ތިމަންނާމެންގެ ވެރިކަމެއްގައި ފުލުހުންގެ ބޭނުންކޮށްގެން އާންމުންނަށް އަނިޔާވާ އެއްވެސް ފަދަ ކަމެއް ނުކުރާނަމޭ 2023 ވަނަ އަހަރުގެ ރިޔާސީ އިންތިޚާބްގެ ކެމްޕެއިން ތެރެއިން ބަޔަކު މީހުން ކިޔައި އުޅުނެވެ.

ނިމިދިޔަ ފަސް އަހަރު މަގުމަތީގައިއޭ އުޅުނީ، ލިބުނީ ފުލުހުންގެ ފަރާތުން އަނިޔާއެވެ. ހިޔާލު ފާޅުކުރުމުގެ މިނިވަންކަމެއް ނުލިބުނޭ އެހެން ކަމުން ވެރިކަން ލިބިއްޖާ އެމީހުންނަށް އެމްޑީޕީގެ ސަރުކާރުން ހެދި ގޮތެއް ނުހަދާނަން ކަަމަށް އަދުގެ ރައީސް ޑރ މުހައްމަދު މުއިއްޒު ވިދާޅުވިއެވެ.

މިއޮތީ މިއަދު އެބޭފުޅުންގެ ވެރިކަމެކެވެ. ނަމަވެސް ނެތީ އެބޭފުޅާ ވިދާޅުވި ކަންކަމެވެ.

ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންނަވާ އުފައްދާ ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމުގެ ޖަލްސާ ބޭއްވުމަށް އިލެކްޝަންސް ކޮމިޝަނުން ހުއްދަ ދިނުމާއެކު ޕާޓީގެ މުއައްސިސް، ރައީސް ޔާމީންގެ ދޮށީ ދަރިކަލުން ޒެއިން ޔާމީން އަބްދުލްގައްޔޫމް އަދި ޕާޓީގެ އިސްވެރިން އުޅުއްވީ އެކަމާ އަވަދިނެތިއެވެ.

ޖަލްސާ ބޭއްވުމަށްޓަކައި ޣިޔާސުއްދީން ސުކޫލްގެ ހޯލް ޕީއެންއެފުން ހޯދައިފައިވަނީ މި މަހުގެ 5 ވަނަ ދުވަހުއެވެ. އެގްރީމަންޓް ހަދާ ހޯލަށް ފައިސާ ވެސް ޕާޓީގެ ފަރާތުން ވަނީ ދައްކާފައެވެ. ޖަލްސާ 9 ވަނަ ދުވަހުގެ ރޭ ބޭއްވުމަށް ހަމަޖެހިފައިވާތީ ޖަލްސާއަށް ހޯލް ތައްޔާރު ކުރުމަށްޓަކައި ޕީއެންއެފުން ސުކޫލްގެ ހޯލް ހަމަޖެއްސީ 8 ވަނަ އަދި 9 ވަނަ ދުވަހަށެވެ. އެހެންކަމުން ސުކޫލުން ވަނީ އެ ހޯލަށް ކަރަންޓް ފޯރުކޮށްދިނުމަށް ސްޓެލްކޯއަށް އެދިފައެވެ. ނަމަވެސް ސްޓެލްކޯ އިން ވަނީ ކަރަންޓް ފޯރުކޮށްދޭން އިންކާރުކޮށްފައެވެ.

ކަރަންޓަކީ ވަރަށްވެސް އަސާސީ ބޭނުމަކަށް ވާއިރު، ޖަލްސާ އަށް ނުފޫޒު ފޯރުވުމަށްޓަކައި ރައީސް މުއިއްޒު އަމުރު ކުރީ ސްޓެލްކޯއަށް ކަރަންޓު ނުދީ ހިފެހެއްޓުމަށެވެ. ރައީސް މުއިއްޒު ހީކުރެއްވީ ކަރަންޓު ނުދީ ހިފެހެއްޓީމާ ޖަލްސާ ނުބޭއްވޭނެކަމަށެވެ. އެހެންނަމަވެސް ޕީއެންއެފް އެޔަށްވުރެ މާ ހުޝިޔާރެވެ. ޖަނަރޭޓަރެއް ހޯދައި އަމިއްލައަކަށް ކަރަންޓްދީ ޖަލްސާ ބޭއްވުމަށްޓަކައި ހޯލް ތައްޔާރުކުރިއެވެ. ހަވީރުގެ ވަގުތެއްގައި ފުލުހުން ވަނީ އެ ސަރަހައްދައް އައިސް ހުއްދަނެތި އެ ތަނުގައި ޖަލްސާ ނުބޭއްވޭނެކަމަށް ބުނެ، ޕީއެންއެފަށް އިންޒާރު ދީފައެވެ. ނަމަވެސް ހުއްދަ އޮތުމުން ޕީއެންއެފުން ވަނީ ޖަލްސާ އެތަނުގައި ބޭއްވުމަށް ނިންމާފައެވެ.

