ވެރިކަން ކުރާ ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ)އިން ރައްޔިތުންގެ ހައްގުތައް ކަށަވަރު ކޮށްނުދޭނެކަން ކަށަވަރުވާ ކަމަށް މޯލްޑިވިއަން ޑިމޮކްރެޓިކު ޕާޓީ (އެމްޑިޕީ)އިން ހާމަކޮށްފިއެވެ.

މިފަދައިން ހާމަކޮށްފައިވަނީ މިއަދު އެމްޑީޕީގެ ޕާލިމަންޓްރީ ގްރޫޮުގެ ފަރާތުން ބޭއްވި ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހުގެ މައިނޯރިޓީ ލީޑަރު ހިތަދޫ އުތުރު ދާއިރާގެ މެންބަރު އިބްރާހީމް ނާޒިލްއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ހައުސިން މިނިސްޓަރު ޑރ. އަލީ ހައިދަރާ ސުވާލު ކުރުމަށް ލިބުނު ފުރުސަތުގައި މެންބަރުން ވަނީ ކުރީ ސަރުކާރުން މާލެ ސަރަހައްދުން ދީފައިވާ ގޯއްޗާއި ފްލެޓްތަކާ ގުޅޭގޮތުން ސުވާލު ކޮށްފައެވެ. އެހެންނަމަވެސް ބައެއް ސުވާލުތަކަށް މިނިސްޓަރު ހައިދަރު ދެއްވި ޖަވާބުތަކާމެދު އެމްޑީޕީ މެންބަރުން ހިތްހަމަ ނުޖެހުން ފާޅުކޮށްފައިވެއެވެ. އަދި ނިޒާމީ ނުކުތާ ނަގާ އެމްޑީޕީގެ މެންބަރުން އެކަން ފާހަގަކުރުމުން ރިޔާސަތުން ވަނީ ނިޒާމީ ނުކުތާ ބަލައިގަންނަ ކަމަށް ބުނެފައެވެ.

އެ ނިންމުމާއެކު އެމްޑީޕީގެ ބައެއް މެންބަރުން މަޖިލީހުގެ ތަޅުމުގައި އަޑުގަދަކުރަން ފެށުމުން ރިޔާސަތުން ވަނީ އެމްޑީޕީގެ ހަތަރު މެންބަރެއްގެ ނަން އިއްވާފައެވެ.

މިކަމާ ގުޅިގެން ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނާޒިލް ވިދާޅުވީ އެމްޑީޕީން އަބަދުވެސް ތިބޭނީ ރައްޔިތުންނާއި އެކު ކަމަށެވެ.

ނާޒިލް ވިދާޅުވީ މެންބަރުންގެ ސުވާލުތަކަށް މިނިސްޓަރު ހައިދަރު ޖަވާބު ނުދެއްވުމުން ދެން ހިނގާދިޔަ ކަންކަމުގައި ރިޔާސަތުން އަމަލުކުރީ އެކަން ކުރަންވާ ގޮތަށް ނޫން ކަމަށަ އެކަމުން ފެނިގެން ދަނީ ސުޕަރ މެޖޯރިޓީގެ ބޭނުން ނަހަމަ ގޮތުގައި ހިފާ މަންޒަރުކަމަށެވެ. އެގޮތުން ޕީއެންސީ ސުޕަރ މެޖޯރިޓީއާއެކު ރައްޔިތުންގެ ހައްގުތައް ކަށަވަރުކޮށްނުދޭކަން ސާފުވާ ކަމަށް ނާޒިލް ވިދާޅުވިއެވެ.

މިދިޔަ ސަރުކާރުގައި ގޯތިތައް ދޫކޮށްފައިވަނީ ކަނޑުން ކަމަށް ވިދާޅުވެ ހައިދަރު ދެއްކެވި ވާހަކަ އަށް އިޝާރަތްކޮށް ނާޒިލް ވިދާޅުވި ހައިދަރު ދެއްކެވީ ހަގީގަތާ ހިލާފު ވާހަކައެއް ކަމަށެވެ.

ނާޒިލް ވިދާޅުވީ ޑރ މުހައްމަދު މުއިއްޒު ރިޔާސީ އިންތިހާބު ކާމިޔާބުކުރެއްވި ހިސާބުން އޭސީސީ މެދުވެރިކޮށް ގޯތި/ފްލެޓު ދިނުން ހުއްޓާލަން އޭރު ވެރިކަމުގައި އޮތް އެމްޑީޕީއަށް އަންގަމުން ދިޔަ ކަމަށެވެ.

މި ސަރުކާރަށް އަހަރެއް ވެގެންދާއިރުވެސް އެއްވެސް ނަތިއްޖާ އެއް ނެރެވިފައި ނުވާ ކަމަށާއި، 4000 ފްލެޓަށް ކުރިމަތިލާން އަލުން ހުޅުވާލަން އުޅޭ ކަމުގެ މައުލޫމާތު ލިބިވަޑައިގެންފައިވާ ކަމަށް ވިދާޅުވި އެވެ. ނާޒިލް ވިދާޅުވީ އެއީ ތެދަކަށްވާނަމަ އެކަން ވެގެންދާނީ ބޯހިޔާވަހިކަން ބޭނުންވެފައިވާ ފަރާތްތަކަށް މި ސަރުކާރުން ވަރަށް އިހާނެތިކޮށްކުރާ ކަމެއްގެ ގޮތުގައި ކަމަށެވެ.