ހަމާސްގެ ލީޑަރު އިސްމާއިލް ހަނިއްޔާގެ 3 ދަރިންނާއި 3 ކާފަދަރިން ޝަހީދުކޮށްލައިފިއެވެ.

ހައްދުފަހަނައަޅާފައިވާ އިސްރާއީލުގެ ވައިގެ ހަމަލާއެއްގައި ހަމާސްގެ ލީޑަރު އިސްމާއީލް ހަނިއްޔާގެ ތިން ދަރިކަލުން ޝަހީދުވެފައިވާއިރު، ހަމަ އެއާއެކު ބޮޑުވަޒީރު ބެންޖަމިން ނަތަންޔާހޫ އާއި ޑިފެންސް މިނިސްޓަރު ޔޯއަވް ގަލަންޓް އަދި ހަނގުރާމައިގެ ކެބިނެޓް މިނިސްޓަރު ބެނީ ގަންޓްޒްއަށް ނޭނގި ދިން ހަމަލާއެއް ކަމަށް އަޑު ފަތުރާފައިވެއެވެ.

އެ ވައިގެ ހަމަލާ ފުރަތަމަ ރިޕޯޓްކޮށްފައި ވަނީ ހަމާސްއާ ގުޅުން ހުރި ނޫސް އެޖެންސީ ޝެހާބުންނެވެ.

ބެއިރޫތުގައި ހުންނަ ނިއުސް ޗެނަލެއް ކަމަށްވާ އަލް މަޔާދީން އިން ފަލަސްތީނުގެ މަސްދަރުތަކާ ހަވާލާދީ ބުނެފައިވަނީ މި ހަމަލާގައި ޣައްޒާ ސިޓީގެ އަލްޝާތީ ރެފިއުޖީ ކޭމްޕްގައި އުޅަނދެއްގައި ތިބި ހަނިއްޔާގެ ކާފަދަރިންވެސް ޝަހީދުވެފައިވާ ކަމަށެވެ.

ހަނިއްޔާ ފަހުން ވަނީ އެ ވައިގެ ހަމަލާގައި އޭނާގެ ތިން ފިރިހެން ދަރިންނާއި ތިން ކާފަދަރިން ޝަހީދުވެފައިވާކަން ކަށަވަރުކޮށްދީފައެވެ.

"ޣައްޒާގެ ހުރިހާ ރައްޔިތުން ވެސް އަގު ދެއްކީ އެމީހުންގެ ދަރިންގެ ލެއިން،" ހަނިއްޔާ ވިދާޅުވިއެވެ.

ހަމާސްގެ ޕޮލިޓިކަލް ބިއުރޯގެ ޗެއާމަން ހަނިއްޔާ ދިރިއުޅުއްވަނީ ހަމާސްގެ ސިޔާސީ ލީޑަރޝިޕްގެ އެހެން މެމްބަރުންނާ އެކު ގަތަރުގަ އެވެ.

އޮކްޓޯބަރު މަހު ދިން ވައިގެ ހަމަލާއެއްގައި ހަނިއްޔާގެ އާއިލާގެ އިތުރު 14 މީހަކު ޝަހީދުވެފައިވާ ކަމަށް ރިޕޯޓްތައް ބުނާއިރު، އޭގެ ތެރޭގައި އޭނާގެ ބޭބެ އާއި ކޮއްކޮ ވެސް ހިމެނެ އެވެ. އޭނާގެ ކާފަދަރިފުޅު ރޯއާ ހަނިއްޔާ ވެސް އައިޑީއެފް އިން ޝަހީދުކޮށްލާފައިވާ ކަމަށް ރިޕޯޓްތައް ބުނާއިރު، އޭނާގެ ދޮށީ ކާފަދަރިފުޅު ޖަމާލް ވެސް ޝަހީދުކޮށްލާފައިވާ ކަމަށް ރިޕޯޓްތައް ބުނެ އެވެ. ފެބްރުއަރީ މަހު ފަލަސްތީނުގެ މަސްދަރުތަކުން ބުނެފައި ވަނީ ހަނިއްޔާގެ ދަރިކަލުން ހާޒިމް ވެސް ޝަހީދުކޮށްލާފައިވާ ކަމަށެވެ.