އިންޑިއާގެ ޓްރިވަންޑްރަމްގެ ސްޓޭޓެއް ކަމަށްވާ ކެރެލާގައި ނުރައްކާތެރި ބައްޔެއް ފެތުރެމުންދާތީ އެ ސްޓޭޓުގައި ދިރިއުޅޭ އަދި އެ ސްޓޭޓަށް ޒިޔާރާތްކުރާ ދިވެހިން އެކަމަށް ސަމާލުވެ ރައްކާތެރިވުމަށް އިލްތިމާސްކޮށްފިއެވެ.

މިފަދައިން އިލްތިމާސްކޮށްފައިވަނީ ޓްރިވެންޑްރަމްގައި ހުންނަ ދިވެހިރާއްޖޭގެ ކޮންސިލޭޓް ޖެނެރަލްގެ އޮފީހުންނެވެ.

އެ އޮފީހުން ނެރުނު ބަޔާނެއްގައި ބުނެފައިވަނީ އިންޑިއާގެ ކެރެލާގައި ސިކުނޑިއަށް ޖެހޭ ނުރައްކާތެރި ބައްޔެއް ފެތުރެމުންދާތީ، އެ ސިޓީގައި ދިރިއުޅޭ ދިވެހިންނާއި އެ ސިޓީއަށް ދަތުރުކުރާ ދިވެހިން ސަމާލުވުމަށް އެދޭކަމަށެވެ.

ފެތުރެމުން ދަނީ ސިކުނޑިއަށް ޖެހޭ ބައްޔެއް ކަމަށްވާ "ބްރެއިން އީޓިން އެމީބާ އިންފެކްޝަން" ކަމަށާ އެހެންކަމުން އެކަމަށް ސަމާލުވުމަށް ކެރެލާގެ ޞިއްޙަތާ ބެހޭ ވުޒާރާތަކުންވެސް އިލްތިމާސްކޮށްފައިވާ ކަމަށް ބަޔާނުގައިވެއެވެ.

ބްރެއިން އީޓިން އެމީބާ ބައްޔަކީ ކަންފަތުން ނުވަތަ ނޭފަތުން ހަށިގަނޑު ތެރެއަށްދާ ޖަރާސީމަކަށްވާތީ ކޯރު ފަދަ ތަންތަނަށް މިދުވަސްވަރު ނޭރުމަށާއި ސްވިމިން ޕޫލަށް އެރޭ ނަމަ، ކަންފަތާއި ނޭފަތަށް ފެން ނޭޅޭ ގޮތަށް 'އިޔަރ ބަޑް' އަދި 'ނޭސަލް ކްލިބް' ބޭނުންކުރުމަށް ވެސް ކޮންސިއުލޭޓުން އިލްތިމާސްކޮށްފައިވެއެވެ.

މި އިންފެކްޝަންގެ އަމާލާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ހޮޑުލެވުމާއި، ކަނދުރާގެ ނާރު އެރުމާއި، ވާނުވާ ނޭނގުން އަދި ފިޓު ޖެހުން ފަދަ ކަންކަން ހިމެނެ ކަމަށާއި މިފަދަ އަލާމާތެއް ފެނިއްޖެ ނަމަ، ލަސްނުކޮށް ޑޮކްޓަރަށް ދެއްކުމަށްވެސް ބަޔާނުގައި އިލްތިމާސްކޮށްފައިވެއެވެ.

ޓްރިވެންޑްރަމްގެ ކެރެލާ ސްޓޭޓަކީ ގިނަ ދިވެހިން އެކި އެކި ބޭނުންތަކަށް ގޮސް އުޅޭ އާންމު ސަރަހައްދެކެވެ. އަދި އެތައް ދިވެހިންނެއް ކިޔެވުމަށާ ބޭސްފަރުވާއަށްވެސް ގޮސް ދިގު މުއްދަތަކަށް ތިބޭ ހިސާބެއްކަން ފާހަގަކޮށްލެވެއެވެ.