ޖަލްސާގެ ގަޑި ކައިރިވަމުންދިޔަ ވަރަކަށް ޖަލްސާގެ ބައިވެރިން ދިޔައީ ޣިޔާސުއްދީން ސުކޫލްގެ ހޯލަށް ވަންނަމުންނެވެ. ދެން އިވުނީ އެސްއޯ ފުލުހުން އައި އަޑެވެ. ޖަލްސާ ބާއްވާ ހޯލުން ބޭރަށް ނިކުންއިރު، ޖަލްސާގެ ބައިވެރިންނާ، ޕާޓީގެ މުއައްސިސްވެސް ހުރީ ގޭޓުގެ ބޭރުގައެވެ. އެސްއޯ ފުލުހުން ގޭޓު ބަންދުކުރުމަށްފަހު ބައިވެރިން ހޯލްގެ ތެރެޔަށް ނުވަދެވޭ ގޮތް ދިޔައީ ހަދަމުންނެވެ. ޖަލްސާއަށް ވަންނަން ބޭނުންވެފައި ހުރި ފަރާތްތަކުން ގޭޓު ހުޅުވުމައްފަހު އެތެރެޔަށް ވަދެގަތުމުން އެސްއޯ ފުލުހުން ވަނީ ބާރުގެ ބޭނުންކޮށް ޕެޕާރ ސްޕްރޭވެސް ޖަހާފައެވެ.

މިނިވަން ނޫސްވެރިކަމެއް ކުރެވޭނީ މި ސަރުކާރުގައި ކަމަށް ބުނެ ނޫސްވެރިންގެ ގުންޒަރެއް ބާއްވާފައި އުޅުނު ވެރިޔާގެ ވެރިކަމުގައި ފެނުނީ ބްރޯޑްކާސްޓިން ކޮމިޝަނުން ހުއްދަ ދީފައިވާ ފާސް އަޅާފައި ތިބި ނޫސްވެރިންނަށް ހުރަސް އަޅައި މަންޒަރު ކަވަރ ކުރުމުން ހުއްޓުވި މަންޒަރެވެ. ޖަލްސާގައި 300 މީހުން ހަމަތޯ ބަލަން އައިސް ތިބި އީސީގެ މެމްބަރުންނަށްވެސް ފުލުހުން ވަނީ ހުރަސްއަޅާފައެވެ.

ޖަލްސާ އަށް ހުރަސްއަޅައި މިހުރިހާ ޑްރާމާ އެއް ސަރުކާރުން ކުޅުނީ ހަމަ އެންމެ ބޭނުމެއްގައެވެ.

ޣިޔާސުއްދީން ސްކޫލްގެ ހޯލްގައި ޖަލްސާ ނުބޭއްވުމުން ޕީއެންއެފުން ވަނީ ޕްލޭން ބީ އަށް ގޮސްފައެވެ. އެގޮތުން މާލެ ސިޓީ ކައުންސިލްގެ ހުއްދަ ލިބުމާއެކު ބްރިޖް ވިޔު ޕްލެޓްފޯރމްގައި ޖަލްސާ ބޭއްވުމަށް ބަދަލުކުރިއެވެ. ޖަލްސާގެ ހުރިހާ ބައިވެރިން އެ ސަރަހައްދައް އައުމާއެކު އީސީގެ މެމްބަރުން ވެސް ވަނީ އައިސްފައެވެ. ދެން ހައިރާންވީ ރައީސް ޔާމީންގެ އަނބިކަނބަލުން މެޑަމް ފާތުން އަދި ދަރިކަލުން ޒެއިންގެ އަނބިކަނބަލުންވެސް އެ ސަރަހައްދަށް ވަޑައިގަތުމުންނެވެ.

