އީރާނުގެ ރައީސް އިބްރާހިމް ރައިސީ ގެންދިޔަ ހެލިކޮޕްޓަރެއް އާދީއްތަ ދުވަހު "ހާޑް ލޭންޑިން" އެއް ކޮށްފައިވާ ކަމަށް އީރާނުގެ ދައުލަތުގެ މީޑިއާތަކުން ރިޕޯޓްކޮށްފިއެވެ.

ރައިސީ ދަތުރުކުރަމުން ދިޔައީ އީރާނުގެ އިރުމަތީ އަޒަރުބައިޖާންގެ ޕްރޮވިންސަކަށެވެ. ސްޓޭޓް ޓީވީން ބުނީ މި ހާދިސާ ހިނގާފައިވަނީ އީރާނުގެ ވެރިރަށް ތެހެރާންގެ ހުޅަނގު އުތުރުން ގާތްގަނޑަކަށް 600 ކިލޯމީޓަރު (375 މޭލު) ދުރުގައި އޮންނަ އަޒަރުބައިޖާން ބޯޑަރުގައި އޮންނަ ސިޓީއެއް ކަމަށްވާ ޖޯލްފާ ކައިރިން ކަމަށެވެ.

ރައިސީއާއެކު ދަތުރުކުރަމުން ދިޔައީ އީރާނުގެ ފޮރިން މިނިސްޓަރު ހުސެއިން އަމިރާބްދުالله އާއި އީރާނުގެ އިރުމަތީ އަޒަރުބައިޖާން ޕްރޮވިންސްގެ ގަވަރުނަރު އަދި އެހެނިހެން އޮފިޝަލުން ކަމަށް ދައުލަތުގެ ނޫސް އެޖެންސީ އިރްނާ އިން ރިޕޯޓްކޮށްފައިވެ އެވެ. ލޯކަލް ގަވަރމަންޓްގެ އޮފިޝަލަކު އެ ހާދިސާ ސިފަކުރުމަށް "ކްރޭޝް" މި ލަފުޒު ބޭނުންކުރި ނަމަވެސް އޭނާ ވަނީ އަމިއްލައަށް އެތަނަށް އަދި ނުދެވޭ ކަމަށް އީރާނުގެ ނޫހަކަށް އެއްބަސްވެފައެވެ.

ރައިސީގެ ހާލަތާ ބެހޭ އެއްވެސް މައުލޫމާތެއް އީއާރްއެންއޭ އިން ވެސް އަދި ދައުލަތުގެ ޓީވީން ވެސް ހުށަހަޅާފައެއް ނުވެއެވެ.

ސްޓޭޓް ޓީވީން ބުނީ ސަލާމަތް ކުރާ މީހުން އެތަނަށް ދިއުމަށް މަސައްކަތް ކުރަމުން ދިޔަ ނަމަވެސް މޫސުން ގޯސްވުމުގެ ސަބަބުން އެތަނަށް ދާން ހުރަސްތަކެއް ކުރިމަތިވެފައިވާ ކަމަށެވެ. މީގެ ކުރިން ބޯކޮށް ވާރޭވެހި ދުންފިންޏާ އެކު ކޮންމެވެސް ވަރަކަށް ވައިޖެހިފައިވާ ކަމަށް ރިޕޯޓްކޮށްފައިވެ އެވެ.

ރައިސީ ވަނީ އާދީއްތަ ދުވަހުގެ ވަގުތެއްގައި އަޒަރުބައިޖާނަށް ވަޑައިގެން އަޒަރުބައިޖާންގެ ރައީސް އިލްހާމް އަލިޔެވްއާ އެކު ޑޭމެއް އިފްތިތާހު ކުރުމަށް ވަޑައިގެންފައެވެ. މި ޑޭމަކީ އަރާސް ކޯރުގައި ދެގައުމުން ބިނާކުރި ތިންވަނަ ޑޭމެވެ. މި ދަތުރުފުޅަކީ 2023 ވަނަ އަހަރު ތެހެރާނުގައި ހުންނަ އަޒަރުބައިޖާންގެ އެމްބަސީއަށް ބަޑިން ހަމަލާދިން މައްސަލައާއި، އީރާނުގެ ޝީއީ ތިއޮކްރެސީން އެ ސަރަހައްދުގެ މައިގަނޑު ދުޝްމަނެއްގެ ގޮތުގައި ދެކޭ އިސްރާއީލާ އެކު އަޒަރުބައިޖާނުގެ ޑިޕްލޮމެޓިކް ގުޅުންތައް ހިމެނޭ ގޮތަށް ދެ ގައުމުގެ މެދުގައި ފިނި ގުޅުންތަކެއް އޮތް ދުވަސްވަރެއްގައެވެ.