އިންޑޮނޭޝިއާގެ އަލިފާންފަރުބަދައެއްގައި މި ހަފްތާގައި ސިލްސިލާކޮށް ގަދަފަދަ ގޮވުންތަކެއް ހިނގައި، އެއާޕޯޓްގެ ހިދުމަތް ހުއްޓާލައި، މީހުން ނެރެ، ސުނާމީގެ ނުރައްކާ އޮތް ކަމުގެ އިންޒާރު އޮފިޝަލުން ދީފިއެވެ.

އިންޑޮނޭޝިއާގެ ނޯތު ސުލަވޭސީ ޕްރޮވިންސްގެ ދުރު ޖަޒީރާއެއްގައި އޮންނަ 750 ފޫޓުގެ ރޫއަންގް އަލިފާްފަރުބަދަ އަންގާރަ ދުވަހުން ފެށިގެން އެތައް ފަހަރަކު ގޮވައި، އުޑުމައްޗަށް ދެ މޭލު ދުރަށް ލާވާ އާއި ހިލަ އަދި އަޅީގެ ކޮލަމްތައް އުކާލާފައިވާ ކަމަށް ރޮއިޓާސް އިން ބުނެ އެވެ.

17،000 އަށް ވުރެ ގިނަ ޖަޒީރާ ހިމެނޭ އިންޑިއާ ކަނޑާއި ޕެސިފިކް ކަނޑާ ދެމެދުގައި އޮންނަ އިރުދެކުނު އޭޝިއާގެ ގައުމެއް ކަމަށްވާ އިންޑޮނޭޝިއާ އަކީ އާބާދީގެ ގޮތުން ދުނިޔޭގެ ހަތަރު ވަނައަށް އެންމެ ބޮޑު ގައުމާއި އެންމެ އާބާދީ ބޮޑު މުސްލިމު ގައުމެވެ.

އޮފިޝަލުން ބުނީ އަލިފާންފަރުބަދައިގެ އެލާޓް އެންމެ މަތީ ލެވެލްއަށް ބުދަ ދުވަހު އުފުލާފައިވާ ކަމަށާއި، އަލިފާންފަރުބަދައިގެ ބައެއް ކަނޑަށް ވެއްޓި ސުނާމީއެއް އުފެދިދާނެ ކަމުގެ ބިރު އޮތުމުން ރަށުގެ ގާތްގަނޑަކަށް 4 މޭލުގެ ތެރެއަށް ނުދިއުމަށް އިންޒާރު ދީފައިވާ ކަމަށެވެ.

މީގެ ކުރިން މި އަލިފާންފަރުބަދަ ގޮވައި ކަނޑަށް ވެއްޓިފައިވަނީ 1871 ވަނަ އަހަރު، އެހާދިސާގައި ގާތްގަނޑަކަށް 400 މީހުން މަރުވެފައިވެއެވެ.