ދިއްލީގެ ހޮސްޕިޓަލެއްގައި އަލިފާނުގެ ހާދިސާއެއް ހިނގައި އަލަށް އުފަންވި ހަ ތުއްތު ކުދިން މަރުވެއްޖެ ކަމަށް ފުލުހުން ބުނެފިއެވެ.

އަލިފާން ރޯވެފައިވަނީ ހޮނިހިރު ދުވަހުގެ ހަވީރު އިންޑިއާގެ ވެރިރަށް ވިވެކް ވިހާރު ސަރަހައްދުގެ ހޮސްޕިޓަލެއްގައެވެ.

އެ ޔުނިޓުގައި 12 ތުއްތު ކުދިން ތިބި ކަމަށް ފުލުހުންގެ އިސް އޮފިސަރު ސުރެންދްރަ ޗޯދަރީ ވިދާޅުވި އެވެ. އަލިފާން ރޯވުމުގެ ކުރިން އިތުރު މީހަކު ވަނީ މަރުވެފައެވެ.

ކަމާބެހޭ ފަރާތްތަކުން ބުނީ ފިލައިގެން ދިޔަ ހޮސްޕިޓަލުގެ ވެރިފަރާތާއި މެދު ގާނޫނީ ފިޔަވަޅު އަޅާނެ ކަމަށެވެ.

ސޯޝަލް މީޑިއާގައި ދައުރުވާ ފޮޓޯއިން ފެންނަ ގޮތުގައި މުޅި އިމާރާތް އަލުފާނުން ވަށާލާފައިވާއިރު އެތައް އަލިފާންގަނޑެއް ފަޅައިގެން ގޮސްފައިވެއެވެ.

ދިއްލީގެ ޗީފް މިނިސްޓަރު އަރްވިންދު ކެޖްރިވާލް ވިދާޅުވީ އަލިފާނުގެ ހާދިސާއަކީ "ހިތް ފަޅައިގެންދާ" އަލިފާނެއް ކަމަށެވެ.

"މިހާދިސާ ހިނގަން މެދުވެރިވި ސަބަބުތައް ތަހުގީގު ކުރަމުންދާއިރު މި އިހުމާލުގެ ޒިންމާ އުފުލަން ޖެހޭ ކޮންމެ މީހެއް ފަހަތުން ދާނަން،" މިސްޓަރ ކެޖްރިވާލް ވިދާޅުވިއެވެ.

ދިއްލީގެ ފަޔާ ޑިޕާޓްމަންޓުގެ ޑިރެކްޓަރު އަތޫލް ގާގް އިންޑިއާގެ ނޫސް އެޖެންސީ ޕްރެސް ޓްރަސްޓް އަށް ވިދާޅުވީ އަލިފާން ނިއްވުމަށް 14 ފަޔާ ޓްރަކް ފޮނުވާފައިވާ ކަމަށެވެ.

"އޮކްސިޖަން ސިލިންޑަރެއްގައި ގޮވުމުގެ ސަބަބުން އަލިފާންގަނޑު މާ ބާރަށް ފެތުރިގެން ދިޔައީ،" އޭނާ ވިދާޅުވިއެވެ.

އޮފިޝަލުން ބުނީ ސަލާމަތީ މަސައްކަތްތައް މަޑުޖެހިފައި ވަނީ އެއް ސިޑިއެއް ހުންނަ އިމާރާތާއި އަލިފާން ނިއްވާ ތަނެއް ނެތް އިމާރާތަށް ވަދެވޭނެ ގޮތް މަދުވުމުން ކަމަށެވެ.

އެ ހޮސްޕިޓަލަކީ މީހުން ދިރިއުޅޭ ގެތަކުގެ މެދުގައި ފިއްތާލާފައިވާ ހޮސްޕިޓަލެއް ކަމަށާއި އެ ހޮސްޕިޓަލަކީ ސަލާމަތީ ހުރިހާ ގަވާއިދުތަކަށް އަމަލުކުރި ތަނެއް ކަމެއް އަދި ފުރަތަމަ އަލިފާން ރޯވީ ކޮން ސަބަބަކާ ހުރެ ކަމެއް އަދި ސާފެއް ނުވެއެވެ.

ބޮޑުވަޒީރު ނަރެންދުރަ މޯދީ ކުރީގެ އެކްސްގައި ލިޔުއްވާފައި ވަނީ "ދިއްލީގެ ހޮސްޕިޓަލެއްގައި ހިނގި އަލިފާނުގެ ހާދިސާއަކީ ހިތްދަތި ކަމެއް" ކަމަށެވެ.

މީގެ ކުރިން ހޮނިހިރު ދުވަހު ވަނީ ހުޅަނގު ގުޖުރާތުގެ ސްޓޭޓްގެ ރާޖްކޮޓްގެ ގޭމްސް އާރކޭޑެއްގައި "ބޮޑު އަލިފާން ގަނޑެއް" ރޯވެފަ މއެވެ.

އެ އަލިފާނުގެ ހާދިސާގައި މަދުވެގެން 27 މީހަކު މަރުވެފައިވާ ކަމަށް ލޯކަލް އޮފިޝަލުން ބުނެ އެވެ. އޭގެ ތެރެއިން ގިނަ މީހުންނަކީ ކުޑަކުދިން ކަމަށް ބެލެވެއެވެ.

މަރުވި މީހުންގެ އާއިލާތަކުން ދަނީ ހަށިގަނޑުތައް ހަވާލު ކުރުމުގެ ކުރިން ޑީއެންއޭ ޓެސްޓުގެ ނަތީޖާއަށް އިންތިޒާރު ކުރަމުންނެވެ.

އާރކޭޑްގައި އަލިފާން ރޯވާން ފެށީ ޝޯޓް ސާކިއުޓެއްގެ ސަބަބުން ކަމަށް ބުނާއިރު، ގަޑިއެއްހާއިރުގެ ތެރޭގައި ދެ ބުރީގެ އިމާރާތް ވަނީ އަނދާ ހުލިވެފައެވެ.

އާދީއްތަ ދުވަހު ވެސް ކަމާބެހޭ ފަރާތްތަކުން ވަނީ ގާކުނޑި ތެރެއިން އިތުރު ހަށިގަނޑުތަކެއް ހޯދުމުގެ މަސައްކަތް ކުރިއަށް ގެންގޮސްފަ އެވެ.

އިންޑިއާގެ ސިޓީތަކުގައި އަލިފާން ރޯވުމަކީ އާންމު ކަމެކެވެ.