ރަޝިޔާގެ ޑެޕިއުޓީ ޑިފެންސް މިނިސްޓަރެއްގެ މައްޗަށް ރިޝްވަތު ނެގުމުގެ ތުހުމަތުކޮށް މޮސްކޯގެ ކޯޓަކުން އޭނާ ބަންދުގައި ބަހައްޓައިފިއެވެ.

އެ ދައުވާއަށް އިންކާރުކުރާ ޓައިމޫރު އިވާނޯވްގެ މައްޗަށް ތުހުމަތު ކުރެވެނީ "ވަކިން ހާއްސަކޮށް ބޮޑު ސްކޭލެއްގައި" ރިޝްވަތު ބަލައިގަތް ކަމުގެ ތުހުމަތެވެ.

2016 ވަނަ އަހަރު ޑިފެންސް މިނިސްޓްރީއަށް އައްޔަން ކުރެއްވި އުމުރުން 47 އަހަރުގެ އިވާނޯވް ވަނީ ރަޝިޔާގެ އަސްކަރީ އިންފްރާސްޓްރަކްޗާ މަޝްރޫއުތަކުގެ މަސްއޫލިއްޔަތު ހަވާލުކޮށްފައެވެ.

2022 ވަނަ އަހަރު ރަޝިޔާއިން ޔޫކްރޭނަށް އަރައިގަތް ފަހުން މިފަދަ ހައި ޕްރޮފައިލް ކޭސްތައް ފެންނަނީ މަދުންނެވެ.

މިސްޓަރ އިވާނޯވް އަކީ ޑިފެންސް މިނިސްޓަރު ސާގޭ ޝޮއިގޫގެ އެކުވެރިއެއްގެ ގޮތުގައި ބެލެވޭ އަދި އޭނާއާއެކު ގިނަ އަހަރުތަކެއް ވަންދެން މަސައްކަތް ކުރައްވާފައިވާ ބޭފުޅެކެވެ. މީގެ ކުރިން އޭނާ ވަނީ މޮސްކޯ ސަރަހައްދުގެ ބޮޑުވަޒީރުގެ ނައިބުގެ މަގާމު އަދާކުރައްވާފައެވެ. އޭރު ޝޮއިގޫ ވަނީ ކުރު މުއްދަތަކަށް ގަވަރުނަރުގެ މަގާމު އަދާކުރައްވާފައެވެ.

މިސްޓަރ އިވާނޯވް ހައްޔަރުކުރި އަސްލު ސަބަބަކީ އޭނާ ގައުމަށް ޣައްދާރުވުން ކަމަށް ރަޝިޔާގެ ބައެއް މީޑިއާތަކުގައި ރިޕޯޓްތައް ކްރެމްލިން އިން ވަނީ ދޮގުކޮށްފައެވެ.

"މި ހުރިހާ ކަމެއްގެ ވަށައިގެން މިހާރު ތަފާތު އެތައް މާނަތަކެއް އެބަހުރި... ރަސްމީ މައުލޫމާތަށް ފޯކަސް ކުރަން ޖެހޭ،" ނޫސްވެރިންނާ ވާހަކަ ދައްކަވަމުން ތަރުޖަމާނު ޑިމިޓްރީ ޕެސްކޯވް ވިދާޅުވި އެވެ.

އަދި އިވާނޯވް ބަންދުކޮށްފައިވާކަން ރައީސް ވްލަޑިމިއާ ޕޫޓިންއަށް ކުރިން އަންގާފައިވާ ކަމަށް ވެސް އޭނާ ވިދާޅުވި އެވެ.

2022 ވަނަ އަހަރު އިދިކޮޅު ލީޑަރު އެލެކްސީ ނަވަލްނީ އުފެއްދެވި ޖަމާއަތް އެންޓި ކޮރަޕްޝަން ފައުންޑޭޝަން (އޭސީއެފް) އިން ވަނީ އިވާނޯވް "ރަޝިޔާއިން ހިފާފައިވާ ޔޫކްރޭންގެ ސަރަހައްދުތަކުގައި އިމާރާތް ކުރުމުގެ ތެރޭގައި ކޮރަޕްޝަން ސްކީމްތަކުގައި" ބައިވެރިވާ ކަމަށް ތުހުމަތުކޮށްފަ އެވެ.

ޚާއްސަކޮށް ޔޫކްރޭންގެ ބަނދަރު ސިޓީ މާރިއުޕޯލްގައި ހިންގި އިމާރާތްކުރުމުގެ މަޝްރޫއުތަކުން ފައިދާ ލިބިފައިވާ ކަމަށް ބުނެފައިވެއެވެ.