ދިވެހި ބަހުގައި "ށ" ގެ އަޑު އޮތް ނަމަވެސް "ށ" އިން ފެށޭ ބަހެއް ނެތުމަކީ ބަހުގެ ޚާއްސަ ސިފައެއް ކަމަށް ކުރީގެ އާޓްސް، ކަލްޗަރ އެންޑް ހެރިޓޭޖް މިނިސްޓަރ ޔުމްނާ މައުމޫން ވިދާޅުވެއްޖެއެވެ.
ޔުމްނާގެ އެކްސް އެކައުންޓްގައި ކުރައްވާފައިވާ ޕޯސްޓްގައި ބުނެފައިވަނީ ދިވެހި ބަސް މުއްސަނދި ކުރުމަށް "ށ" އިން އާ ލަފްޒުތައް ހަދަން ނުޖެހޭ ކަމަށާއި އެފަދައިން ކަންތައް ކުރުމުން ގެއްލިގެން ދަނީ އެ ބަހަށް ލިބިފައިވާ ޚާއްސަ ސިފަކަމަށެވެ.
ދިވެހި ބަސް މުއްސަނދި ކުރުމަށް "ށ" އިން ފެށޭ 05 ބަސް އުފެއްދުމަށް ނިންމަވާފައިވާ ކަމަށް މިނިސްޓްރީ އޮފް ދިވެހި ލޭންގުއޭޖް، ކަލްޗަރަލް އެންޑް ހެރިޓޭޖް އިން ނިންމެވުމާއި ގުޅިގެން ގިނަ ބަޔަކު ދަނީ އެކަމަށް ފާޑު ކިޔަމުންނެވެ.
ޔުމްނާ އިތުރަށް ފާހަގަކޮށްފައިވަނީ ދިވެހި ބަހަކީ މިހާރުވެސް މުއްސަނދި ބަހެއް ކަމަށާއި، ދިވެހި ބަސް ހީނަރުވަމުންދަނީ ބަސް ރަނގަޅަށް އުނގަންނައި ނުދެވޭތީކަމަށެވެ.
ދިވެހި ބަސް ދަސްކޮށްދީ އާލާ ކުރުމަކީ މިހާރުން މިހާރަށް ކުރަންޖެހިފައިވާ ކަމެކެވެ. ބަހުގެ ހަމަތަކާއި ލިޔުންތެރިކަން ކުޑައިރުއްސުރެ ކުދިންނަށް އުނގަންނައިދޭން އެބަޖެހެއެވެ.