އީސީގެ މެމްބަރުން ޖަލްސާގެ ބައިވެރިން ލިސްޓްގައި ތިބިތޯ ބެލުމަށްފަހު އިއުލާން ކުރީ ޕާޓީ އުފެއްދޭނެކަމަށެވެ. ރާޅުގަނޑު ސަރަހައްދުގެ ކަނު އަނދިރީގައި އެ ޕާޓީއިން ޖަލްސާގައި ޕާޓީގެ ނަމާއި، ދިދަ، ނިޝާން، ސިއްކަ، ކުލަ އަދި އެޑްރެސް ވަނީ ފާސްކޮށްފަ އެވެ. އެއަށްފަހު ހުރިހާ މެމްބަރުންގެ އިއްތިފާގުން އަސާސީ ގަވާއިދާއި މެނިފެސްޓޯ ވެސް ވަނީ ފާސްކޮށްފައެވެ. ވަގުތީ ސެނެޓަކާ ޕާޓީގެ ވަގުތީ ރައީސް ވެސް ވަނީ މެމްބަރުންގެ އިއްތިފާގުން ފާސްކޮށްފައެވެ. އެގޮތުން ޕާޓީގެ ވަގުތީ ރައީސް އަކީ ޕާޓީގެ މުއައްސިސް ޒެއިން އެވެ.

ޖަލްސާ ނިމުން ގަޑީ ރައީސް ޔާމީން ވަނީ އެ ސަރަހައްދުގައި ތިބި ފަރާތްތަކާ ސަލާންކޮށް ބައްދަލުކުރައްވަން އެ ސަރަހައްދައް ވަޑައިގެންފައެވެ.

ޕާޓީ އުފެއްދީ ކަނު އަނދިރީގައެވެ. ކާމިޔާބުކަމާއެކުގައެވެ. ރައީސް ޔާމީންގެ ސަޕޯޓަރުންނަށް ލިބިގެންދިޔައީ ވަރަށް ވެސް ފުރިހަމަ އީދު ހަދިޔާއެކެވެ. ރޭގަ ސާބިތުވެގެންދިޔައީ އަދިވެސް ރައީސް ޔާމިނަށް ތާއިދު އޮންނަ ކަމެވެ.

މިހާރު ދެން ސަރުކާރުން އުޅެނީ މިކަންކަން ފޫބެއްދޭތޯއެވެ. ރޭގައި ރައީސް މުއިއްޒުގެ ކެމްޕެއިން ދެ އިވެންޓް އޮތް ގަޑި ވެސް އަވަސްކުރުމަށްފަހު ޕީއެންއެފް ޖަލްސާ ނުބޭއްވޭ ވަރު ކުރިއެވެ. ހުރިހާ އެންމެނަށް އޯޑަރު ދިނެވެ. ހުއްޓުވޭގޮތަކަށް ހުއްޓުވާށޭއެވެ. ނުހުއްޓުވެމުން އެ ވެއްޓުނީ ސަރުކާރު ހޫނު ފެނަށެވެ. އެސްއޯ ފުލުހުން ނެރުން އެއީ ތިމަންނާގެ ސިޔާސަތެއް ނޫނޭ ކިޔާފައި އެކަން ތަހުގީގު ކުރާނެކަމަށް މިހާރު އެބަ ބުނެއެވެ. ރައީސް މުއިއްޒު މޮޔަފުޅުވީތޯއެވެ؟ ރޭގެ ދަންވަރު ދެން ފެނުނީ ރައީސް އޮފީހުގެ ވެބްސައިޓުން ހަބަރެއް ޝާއިއުކޮށް ޑިފެންސަށް ކުޅުނު މަންޒަރެވެ. ނުވީތާކަށް ސަސްޕެންޝަންގައި ހުރި ދެ ޑެޕިޔުޓީންވެސް ހީވީ އެހެންފަދަ ކަމެއްހެނެނެވެ.

އެ ޕާޓީއެއް ވުޖޫދައް އައިސްދާނެތީ ބިރުން އުޅުނު މީހުން ކުރި ހުރިހާ ކަމެއް ދިޔައީ ފެނަށެވެ. ޖަލްސާ ބާއްވަފާނެތީ ހީވީ އެހެންފަދަކަމެއްހެންނެވެ. ތާހިރުވެއްޖެހެއްޔެވެ؟ ސަރުކާރު ސައިޒުކޮށް އެޔޮތީ ޕާޓީ އިފްތިތާހްކޮށްފައެވެ. ޑިމޮކްރަސީ އޭ ކިޔައިގެން ރައީސް މުއިއްޒު ވާހަކަދެއްކުން ވަރަށްވެސް ހުތުރެވެ. ޔަގީނުންވެސް ޑިމޮކްރަސީގެ "ޑީ" ވެސް ނޭނގޭނެއެވެ.