ޔޫކްރޭންގައި ހިނގަމުންދާ ހަނގުރާމައާ ގުޅިގެން ހުޅަނގާއި އެކު އުފެދިފައިވާ ނުތަނަވަސްކަމުގެ ތެރޭގައި ނިއުކްލިއާ ސަބްމެރިންއަކާއި ފްރިގޭޓެއް ހިމެނޭ ގޮތަށް ރަޝިޔާގެ ކަނޑުގެ ހަތަރު އުޅަނދެއް އެމެރިކާ ކައިރީގައި އޮތް ކިއުބާއަށް ގޮސްފިއެވެ.

މި އުޅަނދުތައް ބަނދަރުކޮށްފައި ވަނީ ހަވާނާ ފަޅުގައި އެމެރިކާގެ ފްލޮރިޑާ ސްޓޭޓާ ގާތްގަނޑަކަށް 90 މޭލު (145 ކިލޯމީޓަރު) ދުރުގަ އެވެ.

ރަޝިޔާގެ ޑިފެންސް މިނިސްޓްރީން ބުނާ ގޮތުގައި އެޑްމިރަލް ގޯރްޝްކޯވް ފްރިގޭޓާއި ކާޒާން ސަބްމެރިން އަކީ ވެސް ހައިޕަރސޮނިކް މިސައިލް ޒިރްކޮން ހިމެނޭ ގޮތަށް ޒަމާނީ ހަތިޔާރު އުފުލާ ދެ އުޅަނދު ކަމަށެވެ. މި އުޅަނދުތަކުން މީގެ ކުރިން ވަނީ އެޓްލާންޓިކް ކަނޑުގައި މިސައިލް ޑްރިލްތައް ކުރިއަށް ގެންގޮސްފައެވެ.

އެކަމަކު ކިއުބާގެ ފޮރިން މިނިސްޓްރީން ބުނަނީ އެއްވެސް އުޅަނދެއްގައި ނިއުކްލިއާ ހަތިޔާރު ނެތް ކަމަށާއި، ފަސް ދުވަހުގެ ދަތުރަކީ އެ ސަރަހައްދަށް ނުރައްކަލެއް ނޫން ކަމަށެވެ.

އެމެރިކާގެ އޮފިޝަލުން ބުނަނީ އެ ތަކެތި ވަރަށް ގާތުން ބަލަމުންދާ ކަމަށެވެ.

އެމެރިކާގެ ނޭވީން ސީ ޑްރޯން ބޭނުންކޮށްގެން ރަޝިޔާގެ އުޅަނދުތައް ކިއުބާއާ ކައިރިވަމުން ދިޔައިރު އެ އުޅަނދުތައް ކައިރިން ދުއްވި ކަމަށް ސީބީއެސް އިން ބުނެއެވެ.

ހެނދުނުގެ ވަގުތެއްގައި ރަޝިޔާގެ އުޅަނދުތައް ހަވާނާ ބޭއަށް ވަދެ، ދެފަރާތުގައި ކުދި ސަޕޯޓް އުޅަނދުތަކެއް ހުރިއިރު، 21 ބަޑިން ސަލާމް ކުރި އެވެ.

ރަޝިޔާގެ ޑިފެންސް މިނިސްޓަރު ނެރުއްވި ބަޔާނެއްގައި ވިދާޅުވީ އެ ދަތުރަކީ ރަސްމީ ނޫން ދަތުރެއް ކަމަށާއި، އުޅަނދުތަކުގެ ފަޅުވެރިންނަށް "އަރާމުކޮށް، ލޯކަލް އެޓްރެކްޝަންތައް ބަލާލުމުގެ" ފުރުސަތު ލިބިގެންދާނެ ކަމަށެވެ.

މީގެ ކުރިން ރަޝިޔާއިން ކިއުބާއަށް ހަނގުރާމައިގެ މަނަވަރުތައް ފޮނުވާފައިވާއިރު، މި ދެ ގައުމަކީ ޒަމާންވީ އެކުވެރި ދެގައުމެވެ.