ސެމާއޯ އެގްރީމެންޓް ގައި ހުރީ އިސްލާމްދީނުގައި ގަބޫލުނުކުރާ އެތައް ބައިވަރު ކަންތައްތަކެއް ނަމަވެސް އަދިވެސް ސަރުކާރުން އެއަކަށް ޖަވާބެއް ނުދެއްވާތީ ރައީސް އަބްދުﷲ ޔާމީން ކަންބޮޑުވުން ފާޅުކުރައްވައިފިއެވެ.

ބުރާސްފަތި ދުވަހުގެރޭ ދަ ފްރޮންޓު އޮފީހުގައި ބޭއްވި ޖަލްސާގައި، އައިސީސިޕީއާރުން އެމްޑީއެން އަލުން ރުޖޫއަކުރަން ދިވެހި ސަރުކާރަށް ގޮވާލާފައިވުމުން އެކަމަށް އިޝާރާތްކުރައްވާ ރައީސް ޔާމީން ވަނި އެއީ ސެމޯއާ އެގްރިމަންޓުގައި ސޮއި ކުރިކުރުމުގެ ނަތީޖާއެއްގެ ގޮތުން ދިމާވި ކަމެއްކަމާ މެދު ސުވާލު އުފައްދަވާފައެވެ.

އެގޮތުން އެމަނިކުފާނު ވިދާޅުވީ ސެމޯއާ އެގްރިމަންޓުގައި ދީނާ ޚިލާފުއެތައް ކަމެއް ހުރިއިރު ދީނީ މިނިވަންކަމަށް ވެސް އެ އެގްރިމަންޓުގައި ގޮވާލާފައި އޮތްއިރުވެސް ސަރުކާރުން މިކަމާ މެދު ބަހެއް ނުބުނެ ތިބުމާ ކަންބޮޑުވެވަޑައިގަންނަވާ ކަމަށެވެ.

ސެމޯއާ އެގްރިމަންތުގައި ރާއްޖެއިން ސޮއިކޮށްފައިވާތީ އަދި ސަރުކާރުގެ ސްޓެންޑް އެކަމުގައި ފުރިހަމައަށް ހާމަކޮށްފައިނުވާތީ ރައީސް ޔާމީން ކަންބޮޑުވުން ފާޅުކުރައްވާފައިވާއިރު އެ އެގްރިމަންޓަކީ އިސްލާމްދީނާ ޚިލާފު އެތައް ކަމެއްގެ މައްޗަށް އެކުލެވިގެންވާ އެގްރިމަންޓަކަށްވުމުން އާންމުވެސް ވަނީ އެކަމުގައި ކަންބޮޑުވުން ފާޅުކޮށްފައެވެ.

އެއްބަސްވުމުގައި ހަ ދާއިރާއަކަށް ބިނާވެފައިވާ ގާނޫނީ އޮނިގަނޑު ހާމަކޮށްފައިވެއެވެ. އެއީ ހިއުމަން ރައިޓްސް އެންޑް ޑިމޮކްރަސީ، ޕީސް އެންޑް ސެކިއުރިޓީ، ޑިވެލޮޕްމަންޓް، އިކޮނޮމިކް ގްރޯތު، ކްލައިމެޓް ޗޭންޖް އަދި މައިގްރޭޝަން އެންޑް މޮބިލިޓީއެވެ.

މީގެ ތެރެއިން ހިއުމަން ރައިޓްސް އެންޑް ޑިމޮކްރަސީގެ ދަށުން އެއް ޖިންސުން ގުޅުން ހިންގަން ފުރުސަތު ދިނުމާއި، އެބޯޝަން ހެދުމުގެ ހުއްދަ ދިނުމުގެ އިތުރުން ދީނީ މިނިވަންކަން ދިނުންވެސް ސަމޯއާ އެގްރީމެންޓުގައި ވަނީ ހިމަނައިފައެވެ.