އިސްރާއީލުން ވަނީ ދަތިކުރުމުގެ ފިޔަވަޅު އެޅުމަށް ގޮވާލައި އީރާނާ ދެކޮޅަށް "ޑިޕްލޮމެޓިކް ޙަމަލާއެއް" ފަށާފައެވެ.

އިސްރާއީލުގެ ފޮރިން މިނިސްޓަރު އިސްރާއީލް ކަޓްޒް އަންގާރަ ދުވަހު ބުނީ 32 ގައުމަކާ ގުޅައިގެން ތެހެރާނާ ދެކޮޅަށް ދަތިކުރުމުގެ ފިޔަވަޅު އެޅުމަށް ގޮވާލާފައިވާ ކަމަށެވެ. މި ފިޔަވަޅު އަޅަނީ އީރާނުން އިސްރާއީލަށް ދިން ހަމަލާއަށް އަސްކަރީ ރައްދު ދިނުމަށް އިސްރާއީލުން ވިސްނަމުންދާ ދަނޑިވަޅެއްގަ އެވެ.

އީރާނުން ބުނީ ހޮނިހިރު ދުވަހު 300 އަށް ވުރެ ގިނަ ޑްރޯން އާއި ކްރޫޒް މިސައިލް އަދި ބެލިސްޓިކް މިސައިލް ބޭނުންކޮށްގެން ދިން ހަމަލާތަކަކީ ސީރިއާގައި ހުންނަ އީރާނުގެ ކޮންސިއުލޭޓަށް އިސްރާއީލުން ދިން ހަމަލާގެ ބަދަލު ހިފުން ކަމަށެވެ. އެ ހަމަލާގައި އިސްލާމިކް ރިވޮލިއުޝަނަރީ ގާޑްސް ކޯޕްސް (އައިއާރުޖީސީ) ގެ ޤުދުސް ފޯސްގެ ދެ ކޮމާންޑަރުން ހިމެނޭ ގޮތަށް 13 މީހުން މަރުވިއެވެ.

އިސްރާއީލުގެ އަސްކަރިއްޔާއިން ބުނީ އެމެރިކާއާއި އެހެން އެކުވެރި ގައުމުތަކުގެ އެހީގައި ވައިގެ މަގުން ދިން ހަމަލާތަކުގެ 99 ޕަސެންޓް ހުއްޓުވާފައިވާ ކަމަށާއި އެ ހަމަލާގެ ސަބަބުން އެގައުމުގެ ދެކުނުގައި ހުރި އަސްކަރީ މަރުކަޒެއް ހިމެނޭ ގޮތަށް ކުދިކުދި ގެއްލުންތަކެއް ލިބުނު ކަމަށެވެ.

"މިސައިލްތަކާއި ޔޫއޭވީ ހަމަލާއަށް އަސްކަރީ ރައްދު ދިނުމާ އެކު އަޅުގަނޑު މިދަނީ އީރާނާ ދެކޮޅަށް ޑިޕްލޮމެޓިކް ހަމަލާއެއް ލީޑް ކުރަމުން،" އެކްސްގައި ކެޓްޒް ބުންޏެވެ.

"މިއަދު ހެނދުނު 32 ގައުމަކަށް ސިޓީ ފޮނުވައި ދުނިޔޭގެ ދިހަވަރަކަށް ފޮރިން މިނިސްޓަރުންނާއި އިސް ފަރާތްތަކާ ވާހަކަ ދައްކައިގެން އީރާނުގެ މިސައިލް މަޝްރޫއަށް ދަތިކުރުމުގެ ފިޔަވަޅު އެޅުމަށާއި އިސްލާމިކް ރިވޮލިއުޝަނަރީ ގާޑް ކޯޕަކީ ޓެރަރިސްޓް ޖަމާއަތެއްގެ ގޮތުގައި އިއުލާން ކުރުމަށް ގޮވާލިން"

ދަތިކުރުމުގެ ފިޔަވަޅުތައް އަޅަން އެދިވަޑައިގަތީ ކޮން ސަރުކާރުތަކަކަށް ކަމެއް ކަޓްޒް ހާމައެއް ނުކުރައްވަ އެވެ. އައިއާރުޖީސީއަކި އެމެރިކާއިން ޓެރަރިސްޓް ޖަމިއްޔާއެއްގެ ގޮތުގައި މިހާރުވެސް ބްލެކްލިސްޓްކޮށްފައިވާ ޖަމާއަތެކެވެ.

"އީރާން މިހާރު ހުއްޓުވަން ޖެހޭނެ – މާ ލަސްވުމުގެ ކުރިން،" ކަޓްޒް ބާރުއެޅި އެވެ.