މިދިޔަ އަންގާރަ ދުވަހު ސިންގަޕޫރު އެއާލައިންސްގެ ފްލައިޓެއް ޓާބިއުލެންސްގައި ޖެހި އެކަކު މަރުވި ހާދިސާގައި މިހާތަނަށް ކުރެވުނު ތަހުގީގުތަކުން ދައްކާ ގޮތުގައި 4.6 ސިކުންތުގެ ތެރޭގައި ގާތްގަނޑަކަށް 178 ފޫޓު (54 މީޓަރު) އަށް ބޯޓު ވެއްޓިފައިވާކަން ހާމަވެއްޖެއެވެ.

މިޔަންމާގެ މަތިން ލަންޑަނުން ސިންގަޕޫރަށް ދަތުރުކުރަމުން ދިޔަ ފްލައިޓަށް ކުރިމަތިވި ހާދިސާއާ ގުޅިގެން ތައިލެންޑުގައި ކުއްލި ގޮތަކަށް ޖައްސަން ޖެހުނެވެ. މިހާދިސާގައި އިނގިރޭސި ފަސިންޖަރެއް މަރުވެ އެތައް މީހުން ޒަހަމްވިއެވެ.

ސިންގަޕޫރުގެ އިންވެސްޓިގޭޓަރުން ވަނީ އެ މަތިންދާބޯޓުގެ ފްލައިޓް ޑޭޓާ ރެކޯޑަރާއި ކޮކްޕިޓް ވޮއިސް ރެކޯޑަރުގައި ރައްކާކޮށްފައިވާ ޑޭޓާ ނަގާފައެވެ.

އެފަރާތުގެ އިބްތިދާއީ ރިޕޯޓުގައި ބުނެފައި ވަނީ ގްރެވިޓޭޝަނަލް ފޯސް (ޖީ) އަށް އަންނަ ހަލުވި ބަދަލުތަކުގެ ސަބަބުން އުސްމިން ދަށްވުމުން ސީޓްބެލްޓް ނާޅާ ތިބި މީހުންނަށް އަނިޔާވުން އެކަށީގެންވާ ކަމަށެވެ.

ސިންގަޕޫރު އެއާލައިންސް އިން ބުނީ އިންވެސްޓިގޭޓަރުންނަށް އެއްބާރުލުންދީ، އެކަމުގެ އަސަރު ކުރި ފަސިންޖަރުންނާއި ކްރޫއަށް އެހީތެރިވަމުން އަންނަ ކަމަށާއި އޭގެ ތެރޭގައި މެޑިކަލް އަދި ހޮސްޕިޓަލް ހަރަދުތައް ވެސް ހިމެނޭ ކަމަށެވެ.

ޓްރާންސްޕޯޓް ސޭފްޓީ އިންވެސްޓިގޭޝަން ބިއުރޯ (ޓީއެސްއައިބީ) ގެ އިބްތިދާއީ ހޯދުންތަކުން ދައްކާ ގޮތުގައި މިޔަންމާގެ ދެކުނުން 37،000 ފޫޓް (11،300 މީޓަރު) މަތިން ދަތުރުކުރަމުން ދަނިކޮށް "ޑިވެލޮޕިންގް ކޮންވެކްޓިވް އެކްޓިވިޓީ" ގެ ސަރަހައްދެއްގައި ފްލައިޓް އުދުހެންދެން ފްލައިޓް އޮޕަރޭޓް ކުރީ އާދައިގެ ގޮތަކަށެވެ.

"4.6 ސިކުންތުގެ ތެރޭގައި 'ޖީ' އަށް އައި ހަލުވި ބަދަލުތަކުގެ ސަބަބުން އުސްމިން 178 ފޫޓު (54 މީޓަރު) ދަށްވެ، 37،362 ފޫޓުން 37،184 ފޫޓަށް ވެއްޓުނީ" ކަމަށް ރިޕޯޓުގައިވެއެވެ.

"ފަޅުވެރިންނާއި ފަސިންޖަރުންނަށް ލިބުނު އަނިޔާތަކަކީ މި ތަރުތީބުން ހިނގާދިޔަ ކަންތައްތަކުގެ ސަބަބުން ލިބުނު އަނިޔާތަކެއް ކަމަށް ބެލެވެއެވެ."

"ކެބިންގައި އަނިޔާވެފައިވާ ފަސިންޖަރުން ތިބިކަން ކެބިން ކްރޫއިން ޕައިލެޓުންނަށް އެންގުމަށް ފަހު ނިންމީ ތައިލެންޑްގެ ބެންކޮކްގެ ސުވަރނަބޫމީ އެއާޕޯޓަށް ޑައިވަރޓް ކުރަން."

ޓާބިއުލެންސް އިވެންޓަށް ފަހު ގާތްގަނޑަކަށް 17 މިނެޓް ފަހުން ޕައިލެޓުން "37،000 ފޫޓުން ކޮންޓްރޯލްޑް ޑެސްޓެންޓެއް" ހެދި ކަމަށް ރިޕޯޓުގައި ބުނެފައިވެއެވެ.

އަދި އެ މަތިންދާބޯޓު ބެންކޮކަށް ދިޔުމުން ސިއްހީ ހިދުމަތް ދިނުމަށް ވެސް ޕައިލެޓުން ވަނީ އެދިފައެވެ.

ސިންގަޕޫރުގެ ޓްރާންސްޕޯޓް މިނިސްޓްރީގެ ދަށުން ހިންގާ ޓީއެސްއައިބީން ބުނީ އެ އިދާރާގެ ތަހުގީގުތައް ކުރިއަށްދާ ކަމަށެވެ.

ބޮއިންގް 777-300އީއާރު މަތިންދާބޯޓުގައި 211 ފަސިންޖަރުންނާއި 18 ފަޅުވެރިން ތިބި ކަމަށް ސިންގަޕޫރު އެއާލައިންސް އިން ބުނެއެވެ.

ޖެފް ކިޗަން، 73، މަރުވީ ބޯޓުގައި ހާޓް އެޓޭކެއް ޖެހިގެން ކަމަށް ޝައްކު ކުރެވޭއިރު، އިތުރު 104 ފަސިންޖަރުންނަށް ފަރުވާ ދިނުމަށް ބެންކޮކްގެ ސަމިޓިވޭޖް ހޮސްޕިޓަލަށް ގެންގޮސްފައިވެއެވެ.