތަމަ ފަހަރެވެ.

އެމެރިކާއިން ވީޓޯ ނުކުރުމަކީ ޣައްޒާއަށް އިސްރާއީލުން ދެމުންގެންދާ ހަމަލާތަކާ ގުޅިގެން އެމެރިކާއާއި އެގައުމުގެ އެކުވެރި އިސްރާއީލާ ދެމެދު ޚިޔާލުތަފާތުވުން ބޮޑުވަމުންދާކަމުގެ އިޝާރާތެކެވެ.

މިކަމަށް ރައްދުދީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައި ވަނީ އެމެރިކާއިން ހަނގުރާމަ ހުއްޓާލުމާއި ރަހީނު ދޫކޮށްލުމާ ސީދާ ގުޅުން ހުރި ކުރީގެ މަގާމު "ދޫކޮށްލާފައިވާ" ކަމަށެވެ.

"އެމެރިކާއިން އާ ގަރާރު ވީޓޯ ނުކުރުމަކީ ހިތާމަކުރާ ކަމެއް" އޭގައި ބުނެފައިވެ އެވެ.

ބަޔާނުގައި ބުނެފައި ވަނީ މިކަމުގެ ސަބަބުން ރަހީނުކޮށްފައިވާ މީހުން ދޫކޮށްލުމަށް ކުރާ މަސައްކަތަށް ގެއްލުންވެ، އަސީރުން މިނިވަން ނުކޮށް އިސްރާއީލަށް ބައިނަލްއަގްވާމީ ޕްރެޝަރު ބޭނުންކޮށްގެން ހަނގުރާމަ ހުއްޓާލުމުގެ ފުރުސަތު ހަމާސްއަށް ލިބިދާނެ ކަމަށެވެ.

އަދި މި ހަފްތާގައި ބާއްވަން ހަމަޖެހިފައިވާ ވޮޝިންޓަންގައި އިސްރާއީލުގެ ވަފުދަކާއި އެމެރިކާގެ އޮފިޝަލުންނާ ދެމެދު ބާއްވާ ބައްދަލުވުންތައް ކެންސަލް ކުރަން ނަތަންޔާހޫ ނިންމާފައިވާ ކަމަށް ވެސް ބުނެފައިވެ އެވެ.

އިސްރާއީލުގެ ޑިފެންސް މިނިސްޓަރު ވިދާޅުވީ ޣައްޒާގައި ރަހީނުކޮށްފައި ތިބިއިރު އިސްރާއީލުން މިނިވަން ނުވާހާ ހިނދަކު ޣައްޒާގައި ހިނގަމުންދާ ހަނގުރާމަ ހުއްޓާނުލާނެ ކަމަށެވެ.