ސިޕްރިއާ މެރިން ފުޑްސް އިން އެތަނުގައި މަސައްކަތް ކުރާ މުވައްޒަފުންނަށް މުސާރަ ނުދޭތީ ކަންބޮޑުވުންފާޅުކޮށް މުވައްޒަފުން ކުރަމުން އަންނަ އިހުތިޖާޖު މިއަދުވެސް ކުރިއަށް ގެންދާކަން ހާމަވެއްޖެއެވެ.

މިއަދު އިހުތިޖާޖު ކުރަމުން ދަނީ ސީޕްރިއާގެ މައި އޮފީސް ދޮރުމަތީގައި ކަމަށް ތޭރަ އޮންލައިނަށް މައުލޫމާތު ލިބިފައިވެއެވެ.

އެގޮތުން އިއްޔެ އެ މުވައްޒަފުން ކުރި އިހުތިޖާޖަށް ވެރިންގެ ފަރާތުން ވާހަކައެއް ކުރިއެރުމެއް ނުލިބުމުގެ ސަބަބުން މިއަދު އެ މުވައްޒަފުންވަނި ހެނދުނު ދަ ސީޕްރީއާ މެއިން އޮފީހުގެ ދޮރުމަތީގައި އިހުތިޖާޖު ފަށާފައި ކަމަށާ ކުރަނީ ސުލްހަވެރި އިހުތިޖާޖެއް ކަމަށް އިހުތިޖާޖުކުރަމުންދާ ފަރާތްތަކުން ހާމަކޮށްފައިވެއެވެ. އަދި މުވައްޒަފުންވަނީ އެމީހުންގެ އަޑުއަހާ މުވައްޒަފުންގެ ހައްގު މުސާރަ ދިނުމަށް ގޮވާލާފައެވެ. އެ އާއިލާތައް ތިބީ ވަރަށްވެސް ދަތި ހާލުގައި ކަމަށްވެސް ހާމަކޮށްފައިވެއެވެ.

"ތޭރަ އޮންލައިން"އަށް މީގެ ކުރިން މައުލޫމާތު ދެމުން ސިޕްރިއާ މެރިން ފުޑްސްގެ މެނޭޖާރ ވިދާޅުވީ އެ ފެކްޓްރީގައި މަސައްކަތް ކުރާ ބިދޭސީ މުވައްޒަފުންނަށް މުސާރަ ނުދޭތާ 8 މަސް ވެއްޖެކަމަށާއި ދިވެހި މުވައްޒަފުންނަށް މުސާރަ ނުދޭތާ 6 މަސް ވޭތުވެފައިވާކަމަށެވެ.

މީގެ ކުރިންވެސް މުސާރަ ނުދޭތީ މުޒާހަރާކޮށްފައިވާ ކަމަށާއި ނަމަވެސް ފަހުން މުސާރަ ދޭނެ ކަމަށް ބުނުމުން މުޒާހަރާ ހުއްޓާލީ ކަމަށް ވެސް މައުލޫމާތު ލިބިފައިވެއެވެ.

އެތައް މަހެއްގެ މުސާރަ ނުދިނުމުން ވެސް ކުންފުންޏަށް ހިދުމަތްކޮށްދީފައިވާނެ ކަމަށާއި ނަމަވެސް ފަހުން މުސާރަ ދެން ލިބޭނެ ކަމުގެ އެއްްވެސް އަލިމަގެއް ނުފެނުމުން މަސައްކަތް ހުއްޓާލީކަމަށް ވެސް ތޭރަ އޮންލައިން އަށް މައުލޫމާތު ދެމުން ސިޕްރިއާ މެރިން ފުޑްސްގެ މެނޭޖާރ ވިދާޅުވިއެވެ.

މި މައްސަލަ ކަމާ ބެހޭ ފަރާތްތަކުގެ ސަމާލުކަމަށް ވެސް ގެނެސްފައިވާނެ ކަމަށާއި ނަމަވެސް އަދި މިހާތަނަށް އެއްވެސް ފަރާތަކުން އަޅާލާފައިނުވާކަމަށް ވެސް އޭނާ ފާހަގަކުރެއްވިއެވެ.

ބިދޭސީ މުވައްޒަފުން ހިއްސާކޮށްފައިވާ ކަންބޮޑުވުންތަކުގެ ތެރޭގައި އެމީހުން ކުއްޔަށް ދިރިއުޅޭ ގެތަކަށް ކުލި ނުދެވި އެތައް މަހެއް ފާއިތުވުމުގެ ސަބަބުން އެމީހުން އެ ގެ ތަކުން ނިކުންނަން ޖެހިފައިވާކަމަށާއި އެމީހުންނަށް އެމީހުންގެ އާއިލާ އަށް ފައިސާ ނުފޮނުވޭ ކަން ވެސް ވަނީ ފާހަގަކޮށްފައެވެ.