ޕީއެންސީގެ ޕީޖީ ލީޑަރު އިބްރާހިމް ފަލާހުގެ އެންގުމަކަށް، އެޕާޓިގެ މެމްބަރުން ތަޅުން ދޫކޮށް ދިޔަކަމަށް ތުހުމަތުކޮށްފިއެވެ.
އެމްޑީޕީގެ މަޖިލިސް މެމްބަރަކު ކުރައްވާފައިވާ ވީޑިއޯއެއްގައި ވަނީ މަޖިލީހުގެ ބުދަ ދުވަހުގެ ޖަލްސާ ކޯރަމް ހަމަ ނުވެގެން ގަޑިއަށް ނުފެށުމުން 10 ޖަހާއިރަށް ޖަލްސާ ފަސްކޮށް 10 ޖެހުމުން ޖަލްސާ ފަށަން ޕީއެންސި މެމްބަރުންވެސް ހިމެނޭހެން މަޖިލިސް މެމްބަރުން ތަޅުމަށް ހާޒިރުވިތަނާ ޕީއެންސީ ޕީޖީ ލީޑަރު އިބްރާހިމް ފަލާހުގެ އެންގުމަށް ޕީއެންސީގެ މެމްބަރުން ތަޅުން ދޫކޮށް ދިޔަކަމަށް ބުނެފައެވެ.
އެހެން އެކަން ކުރީ މަޖިލިހުގެ ނައިބު ރައީސް އަހުމަދު ނާޒިމްއާ ޖައްސާލައިގެން ކަމަށް ވެސް ބުނެފައިވެއެވެ.
ޕީއެންސީ މެމްބަރުން މިގަދައިން ކަންކުރި ކަމަށް ބުނެފައިވާއިރު، ބުދަ ދުވަހުވެ ހެނދުނުގެ ވަގުތެއްގައި ނާޒިމް، ޕީއެންސީގެ ރަސްމީ ވަޓްސް އަޕް ގްރޫޕުން ބޭރުކޮށްލާފައިވާ ކަމަށް ރިޕޯޓުކޮށްފައިވެއެވެ. އެހެން ކަމުން ޕީއެންސީ ތެރޭގައި ރެނދެއް ލައިފިކަމުގައި ގިނަ ބަޔަކު ދަނީ ބުނަމުންނެވެ.
