އިންޑިއާގައި ހިނގި ނުރައްކާތެރި އެކްސިޑެންޓެއްގައި 3 ދިވެއްސަކަށް ބޮޑެތި އަނިޔާތަކެއްވެ، ފަރުވާދޭން ފަށައިފިއެވެ.

އިންޑިއާގެ ކޮޗިންގެ މަގެއްގައި ދުއްވަމުން އައި ދެ ކާރެއް ޖެހިގެން ހިނގި ނުރައްކާތެރި އެކްސިޑެންޓެއްގައި އަނިޔާވެފައި ވަނީ އުމުރުން 50 އަހަރާއި 54 އަހަރާއި އުމުރުން 25 އަހަރުގެ ތިން އަންހެނަކަށެވެ.

އިންޑިއާއަށް ބޭހަށް ދިޔަ އެ ތިން މީހުން ތިބި ކާރު އެހެން ކާރެއްގައި ޖެހި އެކްސިޑެންޓްވީ ޓްރިވެންޑްރެމަށް ދަތުރު ކުރަނިކޮށެވެ. އެ މީހުން ދަތުރު ކުރީ ޓްރިވެންޑްރަމްގެ ކިމްސް ހޮސްޕިޓަލްގެ ޑޮކްޓަރަކަށް ދެއްކުމަށެވެ.

ރޭގެ ވަގުތެއްގައި މި އެކްސިޑެންޓް ހިނގާފައިވަނީ އިންޑިއާގެ ކޮޗިންއާއި ޓްރިވެންޑްރަމްއާއި ދެމެދު އޮންނަ ހައިވޭއެއްގައެވެ.

ދިވެހިން ތިބި ކާރުގެ ކުރިމަތިން ދުއްވާފައި ދިޔަ ކާރު, ޔޫޓާން ނެގުމަށްފަހު ބާރުސްޕީޑުގައި އައިސް ދިވެހިން ދަތުރުކުރަމުންދިޔަ ކާރުގައި ޖެއްސުމުން ހިނގި މިއެކްސިޑެންޓް ހިނގީ ރޭގެ ފަތިހުގެ ވަގުތެއްގައެވެ.

މި އެކްސިޑެންޓުގައި އެކެއްގެ ފައި ބިނދުނު އިރު އެކަކު އަދުވެސް އޮތީ ހޭނާރަ އެވެ. އަދި ތިންވަނަ މީހާގެ މޫނުމަތީން ބައެއް ޒަހަމް ވެފައިވާ ކަމަށްވެއެވެ.

މައުލޫމާތު ލިބިފައިވާ ގޮތުގައި މި އެކްސިޑެންޓުގައި އަނިޔާވެފައި ރ. އަތޮޅު އަލިފުއްޓަށް ނިސްބަތްވާ އެއް އާއިލާއެއްގެ ތިން މީހުންނަށެވެ.