ޣައްޒާގައި ހަނގުރާމަ ހުއްޓާލައި އެހީ އިތުރުވާންދެން އިސްރާއީލަށް އެކްސްޕޯޓް ކުރުމަށް ހުރަސްތަކެއް އަޅާނެ ކަމަށް ތުރުކީން ބުނެފިއެވެ.

ތުރުކީގެ ޓްރޭޑް މިނިސްޓްރީން އަންގާރަ ދުވަހު ބުނީ ދަގަނޑާއި ދަގަނޑު އުފެއްދުންތަކާއި ޖެޓް ފިއުލް އާއި އިމާރާތް ކުރުމުގެ ސާމާނާއި މެޝިނާއި ސިމެންތި އާއި ގްރޭނައިޓާއި ކެމިކަލް އާއި ޕެސްޓިސައިޑް އަދި ގާ ފަދަ 54 ކެޓަގަރީއެއްގެ ތަކެތި އިސްރާއީލަށް ދެން ނުފޮނުވާނެ ކަމަށެވެ.

"އިސްރާއީލުން ދަނީ ފާޅުގައި ބައިނަލްއަގްވާމީ ގާނޫނުތަކާ ޚިލާފުވަމުން" މިނިސްޓްރީން ނެރުނު ބަޔާނުގައިވެ އެވެ.  “މި ނިންމުން ދެމިއޮންނާނެ، އިސްރާއީލުން ވަގުތުން ހަނގުރާމަ ހުއްޓާލުން އިއުލާންކޮށް، އެކަށީގެންވާ އަދި މެދުކެނޑުމެއްނެތި އިންސާނީ އެހީ ޣައްޒާއަށް ފޯރުކޮށްދިނުމަށް ފުރުސަތު ދޭންދެން."

އިސްރާއީލުން ޣައްޒާއާ ދެކޮޅަށް ކުރި ހަ މަސް ދުވަހުގެ ހަނގުރާމައިގައި 33،000 އަށް ވުރެ ގިނަ މީހުން މަރުވެފައިވާ ކަމަށް ފަލަސްތީނުގެ ސިއްހީ އޮފިޝަލުން ބުނާއިރު، އިސްރާއީލުގެ ހަމަލާތަކާއި ހިސާރުކުރުމުގެ ސަބަބުން މަރުވި މީހުންގެ އަދަދާއި އިންސާނީ ދަތިތަކާ ގުޅިގެން ގިނަ ގައުމުތަކުން ވަނީ ރުޅިވެރިކަން ފާޅުކޮށްފައެވެ.

އިސްރާއީލުގެ ފޮރިން މިނިސްޓަރު އިސްރާއީލް ކަޓްޒް ތުރުކީން ކުރި އިއުލާނަށް ރައްދު ދެއްވައި ވިދާޅުވީ ތުރުކީގެ ރައީސް ރަޖަބް ތައިބް އުރުދުޣާން "ޣައްޒާގައި ހަމާސް ގަތުލުވެރިންނަށް ތާއީދު ކުރެއްވުމަށް ތުރުކީގެ ރައްޔިތުންގެ އިގްތިސާދީ މަސްލަހަތު އަނެއްކާވެސް ގުރުބާން ކުރައްވާ" ކަމަށެވެ.

އޭނާ އިތުރަށް ވިދާޅުވީ އިސްރާއީލުން "ތުރުކީގެ އިގްތިސާދަށް ގެއްލުންވާނެ ފިޔަވަޅުތައް" އަޅާނެ ކަމަށާއި، އޭގެ ތެރޭގައި ތުރުކީގެ ބައެއް އިމްޕޯޓްތައް މަނާކުރުމާއި، އެމެރިކާގެ ޖަމިއްޔާތަކަށް ތުރުކީގައި އިންވެސްޓްކުރުން ހުއްޓާލުމަށް އެދުމާއި، ތުރުކީއަށް ދަތިކުރުމުގެ ފިޔަވަޅުތައް އަޅަން "އެމެރިކަން ކޮންގްރެސްގައި ތިބި އަޅުގަނޑުމެންގެ ރައްޓެހިންނަށް" ގޮވާލުން ހިމެނޭ ކަމަށެވެ.

ވިޔަފާރި ހުއްޓުވުން އިއުލާން ކުރީ ތުރުކީން ޣައްޒާގެ މައްޗަށް ވައިގެމަގުން އެހީ ވައްޓާލުމަށް ތުރުކީގެ ކާގޯ އަސްކަރީ މަތިންދާބޯޓުތައް ހުއްޓުވުމުން އިސްރާއީލާ ދެކޮޅަށް "ފިޔަވަޅަކަށް ފިޔަވަޅެއް" ބަދަލު ހިފުމަށް ވައުދުވިތާ އެއް ދުވަސް ފަހުންނެވެ.

"ޣައްޒާގައި ލޭއޮހޮރުވުން ހުއްޓި، 1967 ވަނަ އަހަރުގެ ބޯޑަރުތަކުގެ މައްޗަށް ބިނާކޮށް އިރުމަތީ ގުދުސްގެ ވެރިރަށް ކަމުގައިވާ މިނިވަން ފަލަސްތީނެއްގައި އެމީހުން ދިރިއުޅެންދެން އަޅުގަނޑުމެންގެ ފަލަސްތީނުގެ އަޚުންނާއި އުޚުތުންނަށް ދޭ ތާއީދު ކުރިއަށް ގެންދާނަން،" އުރުދުޣާން އަންގާރަ ދުވަހު ވިދާޅުވިއެވެ.

ހަނގުރާމައިގެ ދުވަސްވަރު އިސްރާއީލާ ވިޔަފާރީގެ ގުޅުންތަކާ ގުޅިގެން ތުރުކީ ސަރުކާރަށް ދާޚިލީ ފާޑުކިޔުންތަކެއް ކުރިމަތިވެފައިވާއިރު، މިއީ މާޗް މަހުގެ ފަހުކޮޅު ބޭއްވި ލޯކަލް އިންތިޚާބުގައި ބަލިވާން މެދުވެރިވި ސަބަބެއްގެ ގޮތުގައި ގިނަ ބަޔަކު ދެކެމުން އައި ކަމެކެވެ.

އިސްރާއީލުގެ ސިފައިންގެ ރޭޑިއޯއިން އަންގާރަ ދުވަހު މެނުފެކްޗަރސް އެސޯސިއޭޝަން އޮފް އިސްރާއީލުގެ ރައީސް ރޮން ޓޮމާއާ ހަވާލާދީ ބުނެފައިވަނީ އިސްރާއީލުން އެތެރެކުރާ ސިމެންތި، ދަގަނޑާއި މާބަލްގެ ގާތްގަނޑަކަށް 50 ޕަސެންޓަކީ ތުރުކީން އެތެރެކުރާ އެއްޗެހި ކަމަށެވެ.