ރައީސް އޮފީހުގައި ކުރިން ސިޔާސީ މަގާމެއް ފުރި އައިޝަތު އީޝާ އަޝްރަފުގެ ޕާސްޕޯޓު ހިފަހައްޓައިފިއެވެ.
މައުލޫމާތު ލިބިފައިވާ ގޮތުގައި، ފުލުހުން މިއަދު ވަނީ އީޝާ ދިރިއުޅޭ އެޕާޓްމަންޓަށް ގޮސް ޕާސްޕޯޓް ހިފެހެއްޓި ކަމުގެ ކޯޓު އަމުރު ހަވާލުކޮށްފައެވެ. ކޯޓު އަމުރުގައިވާ ގޮތުން، އީޝާގެ މައްޗަށް ފުލުހުން ކުރާ ތުހުމަތަކީ ޑޮކިއުމަންޓަރީ ތައްޔާރުކުރުމުގައި އިޝާގެ ބައިވެރިވުން އޮތް ކަމުގެ ތުހުމަތެވެ. އީޝާ ރާއްޖޭން ފުރައިގެން ފިލަން އުޅޭ ކަމަށް ފުލުހުންނަށް އިންޓެލިޖެންސް މައުލޫމާތު ލިބިފައިވާ ކަމަށް ވެސް ކޯޓު އަމުރުގައިވެއެވެ.
އީޝާ ވަނީ ރައީސް އޮފީހާއި ދެ މިނިސްޓްރީގައި ސިޔާސީ މަގާމެއް އަދާކޮށްފައެވެ. އަދި އީޝާއަކީ ރައީސް މުއިއްޒުގެ އަރިސް މުވައްޒަފެއްކަމަށްވެސް އަޑުތައް ފެތުރިފައިވެއެވެ.
