ލުބްނާންގެ ހިޒްބުاللهގެ މެމްބަރުންނަށް އަމާޒުކޮށް ދިން ނުރައްކާތެރި ހަމަލާތަކުގެ ސަބަބުން ލުބްނާނަށް ބޮޑެތި ގެއްލުންތަކެއް ލިބެމުން އަންނައިރު، މިދިޔަ އަންގާރަ ދުވަހު އެ ގައުމުގެ އެކި ކަންކޮޅުތަކުގައި ޕެޖަރުތައް އެއްފަހަރާ ގޮއްވާލައި، ބުދަ ދުވަހު ވެސް ވަނީ އެފަދަ ގޮތަކަށް ވޯކީޓޯކީތައް ގޮއްވާލާފަ އެވެ.
ބިރުވެރިކަމާއި ހިތާމައިގެ އަސަރު މިހާރު ލުބުނާންގައި އުފެދިފައިވާއިރު، ހަމަލާތައް ދެވުނީ ކިހިނެއްކަމާއި، އެ ޑިވައިސްތައް އައީ ކޮންތަނަކުންކަމާއި، މެދުއިރުމަތީގެ ސަރަހައްދީ ހަނގުރާމައިގެ ތެރެއަށް ވެއްޓިދާނެކަމާމެދު އަންނަނީ ސުވާލު އުފައްދަމުންނެވެ.
ލުބުނާނުގެ އޮފިޝަލުން ސަހްޔޫނީންނަށް ތުހުމަތުކުރާ މި ހަމަލާތަކުގައި ކުޑަކުދިންނާއެކު 37 މީހުން ވަނީ މަރުވެފައެވެ. އެތައް ހާސް ބަޔަކު ޒަޚަމްވެފައިވާއިރު، މުވާސަލާތީ ވަސީލަތްތައް ޖީބުގައި ނުވަތަ މޫނުގައި ގޮވުމުގެ ސަބަބުން އެތައް ހާސް ބައެއްގެ ހާލު ވަނީ ވަރަށް ބޮޑަށް ގޯސްވެފައެވެ.
ސަހްޔޫނީން ފާޅުގައި ހަމަލާއާއި ގުޅިގެން އެއްވެސް އެއްޗެއް ބުނަން ދެކޮޅު ހަދަމުން އަންނައިރު، ބުދަ ދުވަހު އެ ޖަމާއަތުން ވަނީ ހަނގުރާމައިގެ "އާ ޒަމާނެއް" ފަށައި، އެ ޖަމާއަތުގެ ދައުރު ސިއްރުން ބަލައިގަންނަ ކަމަށް ބުނެ އިންޒާރު ދީފަ އެވެ.
